الموضوع: تركب ايه بعد الأبيزا ؟؟؟

السلام عليكم ورحمة الله وبركاته

أزيكم يا ركيبة الأبيزا ؟؟؟
عاملين ايه ؟؟؟

السؤال دة اتسألته من حد حبيبي وهو عضو هنا معانا في القسم ولقيته بدون مقدمات بيسألني "تركب ايه بعد الأبيزا؟"
ورد بردو علي سؤاله وقالي "تركب قرطبة ؟؟"

انا رديت وقولتله ان القرطبة عربية جميلة جدا ومحترمة جدا ومالحقتش اكمل اجابتي ودخلنا في حوار تاني لأننا اساسا كنا واقفين عند الميكانيكي

فانا حبيت اجاوب هنا وفي نفس الوقت اطرح السؤال عليكم عشان عايز اعرف فعلا اراء ركيبة الأبيزا والسيات عموما تفكيرهم زيي ولا مختلف

اولا الي خلاني اركب ابيزا هيكون نفس السبب الي يخليني اكمل مع فولكس فاميلي او بيسموها فولكس جروب
يعني انا بحب الفولكس حب الأب لأبنه ويمكن دة كان احد اقوي الأسباب الي خليتني اركب ابيزا لأني علي علم بسبب متابعتي ليها من اول يوم نزلت فيه ارض الوطن سنة 1994 ومع بدايات معارض فورميلا ومعرض اوتوكروس سنة 1995 انها ابن اصيل من عائلة فولكس العريقة ذات الحسب والنسب
واهو الي مايرضي بالخوخ يرضي بشرابه

كمان انا عاشق للعربية جولف 2 ومعروف ان الأبيزا 94 مشتركة مع البولو فوكس في موتور وشاسيه جولف 2

وبصراحة انا كنت ناوي لما اغير اركب بولو أنشاء الله (بعشقها اكتر من الأبيزا بصراحة) واهو يبقي جبت الخوخ نفسه

بس انا في نفس الوقت بحب عربيات تانية كتير اوي
بصراحة انا بحب الهوندا سيفيك جدا
بحب التويوتا كرولا جدا
بحب السيات توليدو جدا
بحب الأوبل كورسا وفيكترا جدا
بحب الدايو سيليو جدا
بحب الرينو كليو جدا
بحب البيجو 206 - 406 جدا جدا
بحب الفولكس جولف - جيتا - بورا - بولو جدا جدا جدا جدا - علي الترتيب

وانواع اخري كتير
معياري في الأختيار والحب مبنية علي التالي
- الأسم العريق
- حبي ليها الي مش عارف سببه يمكن عشان شكلها
- شوفتها او ركبتها مع حد فاقتنعت بيها وحبتها


انا شخصيا ركبت الماني وبحب المدرسة الأوروبي في العربيات بوجه عام والألماني بوجه خاص
ركبت الماني فولكس - سيات عربيتي حبيبتي
ركبت الماني مرسيدس - عربية اخويا
ركبت الماني اوبل - عربية اخويا

تحس ان الأوروبي عربية محترمة بس عايزة عناية وصرف ومش مشكلة لو باظت لأن ليها تصليح وصيانتها اسهل مما تتوقع ومش المشكلة انها بتبوظ المشكلة انك ماتعرفش العيب الي مبوظها

الأسيوي (الكوري - ياباني - ماليزي - صيني) كله بياخد من بعضه او بالأحري من الياباني فتحس انه كله مسخ وناسخ من بعضه ومش معروف هويته علي عكس الأوروبي كل عربية وليها طابع خاص حتي لو من نفس الشركة وقليل في الأسيوي الي ليه سبق وطابع خاص بيه زي هوندا مثلا

الأمريكاني عربيات حلوة بس مدية كل حاجة حقها بزيادة اوي لدرجة انها رخمة وتحسها حتي في اكلهم لو هيعمل اكلة بتبقي دسمة جدا وسعراتها الحرارية عالية جدا دة لو اعتبرنا ان ليهم مطبخ زي الأوروبي

تفتكروا في مدارس تاني في العربيات ؟؟؟؟؟؟
مش متهيألي
هما اوروبي - اسيوي - امريكاني

طبعا مفيش افريقي - مصر مثلا
طبعا مفيش استرالي
مفيش لاتيني - البرازيل

هما كدة ال6 قارات بتوع العالم

عايز اسمع ارائكم واختياراتكم وهل توافقوني الرأي انك لونزلت من الماني تركب الماني ولا لو نزلت من الماني هتنزل كارهه ومش عايز اي حاجة من ريحته ؟؟؟؟

في انتظار الردود

والله المستعان
،
،