الموضوع: تقرير بسيط عن الكوردوبا 2002 حسب طلب الأعضاء

السلام عليكم و رحمة الله وبركاته

أخواني و أحبائي محبي سيارات سيات بعد طلب أحد الأخوة مني عمل تقرير حول السيارة سيات كوردوبا 2002 قررت أعمله بالصور عشان يكون اوضح و أدق وفي النهاية هعمل مقارنة بسيطة بينها و بين الابيزا نفس الموديل
المواصفات الفنية
محرك 1000 سيسي 16 فالف 70 حصان عند 6200 و أقصي عزم 91 نيوتن متر عند 4400
المحرك ده مختلف تماما عن اللي بينزل في الابيزا و للعلم المحرك ده معمول لسيات مخصوص و هو بيشترك في قطع غيار كتير مع محركات 1000 و 1400 16 فالف بتنزل للابيزا ولكن هو كأداء محرك رائع في السحب و الجري و لكن يعيبه فقط كأي محرك 16 فالف انه بيخرج عزمه متأخر شوية يعني لما تكون حابب تسحب صح وانت محمل محتاج تغير علي 3500 او 4000 ار بي ام و لكن ده ميزة في حالة أخري و هي عندما تريد الحرق علي اي غيار معاك حتي 6000 لفة و بقوة غير طبيعية بعد ال 3500 علي العكس في الابيزا مكانش بيبقي معايا روح طويلة في الموتور

سنتر لوك + 4 زجاج كهرباء + مرايات كهرباء +باور + تكييف تاتش ديجيتال + كمبيوتر رحلات + مفتاح بريموت + ايموبلايزر مانع للسرقة
أبعاد السيارة :-
الطول 4165 مم
العرض 1654 مم
الارتفاع 1420 مم
الفرق الطولي بين محور العجلات 2445 مم
استهلاك البنزين :- هو بيعمل معايا متوسط من 270 حتي 300 كيلومتر في ال 20 لتر و مع تشغيل التكييف
الدواخل للسيارة اوسع قليلا في الطول و العرض من الابيزا
مساحة الشنطة 455 لتر مقارنة بالابيزا 280 لتر تقريبا للابيزا مع امكانية طي الكراسي الخلفية و اضافتها للشنطة اللي اساسا واسعه و كافية تماما لأي شيء

عفشة السيارة :- نفس عفشة الابيزا من الأمام و لكن تم اضافة stabilizer bar اضافي غير موجود في الابيزا و من الخلف نفس العفشة مه اختلاف المساعدين هنا عن هنا لوجود شنطة في الكوردوبا و زيادة اكبر في الوزن مع التحميل

احساسي الشخصي بالعفشة :- الابيزا و الكوردوبا من الأمام مريحين جدا و ان كان و للأمانه احساسي بالراحة في الكوردوبا أكتر من الابيزا و في الخلف الكوردوبا اريح من الابيزا بمراحل و يعيب الابيزا انها ناشفة من الخلف

احساسي الشخصي بالثبات :- الكوردوبا اكثر ثباتا من الابيزا و بمقدار كبير علي الرغم ان الكوردوبا أعلي قليلا من الابيزا و أعتقد ذلك لأن وزنها أثقل من الابيزا و لوجود ال stabilizer bar في الكوردوبا

يعيب الكوردوبا عموما كعربية فقط حتي الأن معي شخصيا :-
1- فرش الأبواب اللي فيه جزء قماش بيطلع بسهولة و بيكون شكله مش ظريف و لكن انا وجدت له حل و هعمله ان شاء الله قريبا وهو تصميم فرش مماثل له ولكن بجودة أعلي في التركيب و الخامه و الحمد لله عرفت ايه عيبه و هحله قريبا و سوف اوافيكم بالتفاصيل بعد حل المشكلة و أشكر في هذا الموضوع الأستاذ أحمد مشعل صاحب مصنع جينزكار لفرش السيارات لمساعدته

2- المحرك أدائه جيد جدا مع السيارة و لكن مع التحميل و التكييف بيتأثر في الطلعه و السحب و ده لأن عزم الموتور مش عالي رغم ان قوته عالية حيث يوجد محركات أخري من فولكس اقل منه قوه و لكن عزمه أعلي منه و مع ذلك يظل أفضل بمراحل عن محرك الابيزا ال 1000 مع نفس ظروف التشغيل

3- تقفيل سقف السيارة فيه زنه غريبه و لكن انا مش عارف فين مصدرها و اتوقع انها بسبب وجود نقرات بسيطة في السقف و جاري ايضا محاولتي حل هذه المشكلة قريبا ان شاء الله

4- شاشة عرض البيانات اللي موجوده في منتصف التابلوه يعيبها وجود تقطيع بسيط للأرقام و ده عيب منتشر لهذا الموديل و لكن غير مؤثر علي اي شيء

5- وجود الكاسيت الاوريجينال شرائط فقط و عدم وجود السي دي تشانجر فيه رغم انه كاسيت رائع جدا في امكانياته و لكن خلاص قدمت الشرائط و انا مشغله حاليا ب fm modulator للتغلي علي هذه المشكلة و كمان ليس بامكانك تغيره بأي موديل لأي كاسيت في السوق لأنه مرتبط هو و التكييف بمجموعة أزرار تاتش للتشغيل و بتقفيل معين يجعلك لا تستطيع تغغير ذلك

6- لا يوجد منها موديلات اوتوماتيك في السوق علي العكس الموديل اللي بعده

انا مقبلتش حاجه تانيه غير كده و بأمانه دي كل عيوبها و غير كده هي عربية رائعه و حسيت بنقله كبيرة بأمانه لما غيرت من الابيزا 98 ال كوردوبا 2002

من رأيي الشخصي ان موديل الكوردوبا اللي بعده اللي من 2003 حتي 2009 وهو أفضل من ده بكثييييييييييييير لأنه تلاشي معظم العيوب التي ذكرتها ان لم يكن كلها تقريبا و تلاشي ايضا عيوب تعليق المحرك اللي موجوده عموما في الابيزا و الكوردوبا من 94 حتي 2002 و بالتالي تجدها انعم بمراحل ولا تلاحظ تشغيل المحرك من عدمه و كذلك توجد منها محركات اكبر من 1400 الي 1400 16 فالف 75 حصان الي 1400 16 فالف 85 حصان الي 1600 16 فالف 105 حصان و ده في أخر موديلاتها و التي تحتوي فتيس اتوماتيك ستيب ترونيك 6 سرعات

لو ناسي حاجه ياريت تفكروني
و بالتوفيق للجميع ان شاء الله و اي استفسار تحت أمركم