مشروع طباعة تيشيرتات (سؤال)

**wahba87** · 12-04-2012 06:04 PM

السلام عليكم

نويت إن شاء الله أبدأ مشروع طباعة تيشيرتات و بيعها و كده

كنت عايز أعرف لو حد عنده فكرة عن مصنع بيع تيشيرتات سادة (جودة ممتازة) و سعرها , كميات قليلة الى حد ما عشان بداية المشروع ؟

و نفس السؤال لو حد يعرف مكان للطبع على التيشيرتات (ليزر / عادى) جودة عالية , و سعر الطباعة , و يكون يوافق يطبع عدد قليل

انا كنت عايز أبدأ ب 50 على سبيل التجربة عشان مخسرش كتير لا قدر الله

**bHa2** · 12-04-2012 06:19 PM

متابع لاني ناوي برضه ان شاء الله

**EL Tanna** · 13-04-2012 01:52 AM

يعنى حضرتك عايز تى شيرتات متقفله و جاهزه بس ساده؟؟؟
ولا ايه معلش اصل مش فاهم اوى بس عايز اساعدك انا شغال فى مجال التى شيرتات الشبابى

حضرتك قصدك 50 قطعه فى الموديل الواحد ولا كل الى هتعملهم 50 قطعه و هتقسمهم على كام طبعه و كام مقاس ؟؟ولا قصدك 50 فى اللون

**wahba87** · 13-04-2012 09:36 AM

المشاركة الأصلية كتبت بواسطة blackfox14

يعنى حضرتك عايز تى شيرتات متقفله و جاهزه بس ساده؟؟؟
ولا ايه معلش اصل مش فاهم اوى بس عايز اساعدك انا شغال فى مجال التى شيرتات الشبابى

حضرتك قصدك 50 قطعه فى الموديل الواحد ولا كل الى هتعملهم 50 قطعه و هتقسمهم على كام طبعه و كام مقاس ؟؟ولا قصدك 50 فى اللون

انا عايز تيشيرتات سادة متقفلة , لو هروح اطبعها عند حد تانى

لو انت هتطبع بالمرة يبقى تمام , انا كل اللى هعملهم 50 قطعة , 5 تصميمات , يعنى كل تصميم 10 قطع

**EL Tanna** · 13-04-2012 12:47 PM

بص هوا العدد الى انت طلبه ده قلييييل جدا يعنى اقل حاجه لو هتشترى قماش علشان ياقص تى شيرت بيبقى اللون الواحد بيعمل تقريبا 60-80 تى شيرت فى اللون و طبعا حضرتك هتحتاج الوان مش اقل من 4 او 5

الصراحه انا معرفش حد بيبيع تى شيرتات متقفله ساده انا اقدر افيدك فى اماكن الى بنجيب منها القماش خام و المصانع الى تصنع فيها لكن 50 تى شيرت كاجمالى صعب

**wahba87** · 13-04-2012 01:13 PM

المشاركة الأصلية كتبت بواسطة blackfox14

بص هوا العدد الى انت طلبه ده قلييييل جدا يعنى اقل حاجه لو هتشترى قماش علشان ياقص تى شيرت بيبقى اللون الواحد بيعمل تقريبا 60-80 تى شيرت فى اللون و طبعا حضرتك هتحتاج الوان مش اقل من 4 او 5

الصراحه انا معرفش حد بيبيع تى شيرتات متقفله ساده انا اقدر افيدك فى اماكن الى بنجيب منها القماش خام و المصانع الى تصنع فيها لكن 50 تى شيرت كاجمالى صعب

طبعا شكرا ليك على مساعدك

طب تنصحنى أقل عدد أبدأ به كام ؟ , انا مش عايز أخسر و عايز أبدأ بأقل كمية ممكنة

و يا ريت تعرفنى على مصانع جودتها ممتازة و أماكن طباعة بجودة ممتازة , انا اهم حاجة عندى ان شاء الله ان جودة التيشيرت تكون اكثر من ممتازة

**EL Tanna** · 13-04-2012 02:07 PM

بص حضرتك اهم حاجه فى جوده التى شيرت خامه التى شيرت نفسه مش تقفيل المصنع
يعنى المهم قطن ولا بولستر بيكش فى الغسيل ولا لا لان لو كش فى الغسيل الى هيشتريه مره مش هيشترى تانى

تانى حاجه المصنع و طبعا بما ان الكميات الى حضرتك هتعملها قليله يبقى خلينا فى المصانع الصغيره شويه و دى بتبقى فى منطقه اسمها البراجيل غالبا

و علشان حضرتك متخسرش شوف سوقك اد ايه الاول يعنى كام محل و بعد كده حدد الكميه الى هتعملها و حدد اذا كان حضرتك هتعمل الموديل مقاس واحد ولا اتنيين ولا تلاته ؟؟هتعمل تى شيرت عادى ولا باديهات؟؟؟

**محمد محمد** · 13-04-2012 09:23 PM

انا برضه ببعمل المشروع الصيف ده بس هجيب قماش واوديه مصنع ومطبعة...السنة اللى فاتت عملت بتشيررتات جاهزة وخسرت فيها فبلاش جاهز...انا برضه هعمل كمية قليلة...لو عايز انا وانت نشتري من مكان واحد ناخد الحاجة بسعر كويس بتاع الكمياتكتفصيل وطباعة انا موافق.

**SYD** · 13-04-2012 10:21 PM

انا فكرت في الموضوع دة قبل كدة
اتفرجت علي المحل الي هفتحه
سألت علي كل حاجة
بس انا كنت هعمله بشكل مختلف

عارف حضرتك محل ليزر الي في روكسي ؟؟؟
يمكن ماتعرفوش لأنه مستخبي شوية

الفكرة كالتالي
عنده تيشرتات سادة
بتختار الرسمة من الكتالوج
بيطلعها ويطبعها علي التي شيرت قدامك
بفكرة المكواة والضغط

انا كنت هعمل كدة

نزلت شارع نجيب الريحاني في وسط البلد
لقيت المكواة بالضغط في حدود من 3 - 4 الاف جنيه

البرينتر Printer او الطابعة الي هتطبع الشكل الي الزبون هيختاره
طبعا برنتر من نوع خاص
لن تزيد عن 4000 جنيه

التي شيرتات بالنسبالي ماكنتش مشكلة
كنت هنزل اي مصنع او حتي ورشة في 6 اكتوبر وهشتري كميات (ليس اقل من 500 قطعة)
ليه مش اقل من 500 ؟؟؟
لأنك عايز الوان (ابيض - اسود - بيج - رمادي - احمر - الخ)
عايز من كل لون مقاسات (Small- Medium - Large - XL)

وبالتالي لو من كل مقاس من كل لون 10
يبقي انت فعلا هتدخل في 500 مستريح ومش هيبقوا كتير

والي ينقص هتجيب منه تاني

فكر في الموضوع دة
هتلاقيه روش اخر حاجة والتكاليف في الأول بس
وبعد كدة المشروع هيغطي مصاريفه

اهم حاجة المكان المناسب
وسعر التي شيرت يكون مريح

والله المستعان
،
،