الموضوع: حصريا .. أول اخــتبار قـيادة لنيسان جــــوك .. أحـدث سيارة كروس اوفـر رياضية من نيسان

تجربة القيادة بواسطة :
احمد مصطفى

صور من العرض فى داندى مول

صورة الاستمارة .. وذكر اسم نايل موتورز
وياريت اى عضو حيروح فى اى يوم .. يذكر اسم نايل موتورز
فى الاستطلاع

بنفس الطريقة

كنت بالصدفة فى داندى مول فى يوم شم النسيم .. ولقيت الجوهرتين موجودين فى العرض

نيسان جوك + نيسان قاشقاى اتوماتيك

طبعا انا مجرتش القاشقاى لانى جربتها قبل كدا .. وانطباع سواقتى فى الماتور بالذات نفس الجوك

شرح سريع عن امكانيات السيارة :

السيارة يابانى تقفيل انجلترا فى مصنع نيسان فى ساندر لاند

1600 سى سى 118 هورس باور 2 كامة 16 صباب ديول انجكشن فتيس cvt extronic
4 ايرباجز + abs ,ebd ,ba,esp + مالتى فنكشن ( اوديو كاسيت + كروز كنترول لتثبيت السرعات + بلوتوث ) + مرايات كهرباء وضم + كنسول شكل الريسنج بلون نبيتى واخر سيلفر +
تكيف اتوماتيك + جنوط سبور 17 + سمارت كى + انجن ستارت

والمزيد من الامكانيات والكماليات .. سوف نطرحها فى موضوع منفصل وومفصص .. قريبا باذن الله

السعر الرسمى .. سعر الوكيل .. 160 الف جنيه

اولا تقييمى عن لوكيشن العرض فى داندى :

مش قوى على عكس العام الماضى .. كان تصميم اللوكشن كان اقوى من كدا فى عرض القاشقاى المانيول اول ما نزلت

وايضا اختيارهم للالوان السيارات .. مش جاذب الانتباه ..
كنت اتمنى يتم عرض الجوك الحمراء .. لانها ملفتة جدا عند العرض فى اى معرض او اى حدث

فالمكان والديكور وعرض السيارات والوانها المعروضة بيها اعطيه 6 /10
ولو كان الاحمر فى الجوك مع السليفر كنت اعطتيهم 8/10
لان اختيار اللون هام جدا فى مسائلة الدعاية والاعلان بالاخص فى حالة العرض فى المعارض

تقيمى للسيارة

:: العزل ::

حدث ولا حرج .. ولا الدموع .. مش حتسمع دبة النملة .. مفيش غير بس الطريق .. لان المكان اللى بنعمل فيه تيست على طريق مصر اسكندرية فيه تراب ورمل خشن بسمع بس صوت الكاوتش ومش قوى

ولما كنت بجرى بيها واكبس واحرق .. بصراحة صوت الماتور مش مزعج ابدا

وكمان لما كنت بمشى هادى فجئت لما كنت ببص على العداد لقيت السرعة 130 وصوت الماتور مش عالى ابدا .. على عكس التيدا الاتوماتيك اللى معايا 130 بسمع صوت الماتور بس مش مزعج بردوا

تقييمى العزل 8/10

:: الشكل الخارجى ::

شكل غريب وجميل يحوى بالشراسة .. بيجمع بين العربيات الكوبيه وعربيات السبق .. وكل اللى ماشى جنبى فى الطريق بيستغرب لما بيشوفنى معدى من جنبه .. اكن لسان حاله بيقول ايه ده
دى دبابة جديدة صغيرة بعتاها امريكا تجربها عندنا ولا ايه هههههههههههه

لا بجد احساس جميل جدا بانك راكب حاجة غريبة ومميزة ومختلفة

والفوانيس كبيرة وجميلة على نظام نمط الفوانيس الرالى

تقييمى 7.5/10

:: الشكل الداخلى ::


حاجة فى منتهى الروعةةةةةة .. كان نفسى يبقا فيها فتحة سقف .. كانت بصراحة بقت جناننننننن
طبعا الشكل جوة متناسق وجميل .. ومريح للعين جدا .. من تناسق الالوان .. ولون العدادات المريحة للعين
وياسيدى بقا على منظر الكنسول الشيك اللى شبه الدرجات النارية الرياضية .. طول الوقت ماشى عمال ابص عليه ومش مركز بسببه فى الطريق .. حاجة تاخد العقل

بصراحة تحب تقعد فيها ومش تنزل
والدليل على الشكل الخارجى والداخلى هيما زميلنا فى قسم نيسان رسمها من حبه ليها .. وبصراحة حقه

الفرش شيك جدااااا وتقفيله يوحى بالتقفيل والشكل الانجليزى العصرى الشيك

شكل العربية من جوة فى تقيمى
9/10

:: التقفيل والخامات المستخدمة ::

تقفيل العربية من الداخل فى الصالون فى منتهى اروعة .. وحتى فى الماتور تقفيل ممتاز
والخامات المستخدمة فى الصالون محترمة جدا وتقفيلها فى غاية الروعة
ومفيش اى مشكلة

واعطيهم
8/10

:: التكييف ::

حدث ولا حرج .. ممتاز جدا فى تبريده .. وكمان مش بياثر على السحب
وطبعا التكييف اتوماتيك .. وبرد العربية اول ما طلعنا مع انها كانت مركونة فى الشمس ومكناش حتى عملينا تبريد عالى

اعطيله 9/10

:: سحب العربية والقيادة ::

بصراحة استمعت بقيادة السيارة .. وكان نفسى تفضل معايا

اول صدمة حسيت بيها لما كنت ماشى 130 ومش دريان .. ببص لقيت العربية 130 ومش حاسس ومفيش اى انذار ولا اى حاجة .. وكمان صوت الماتور هادى

لما بقرص عليه بسمعه ولكن مش مزعج ابدا . . وصعب عليه وعمال افرك فيها .. قولت عاوز اسمع صوتتتتتتتتتتتتك .. بس اظاهر لسه متعودش على الصوت المصرى العالى .. هههههههههههههه

سحب العربية ممتاز ولكن
من وضع الثبات .. لما تكبس على العربية وتطلع .. مش حقول بطئية ولا سريعة .. ولكن بتاخد شوية صغنونة عقبال ما توصل الى 50 مثلا .. وبعد كدا افتح بقا .. وابقا قابلنى لو حد حصلك
وكل ده لانك وانت واقف ولما بتكبس اوى .. الاربى ام مش بينقل زى الاتوماتيك .. ده بياخد وقته لللاخر ..

بس وانت ماشى لما بتكبس على اخر الدواسة وهى ماشية مش وهى واقفة .. بتجرى وبتجمع طلقة
بس بنظام البساط السحرى بجد .. بتحس انك طاير بحنية وقوة

سواقة العربيات السى فى تى ليها طريقة مختلفة فى القيادة بصراحة .. بس بامانة ممتعة .. وسواقت السى فى تى برستيج .. وجميلة .. انا مقتنع بيها جدا .. ونفسى اغير عربيتى الى جوك او قاشقاى .. مش عشان شكل او امكانيات كماليات .. لكن عشان قيادتهم ممتعة جدا

كفاية انك وانت ماشى بتحس انك ماشى على بساط سحرى بجد

وكمان جربت نظام i-con او d mode وسوقت نورمال واقتصادى ورياضى .. فعلا ممتع ..
نورمال وانت ماشى تحس العربية ماشية برزانة .. والطبيعى .. والاقتصادى تحس ان العربية مش حقول اتكتفت منك بس تحس انها بقت راسية فى سوقتها جدا وماشية بالعقل .. عشان بتسستم نفسها عشان توفر بنزين
اما نظام الاسبورت .. جميلة وبيساعد معاك فى الجرى وفى نفس الوقت بيوفر معاك بنزين

وكمان جربت اقفل الاوفر دريف وحرقت عليه ولا تحس انك قفلته .. بجد روعة والتسارع قوى .. بس مش بتحس انك قفلته
وواضح قوة ماتور hr16 الحديث

فى قيادتى للعربية اعطيها
8/10

:: الباور ::

باور رائع ناعم وماسك نفسه ومحترم جدا .. انا بحب الباور الناعم الكهرباء بتاع نيسان
وعلى فكرة اركز كمان من التيدا
عربيتى التيدا اعطيها 7.5/10 ولكن الجوك 9/10 .. يمكن عشان الجوك جنوط 17 .. بس ناعم وماسك نفسه باتزان كويس

:: الثبات ::

روعة بجد .. ولا الدموع .. ماشية ماسكة نفسها جدا وبتلم روحها فى الغرز .. اخدت بالعقل عشان مخضش اللى معايا .. خصوصا انها مسئولية

رائعة ودخلت منحى مكنتش مهدى .. بس بالعقل .. حاسس ان العربية تقيلة فعلا

والفرامل بصراحة اسجابتها روعةةةةةةةةةةةةةةةةةة .. بتقف وبتلم روحها كويس جداااااااا وفى اقل وقت بجد وبقوة

اعطيها فى التقييم 9/10

:: الكراسى والفرش ::

رائع الفرش وتصميه .. انجليزى وعصرى فعلا وشيك .. والكراسى مريحة جداااااا

8.5/10 تقيمى ليه

:: المرايات ::

المرايات الجانبية رائعة .. بس المرايا اللى فى نص كويسة وشايف كويس .. بس لو حد قعد فى النص وراك .. انسى يا عمرو مش حتشوف منه حاجة .. لان الزجاج الخلفى صغير مش كبير
بس المرايات الجانبية كبيرة جداااا

فاعطيها 7.5/10


:: حاجات سمعتها ومش متاكد منها ::

ان لو جبت نظام النورمال الباور بتاع الدريكسيون بيكون ناعم
ولو جبت الاسبورت بيتقل حاجة بسيطة

لما جربت الملعومة دى محستش بفرق ملحوظ للامانة

بردوا موضوع vdc او الesp مكنتش عارف لما ادوس عليه واللمبة تظهر فى العدادت .. وبيكون مكتوب عليها اوف .. يبقا كدا اشتغل ولالا .. بس على العموم جربت الاتنين .. وفضلت اعوم بالعربية .. ولقيت النتيجة واحدة .. بس مكنش ينفع طبعا اعمل دريفتات على رمل وحركات .. لان العربية مسئولية طبعا .. اخ لو عربيتى كنت فركتها بجد .. نفسىى

بردوا مجرتش الكروز كنترول .. كان نفسى اجربه لكن يوم السبت باذن الله الجى معاكم


وده كان تقييمى للجوك .. واكيد يوم السبت حيكون فى لقاء بينى وبينها تانى .. ويارب يكون رابع وعاشررر

واللى حابب ينضم مع الصقور فى تجربة قيادة جماعية
ده لينك التجمع
http://www.nilemotors.net/Nile/28276...post3874237075

تحياتى للجميع
ويارب اعضاء قسم نيسان
كلهم يكون معاهم جوك

الف شكر على التقرير الرائع ده
ان شاء الله العربية هتكسر الدنيا من كتر ماهى حلوه