الموضوع: تحياتي لوزراة الصحة

النهردة ربنا اكرمني وخلصت شغلي بدري
فانا راجع البيت طلعت الدائري ومتجه للبيت خلاص
يا دوب نقلت خامس وبعد كدة لقيت العربيات بتهدي فقمت مدي فليشر وهديت لقيت الطريق وقف خالص
الطريق عمره ما بيقف في الحتة دي
فعرفت انها حادثة !
المهم بحاول استكشف ايه حصل بالظبط لحد ما لقيت عربية جامبو على الحارة الشمال خالص وفيه شكارة من الحمولة بتاعته واقعة
عربية فيرنا مدعوكة على جانب الطريق الايمن جنب السور الاسمنتي
عربية دبابة في منتصف الطريق وشها شايع
سريعا قمت معدي وراكن على جنب قدام وقلت انزل اشوف لو اقدر اقدم ليهم مساعدة ! لأني لقيت وانا ماشي ناس في الفيرنا لسة منزلوش فعرفت ان الحادثة لسة طازة فقلت احاول اساعد يعني
نزلت روحت لقيت واحد في العربية الفيرنا مش متلم على اعصابه واللي طالع عليه بيسأل هو ايه اللي حصل؟! وانا اقله انا معرفش المهم ساعدناه ينزل من العربية
المهم اتصلت بالاسعاف وبلغت عن المكان
وفي اقل من 10 دقايق لقيت عربية الاسعاف جاية طيارة بأقصى سرعة لدرجة انه عدا من جنبنا ومخدش باله من الحادث وشاورتله فركن قدام ورجع بضهره تاني
خدوا الراجل اللي كان في الفيرنا -انا شاكك ان عنده كسر في عظمة الترقوة بس طبعا مش هيبان كدة يعني
المهم قلتلهم حد اتصل بالبوليس؟! قالولي لا
قلتلهم طيب اتصلت بيهم
ونستنى في البوليس انه ييجي ! ميجيش!
وفين وفين بعد ساعة الا ربع تقريبا جه البوليس!
المهم كوصف للي حصل
العربية الجامبو شايلة مجموعة من الاشولة فشوال منهم وقع
الفيرنا جاي وراه الشوال وقع قدامه بيفادي الشوال -الجامبو والفيرنا كانوا ورا بعض على اقصى اليسار -
بيفادي الشوال وبيطلع من الجامبو من يمينه فبتاع الدبابة جاي ورا الفيرنا من على اليمين فقام شايل الفيرنا من الجانب الايمن بتاعها وخدها قدامه بعرض الطريق
الفيرنا طبعا اتنطرت وخبطت في عجلة بلدوزر على جانب الطريق الدائري محطوطة جنب السور الاسمنتي ولولا العجلة دي كانت الفيرنا نزلت من على الدائري على تحت وكانت طبعا الاضرار هتبقا اكتر !
الاضرار!
*الجامبو مفيهوش حاجة محدش جه جنبه واللي طالع عليه انا مش غلطان!
طب يا عم مش مربط حمولته ليه؟!
وليه تقف على الحارة الشمال اصلا؟!
وهو فيه نقل بيمشي في الشمال اصلا؟!
مش طريقك يمين؟!
*الفيرنا:
البابين اليمين هيتغيروا طبعا عشان مدعوكين جوا
الكونسول الداخلي متكسر
الزجاج الامامي اتشرخ كله بس متكسرش
القايم الخلفي فيه خبطة واضحة والعتب بتاعها كله في الضياع مضغوط لجوا جامد
فيها شغل كتر يعني
*الدبابة:
الاكصدام اتكسر والفوانيس الامامية والزجاج الاماني والكبوت طبعا مطبق جامد وتقريبا العربية فضت المياه بتاعتها كلها

ايا ما كان انا مبسوط جدا ان الاسعاف وصل بالسرعة دي ويارب يكون دايما سريع كدة
الشرطة طبعا محتاجة تحسن من اداءها كتير
دا لا يعني ان وزارة الصحة عندنا زي الفل بس اهو جانب واحد عجبني الحقيقة
وربنا يحمي الجميع يا رب