ادعولي وباركولي

**adham_cs** · 28-06-2012 04:46 PM

السلام عليكم ورحمة الله وبركاته
أنا روحت النهاردة لمعرض سلطان عندنا في الاسماعيلية
وبعد ما قريت كل الموضوعات بتاعت اللوجان اللي تفضلتم بيها
قررت اني اختار اللوجان على بركة الله
أنا كان معايا بيجو 206 موديل 2004
وبعد ما ركبت اللوجان في المعرض فعلا حسيت إني راكب عربية اوروبي نفس القاعدة المريحة الملوكي، نفس الإحساس، ده حتى المالتي فانكشن وازرار الزجاج زي البيجو بالضبط
العدادات جميلة ومريحة للنظر
الشنطة واسعة بجد مش واسعة بس
الكنبة الخلفية وااااااسعة، واسألوني أنا لأن البيجو كانت قارفاني في موضوع الكنبة ده
على فكرة أنا دورت العربية علشان اسمع صوت الموتور، لأن كله كان بيقول إن صوته عالي، بس أنا محستش بكده خالص لأن فعلا برضو البيجو أول ما جبتها كنت بغلط وادورها مرتين من نعومة صوت الموتور
إن شاء الله المفروض الأسبوع الجاي استلمها، بس كانت عاوز نصايحكم أعمل إيه أول ما استلمها، وإيه اللي أخد بالي منه وانا بستلم
وهاخد مع السيارة
ملحوظة أخيرة، العربية جاي معاها مفتاحين واحد بريموت والتاني من غير ريموت، إنما بصراحة شكلهم مش عاطفي، ده حتى مش مكتوب عليهم رينو ولا عليهم الشعار بتاع الشركة، البيجو كان المفتاح ريموت وكان عليه حتة أسد أسد أصلي يعني، ب برضو مش مهم أنا عندي الكتر بلوتر في المكتب وهعمل شعار رينو على قد المفتاح وهصوره وارفعلكم الصورة يمكن حد يحب يعملها
ادعولي ربنا يوفقني

اللون الاحمر مخصص للمداخلات الادارية
تم تغيير اللون والتنبيه
مشرف رينو
ب10

**ahmed_m_ashraf** · 28-06-2012 05:05 PM

ألف مبروك وربنا يباركلك فيها ويكفيك شرها

**amr.elsayed** · 29-06-2012 02:43 AM

الف مليون مبروك وربنا يعطيك خيرها وتستلم على خير ان شاء الله
واهم حاجة تتاكد من وجود كل الكتيبات سواء كتيب الضمان و الكاسيت و دليل الاستخدام بالاضافة لطفاية السجاير والولاعة وعلبة وش الكاسيت والاريال
تتاكد من وجود الكوريك وحتلاقيه مربوط فى شمال الشنطة وحتلاقى مسمار القطر فى اليمين
اتاكد ان الاستبن بنفس مقاس ونوع الكاوتش اللى راكب فى العربية وتتاكد من الاربع كاوتشات انهم زى بعض
وطبعا تركب العربية وتجرب الكاسيت بسى دى وكل الانوار وارتفاع وانخفاض النور وتفتح درج التابلوه وتشوف النور شغال فيه وتجرب السنتر
بالاضافة تاخد نظرة فاحصة على التابلوه والسقف من جوه واتاكد ان مافيش اى مشكلة فيهم واتاكد ان السماعات الاربعة شغالين تمام
بالاضافة لسخان الزجاج الخلفى وتجرب المرايات الكهربة والاربع زجاج الكهربة
يفضل تشيل اللزق الابيض من على الكبوت والشنطة علشان لو لا قدر الله فيه اى حاجة مستخبية تبان
افتح كبوت العربية وخد نظرة فاحصة على بطارية العربية وحتلاقى ختم رينو عليها بالاضافة انك تكشف على كل سوائل العربية
سواء زيت او ماية الريدايتير (بين المين والماكس)
......................
لو لاقيت اى ملحوظة بسيطة وليها حل يعنى مثلا كتيب الضمان مش موجود او الولاعة على سبيل المثال
تخلى مندوب المعرض يكتب لك اى ملحوظة ليك فى ظهر ايصال الاستلام ويختملك عليه بختم المعرض
بحيث تستلم اى حاجة ناقصة فى اول صيانة بسهولة ويسر
اول ما تخرج من المعرض فول اول تفويلة للوجى واظبط ضغط الكاوتش علشان غالبا بيكون على 40 لزوم التخزين
.............
والف مبروك يا استاذ ادهم و يا رب تكون وش السعد عليك ويا ريت تبقى تعملنا موضوع قول فيه رايك عن العربية
بحرية وبحيادية ولاحظت ايه من مميزات وعيوب وتستلم على خير ان شاء الله