الموضوع: تجربتى مع صنى الجديدة test drive

السلام عليكم ورحمة الله وبركاته

النهاره عملت test drive للصنى الجديدة عند السبع اتوموتيف اللى فى المعادى ،، وسوف اكتب ملاحظاتى المتواضعة مع العلو انى حاليا معايا نوبيرا مانيوال موديل 1999

ركبت العربية ومان معايا مندوب المعرض وكان شخص محترم ومرحب لدرجة انه شغل التكييف قبل ما نطلع بالعربية اساسا،،، على العموم طلعنا بالعربية وانا فى العموم سواقتى هادية وبحب احافظ على حاجتى يعنى ( باركينج اند كلييننج)ههههههههههههههه ،،

اولا العفشه : هى فى مجملها ناعم وجميله ولايجد بها اى مشاكل فى المطبات سواء الصناعية او الحفر واعتقد انهم حسنواا الموضوع ده عن الشكل القديم رغم ان لما كان فى حد اعرفه معاه الصنى القديمة والعفشة بترزع شوية كنا بناخد الموضوع بضحك ومكنتش حاسس بمشكلة عموما الجديدة ناعمة ومافيهاش نفس المشاكل القديمة وده برضو كان كلام المندوب

ثانيا الصالون: العربية يا جماعة التنجيد ظريف والجلوس نفسه تحس انك راكب عربيه عالية زى الماتريكس مثلا وكنت حاسس انى اعلى من العربيات اللى حواليا ،،،، زوايا القيادة جميلة وتتيح رؤيه جيده والمرايات الجانبية جيدة وتكفى بالغرض ومش صغيرة كما يقول البعض وكانت كافية جدا بالنسبه لى وحاولوا يا جماعه دايما يكون الحكم فيه فرصة للمستمع لتكوين فكرته الخاصة فالمقبول بالنسبة لى هو مرفوض تماما بالنسبة للبعض فهى عمليه نسبيه وانصح المترددين دائما باخذ تجربة قريبة من المطلوب وتكوين فكرة شخصيه
بالنسبة للكنبة الخلفية يا جماعة اختراااااااع بصراحة هما عكسوا الوضع كليا عما كان عليه الحال فى الصنى القديمة وكانه تحدى واضح برساله من نيسان تقول انها تستطيع عمل المطلوب اذا اراد العميل والمساحة مانت ممتازة بالنسبة للى كان راكب معايا فى الكنبة الخلفية وكمان انا كنت لسة محتاج اطلع للامام عشان اطول الدواسه كويس ، اما بالنسبه للمساحة العرضية فهى عادية يعنى اتنين وراا يقعدوا ويستربعوا ولو تلاته ممكن تبقى مزنقه شويه رغم انى عارف ان حكاية الوسع فى الطول هتعادل حكاية العرض العادى


بالنسبة للتابلوه والخامات الخاصه بالابواب والفرش انا يمكن كانت مش عاجبانى فى الاول بس لما ركبت حسيت بصراحه انها عمليه ومش بشعه مع الاخذ فى العتبار سهوله تنظيفها ومع ان التابلوه فى تصميمه مش فخم بس انا حسيت انه كفايه كده ومش محتاج اكتر والتقفيل جيد ومفيش حاجه جرحت النظر بل ان الموضوع معايا تحول فى النهاية الى اعجاب ! وخصوصا لما شفت الفرش الفاتح البيج منها حبيت العربية اكتر وحسيت انه كمان مبهج وقيًم ،، اما مروحة التكييف الخلفية فهى فقط لتوزيع هواء جيد داخل الصالون ونقل الهواء البارد من الامام للخلف ويوجد فى المنتصف فى الكنبة المسند ذو حامل للاكواب

بالنسبة للشنطة بصراحة اول ما فتحتها ما شاء الله كنت عايز انام جواها هههههههه عشان واسعة ومرحبة ومش هقول اكتر من كده

ثالثا القيادة: العربية ناعمة وسلسة وفعلا مفيش احساس بين النقلات بس حصل حاجه انا مش عارف ايه تفسيرها ، انا كنت سايق هادى وبعدين حبيت ازود حسيت ان فى تاخيىر وتكتيف شويه فانا عينى راحت على الفتيس ليكون على حاجة تانية غير ال D وفى نفس الوقت المندوب اللى معايا حس بيها وايده وعينه راحت على الفتيس برده بس كان الموضوع انتهى فى حوالى ثانيتين فيمكن عشان انا كنت خايف شوية من العربية ومكنتش بدوس على البنزين كويس ودماغى كانت مشغوله باكتر من حاجه ،،، عاما العربية كانت عايزه تجرى وانا كنت بحاول اهدى لانى مش اخد على الاتوماتيك اساسا

رابعا الملاحظات: كنت قريت بعض الناس بتسال اذا كان فى مؤشر حرارة ولا لاء فهو لايوجد مؤشر للحرارة بل لمبة فقط تضئ فى حالات الطوارئ انا شايف ان ده اكيد مالوش دعوه بالتوفير وكمان محدش شرح الموتور والتقنية دى كويس عشان نحكم بمدى احتياج هذه العربية للمقاييس القديمة واعتقد ان العربيات الجديدة هيبقى فيها الموضوع ده

بالنسبه لعزل الابواب وكان فى ناس بتقول عليه انه مش جيد بردو انا هرجع واقول ان الموضوع نسبى وحكاية تسخير الهندسة التكنولوجية وايجاد بدائل للخامات ان كان لارتفاع الاسعار او الاعتمادية او حتى ندرتها او صعوبة التخلص منها واعادة التدوير والكلام الكبير ده ،، فانا ما حسيتش بمشاكل او مشكله فى سماع الصوت الخارجى ويمكن كمان عشان المندوب كان معلى التكييف على 3 فكان الصوت عالى ومش سامع حاجه بره وبالمناسبه التكييف كان جيد

بالنسبة للكاوتش مش شايفة ردئ ومثلا لا يختلف عن الالانترا القديمة Optimo كثيرا

بالنسبه لاماكن التخزين فهى جيده ولم اشعر بمشكله او احتياج لاماكن اكبر خصوصا وان درج التابلوه عميق وبردو مش هقارن لان الموضوع نسبى

الشماسة الخاصة بالسائق هى التى تحتوى على المرايا وليس التى بجانب السائق

يوجد كومبيوتر رحلات لحساب معدلات استهلاك البنزين والى اخره .....
ا
خيرا انا عايز افكر معكم بصوت عالى ايه المتاح فى اى عربية تانية بالحالة دى يعنى :: ماركة معروفة- كماليات 2 اير باج ،ABS ،EBD،BA - ايموبليزر-انذار مع مفتاح العربية - صالون اقتصادى بمساحة واسعة - استهلاك بنزين اقتصادى- سعر مناسب

عموما ده تقريرى عن العربية النهاردة بعد ما جربتها ومحتاج اسمع مناقشاتكم وارائكم قبل ما اروح احجز ان شاء الله وعلى فكرة انت دلوقتى بتحجز ولاستلام بعد شهرين !! شكراا وفى انتظار الردود

شكرا علي التقرير