استلمت الصنى سبحان الله..والى كل الحاجزين اصبرو وصابرو ورابطو

**zambarota** · 15-08-2012 09:17 PM

بدايه كل عام وانت بخير بمناسبه عيد الفطر

اشكر كل من هو قائم على قسم نيسان المحترميين

انا كنت صاحب موضوع لغيت حجز الصنى

طبعا انا بعد لما لغيت الحجز فرع الشركه الى فى القاهره والناس اهتمو جدا بالموضوع بعد لما عرفو انى لغيت وبجد بجد استلمت بعد اقل من ١٠ ايام بعد اتصالهم

بالرغم من انى قمت بعد الغاء الحجز برفع شكوى الى نيسان ولكن اكتشفت انهم جهه رفع شكاوى وليس حل

انا استلمت بالرغم من انى كنت رقم ٤ فة لسته الحجز

ملاحظاتى الايجابيه على السياره

السياره واسعه جدا

التكييف ممتاز

السحب ممتاز

الثبات انا فى يومين سافرت بيها وعملت ٥٠٠ كم بصراحه حاجه جميله جدا وجريت بسرعه ١٦٠ لفتره بسيطه

العزل جميل جدا

ابعاد السياره جيده من السهل انك تتعود عليها

بالنسبه انا بقى شديت مع هيونداى ار بى والله صاحب العربيه الهيونداى هو الى ابتدي الشد بس انا مكنتش عايز اشد

احنا كنا ماشيين الاول بنفس السرعه انا دوست وعديته حسييت انى راكب عربيه محترمه

اضاءه العربيه فى الطرق الصحراويه بالييل ممتازه تقدر تشوف كويس وتغطي الطريق

الفرامل بسم الله ماشاء الله حاجه تقدر تلحقك وتثق فيها

بالنسبه بقى للملاحظات السلبيه

الكاوتش الماكسيس بصراحه هى حاجه ممكن نتلافاها

الخامات البلاستيك فى المقصوره الداخليه تحس انها متوسطه

يعنى عايز اقول ان العربيه صفقه رابحه مقابل السعر

انا لحد دلوقتى مستلمتش منهم الضمان مش عارف حاسس ان الوكيل ضيع الضمان

فى حاجه عايز اسأل عليها

انا فى كمان يومين ممكن اعمل الف كيلو وطبعا فى العيد مش هاعرف اعمل صيانه الاف فمش عارف ايه الحل

لانى ممكن اعدي الاف كيلو كمان ياترى ايه الحل

وكمان ممكن اعمل ايه لو الوكيل ضيع الضمان

**S O P H O S** · 15-08-2012 09:28 PM

الف مبروك يا باشا
ربنا يباركلك فيها ..

**toty_305** · 15-08-2012 09:33 PM

-1000 مبروك
-ربنا يديك خيرها و يكفيك شرها
-بلاش تشد مع ال RB تاني عشان الشد يبوظ الموتور و ال accent شديده على الصني

**Dr_MaTrix** · 15-08-2012 09:34 PM

الف بركة يا باشا على العربية وعقبالنا يا رب كان نفسى فعلا استلم قبل العيد بس خير ان شاء الله............ ربنا يبارك لك فيها ويكفيك شرها :)

**Youssef.Awad** · 15-08-2012 09:36 PM

100000000000000000 مبرووووووووووووووك يا باشا ع الاستلام وانضمامك رسميا مع سبق الاصرار والترصد لقسمنا المميز

نصيحة .. بلاش جرى وشد فى اول عمر العربية حتى وان اثبتت كفاءة (160 يا مفترى فى اول 500 كم)
بالنسبة للضمان .. طالما رخصت وعلقت النمر اتصل ب16244 وفعل الضمان والمفروض تستلم دفتر الضمان من المعرض اللى استلمت منه بعد تسجيل بياناتك ورخصة العربية
بالنسبة لصيانة الالف .. عشان ظروف العيد وزحمة الحجوزات والشغل اليومين دول ممكن تمشى عادى جدا ولكن دون قرص ع الموتور ومعاك لحد 2000 كم كحد اقصى وتعمل الصيانة على خير بعد العيد
وكل سنة وانت طيب .. واكيد العيد السنة دى مختلف مع الصنى

**Ahmed.TV** · 15-08-2012 10:06 PM

تقرير مميز .. والف مليون مبروك .. وربنا يعطيك خيرها ويكفيك شر الطريق
بنتشرف بوجودك معانا دايما ..

الضمان لو حضرتك مستلم من الوكيل .. ممكن يكون مخلى لما حضرتك تروح مركز الصيانة وتستلم من هناك
بس ياريت تتاكد من الكلام ده

وكدا كدا لازم تتصل بنيسان وتفعل الضمان .. وحتعطيهم بيانات العربية رقم شاسيه ورقم موتور

وبلاش الجرى العنيف ده والعربية بتليين .. العربية بسم الله ماشاء الله تجميعها قوى .. وكنا جربنا نجرى بيها 180 على التالت وكان تجميعها قوى

ربنا يباركلك فيها

وكل سنة وانت طيب

**zambarota** · 15-08-2012 10:10 PM

المشاركة الأصلية كتبت بواسطة dr_matrix

الف بركة يا باشا على العربية وعقبالنا يا رب كان نفسى فعلا استلم قبل العيد بس خير ان شاء الله............ ربنا يبارك لك فيها ويكفيك شرها :)

ربنا يبارك فيك

ان شاء الله تستلمها على خير متستعجلش

واحد صاحبى قالى ان العربيه دي زي الجواز قسمه ونصيب

**zambarota** · 15-08-2012 10:16 PM

المشاركة الأصلية كتبت بواسطة youssef.awad

100000000000000000 مبرووووووووووووووك يا باشا ع الاستلام وانضمامك رسميا مع سبق الاصرار والترصد لقسمنا المميز

نصيحة .. بلاش جرى وشد فى اول عمر العربية حتى وان اثبتت كفاءة (160 يا مفترى فى اول 500 كم)
بالنسبة للضمان .. طالما رخصت وعلقت النمر اتصل ب16244 وفعل الضمان والمفروض تستلم دفتر الضمان من المعرض اللى استلمت منه بعد تسجيل بياناتك ورخصة العربية
بالنسبة لصيانة الالف .. عشان ظروف العيد وزحمة الحجوزات والشغل اليومين دول ممكن تمشى عادى جدا ولكن دون قرص ع الموتور ومعاك لحد 2000 كم كحد اقصى وتعمل الصيانة على خير بعد العيد
وكل سنة وانت طيب .. واكيد العيد السنة دى مختلف مع الصنى

اولا الله يبارك فيك

انا مبسوط جدا بقسم نيسان المتميز

انا شغلت التكييف على مراحل لان كان فى اليومين الى فاتو كانو حر جدا

انا شديت لفتره قصيره جدا لكن انا المعدل الطبيعي ما بين ٦٠ كم الى ١٢٠ اقصى حد لفتره محدده

موضوع صيانه الاف دي عاملالى مشكله لانى مسافر اسكندريه وحاسس انى هاعدي الاف بشويه حلوين يعنى اكيد مفيش مشكله انى اوصل لحد الفين كدا ولا انت رايك اغير زيت بره انا بس عايز النصيحه مش اكتر

وكمان انا كل ما بسأل على الضمان من الوكيل يقولى انا بدور عليه مش عارف حاسس انه ضاع ولو ضاع اعمل ايه

وكمان انا لسه مفعلتش الضمان

اخير كل سنه وانت طيب وربنا يبارك فيك واكيد العيد مختلف مع صنى