الموضوع: مقارنة بين ياريس 2007 ونيو أكسينت 2009

ايه ياجماعه مافيش ولا رد حتى الآن
دا نايل موتورز يا جماعه مش منتدى هالاهوئه

المشاركة الأصلية كتبت بواسطة amrelsaqqa

العربيتين كويسين جدا
الياريس هتكون اوسع وتوفير اكتر في البنزين ( موتور 1300 بتكنولوجيا تويوتا ) ، عفشة هتبقى انعم بكتير من النيو اكسينت
وكمان بما انها يابانى يبقى تستحمل على المدى البعيد اكتر من النيو اكسينت وده لا ينفى تماما ان النيو اكسينت ممتازة وخصوصا الموديل ده
النيو اكسينت فيها ميزة ان صاجها ما شاء الله قوى جدا ، كأنها مش عربية كورى خالص ، بل تتفوق على بعض من اليابانى، بس ما اقدرش اقارنها بالياريس اوى ..

واولا واخيرا انت بتشوف حالة يعنى ممكن ياريس متهانة قصاد نيو اكسينت نضيفة ، او العكس ، فطبعا تركز على حالة العربية اللى قدامك .

جزاك الله خيرا على الرد
بس والله أنا فعلا محتااااااااار جدا في الموضوع ده يعني أنا لو معايا وفر كنت جيبت الاتنين ههههههه
بس بالنسبة لموضوع الصاج ده، تقصد إن صاج الياريس ضعيف ولا دي نقطة تميز في أكسنت عن كل العربيات

لأن فعلا فيه ناس بتتكلم على ضعف صاج وبوية ياريس ودي حاجه صراحه مضيقاني جدا لأن أنا فكرتي عن الياباني غير كده

بشكر الجميع على حسن التعاون والإجابات المفيدة الوافية وإن شاء الله بقي شيئين:

-1 بالنسبة للباور الكهربا هل فيه مشاكل في الياريس زي ما ظهر في الأكسنت 2006 و 2007 ؟؟
-2 والأمر الثاني أنا إن شاء الله نويت واستخرت على ياريس فادعوا لي، ولما أجيب إن شاء الله هابلغكم باللي أنا لمسته فعلا مع السيارة وربنا يكرمني في واحده حالتها حلوه وصاحبها يكون صادق ..

السلام عليكم ورحمة الله وبركاته

أولا: أنا صدعتكم بسبب شرائي للسيارة فبشكركم جميعا على حسن تعاونكم معي بالإجابات المفيدة لأنها وضحت لي حاجات كتيره.

ثانيا: أنا ربنا وفقني في شراء نيو أكسنت 2010 عداد 55000 ومن سوق السيارات بمدينة نصر ومش متهانه خالص من جوه بالذات، والمكنة ماشاء الله مالهاش حل في الجري، أنا بتخض منها لأن قبل كده كان معي 1300 وأوتوماتيك .. وأول مره أسوق 1600 فما بالك لما يكون نيو أكسنت و 2010 وسمراء كمان هههههه

ثالثا: وده الأهم، ليه أنا فضلت النيو أكسنت عن الياريس بعد المعاينة الفعلية، رغم إنها كانت رقم واحد لما كنت رايح أشتري وأغلب الناس قالت لي الياريس أفضل ::

- أولا لا اعتراض عندي أبدا على الياباني بس خبير السيارات اللي كان معي في الشراء مانصحنيش بيها خالص رغم إنه معاه كورولا 2002 بسبب (قطع الغيار غير متوفره بالشكل المرضي واستيرادها قليل وكمان السعر غالي (هو كان شغال لفترة قريبة في البهي بتاع قطع الغيار في طنطا) - الضعف الخارجي وغيره)

- الضعف الواضح في الاكصدامات والصاج صراحة مستفز ويضايق إن عربية ياباني محترمة زي كده وتكون ضعيفه من بره

- حوض العربية غير إنه ضيق وتحس إن الحاجة اللي فيه داخلة على الطابلوه شويه إلا إني مش عاجبني رصة ولا هندام محتوى الحوض (دي حاجه نفسيه عندي لازم الحوض يكون شكله منظم والدنيا واضحه) ، وكمان المكنه ساقطه أوي لتحت وده بيضايق الصنايعيه

- حسيت إن فرق المساحة الداخلية مش كبير بين النيو أكسنت والياريس لكن الجودة والراحة الداخلية الياريس تكسب بدون نقاش

- مالقيتش مانيوال فول أوبشن حالة كويسه لكن الأوتوماتيك كان فيه حاجات كويسه بس طبعا سعرها عالي على اللي كان معي

- الكابود بتاع الياريس إنه ميله كبير كده مع ضعف الاكصدام صراحه يخليك تخاف لأنك مش شايفه ومعرض للخبط على الأقل في أول كام يوم كده

- بالنسبة للأكسنت الحالة العامة طبعا أفضل وإن كان المعروض منها قليل جدا في السوق يعني حوالي 10 أو 11 فقط ودي نقطه في صالح النيو أكسنت

- أكسنت صاج فعلا محمل لدرجة تحس إنه قريب من الياباني

- أكسنت كشكل أشيك بكتير من جوه والتابلوه لا كبير ولا صغير

- الياريس جوده أفضل بنسبة كبيره من الداخل عن الأكسنت لكن التقفيل في الاتنين تمام

هذا ماتيسر أن أذكره لكم جزاءا لمساعدتكم لي
وأي استفسار أنا موجود وتحت أمركم

أخيرا ادعوا لي بالبركه وأن يكفيني الله شرها