تحية خاصة إلى جهاز حماية المستهلك

**melsheshtawy** · 26-11-2012 03:56 PM

إخوانى الأعزاء
موضوعى النهاردة هو إستكمال للموضوع إللى كتبته قبل كده عن تقرير صيانة ال20 ألف فى مركز القطامية .. الحقيقة إنى بعد ما رجعت من هناك وكتبت الموضوع قررت أراسل جهاز جماية المستهلك ولأنى معرفش عنه أى حاجة دخلت على الموقع بتاعهم على النت وبعتلهم إيميل إستفسار عن كيفية تقديم شكوى لحماية المستهلك وسكت والكلام ده كان يوم الأحد صباحا .. التوكيل كلمنى بعد ما قرأوا الموضوع وقالولى تعالى نحل الموضوع والذى منه الكلام ده كان يوم الأثنين وكتبته فى مشاركاتى فى الموضوع السابق المفاجأة هنا إن يوم الثلاثاء إتصل بيا واحد محترم جدا وقالى إحنا جهاز حماية المستهلك وحضرتك بعدت إيميل إيه الموضوع حكيتله إللى حصل وقالى إبعتلى صورة الرخصة والضمان وفواتير الصيانة ومحضر إستلام السيارة وبينى وبينكم لما كان التوكيل كلمنى قلت نشوف الشكل الودى هيبقى شكله إيه وسكت على كده ومبعتش حاجة ... يوم الأربعاء من الإسبوع التالى كلمنى شخص من رقم آخر وقالى إحنا جهاز حماية المستهلك وحضرتك كنت عامل شكوى بخصوص شركة كذا قلتله أيوه قالى حضرتك مبعتش الورق المطلوب .. حكيتله إن التوكيل إتصل بيا وأنا هاخد الطريق الودى لحد ما شوف هيوصلنى لفين وبعد كده لو مخدتش حقى كنت هكمل الشكوى قالى طب معلش مينفعش يفضل الملف مفتوح إبعت تنازل عن الشكوى وبعدين لو مخدتش حقك ممكن تقدم شكوى تانية وترفق بيها رقم الشكوى الأولى وطبعا أنا أصلا مكنتش أعرف رقم الشكوى الأولى قلتله هى رقمها كام راح ممليهولى وقالى هستنى الفاكس دلوقتى .. بصراحة حسيت إنى مندهش وفعلا بعتله الفاكس وكلمت التوكيل خدت معاد يوم السبت الماضى بعد ماكنت ناوى متعاملش معاه تانى (بس أتكسفت لما حد بيدولى على حقى وأنا مستسهل أسيبه) ورحت عملت اللازم بعيدا عن تفاصيل اليوم لأنها كانت مش كويسه كالعادة بإستثناء أشخاص محترمين معروفين بالأسم وأخص منهم الآنسه داليا (ممكن أبقى أكتب تفاصيلة فى تقرير تانى عشان مطولش عليكوا) .. طلعت من التجربة دى إن مجرد إيميل حرك الموضوع دون الذهاب إلى هناك ولا تظبيط ناس ولا واسطة ولا أى حاجة خالص زى ما ناس كتير معتقدة وحبيت أنقل التجربة لأن فى التعليق على الموضوع بتاعى كان ناس كتير محبطة وبتقول جهاز حماية المستهلك مش هيعملك أى حاجة .. لكن الإهتمام البالغ إللى شفته كان بجد تجربة تستحق المشاركة والشكر على الملأ

**beshomilan** · 26-11-2012 05:23 PM

يااااااااااه دانا كنت لسه هعملها فى موبينيل..يس قلت ولا هيعملوا حاجه

**Mohab.Nabil** · 26-11-2012 05:39 PM

الحمد لله ان لسه فيه ناس بتشتغل و بتراعى ضميرها فى البلد ديه

و ان شاء الله مشكلتك تتحل قريب

**Mohyeldin1974** · 26-11-2012 05:55 PM

ان شاء الله فى امل طول مافى ناس كده

**haissam24h** · 26-11-2012 06:09 PM

ده العادى من الجهاز لان الصراحه من سنه 2010 جربتهم فى الموبيل وكان التوكيل معطلنى ويقولى الموبيل لسه مجاش والبت بتتنك عليه وتتكلمنى بطريقه مش كويسه قومت هزقتها وقولتها وحياه امك لاخليكو تتحايلو عليه عشان اخده قامت قالى ان شاء الله ابقى قابلنى وطبعا التوكيل كان توكيل موبيل ال جى الى الصراحه تليفون محترم
قومت بعت اميل للجهاز بصورة الفاتورة من موبيل شوب وبعت ايضا صورة التوكيل ومعاد الاستلام ومخالفه معاد الاستلام
مفيش 3 ساعات خرجت من الامتاحن كان اخر يوم فى الجامعه الله يعودها ايام هههههههههههه

لقيت الجهاز بيكلمنى كذا وكذا وده رقم الشكوى وكل ورقك فعلا مظبوط وحكتلهم على الى حصل معايا

وان الموبيل مش عدى عليه 3 ايام وفيه عيب تصنيع ومتاخرين عليه فى الاسبتدال
قالى تمام وقفل
تانى يوم
لقيت مدير التوكيل بيتصل بيه بيقولى حضرتك ايه الى مزعلك قولته موظفه زباله عندكم مبتعرفش تتكلم معا العملاء ولا عارفه حاجه وحكلته الى حصل قالى طب حضرتك الساعه 3 الموبيل هيكون موجود فى الفرح تقدر تستلمه واحنا ماتسفين وتقدر تسحب الشكوى الى متقدمه فى الجهاز قولته انا مش تحت امرك ومش فاضى ههههههه عرضتها شويه عليه وقالى احنا بنتاسف واحنا باعتين لحضرتك هديه تعويض للتاخير قولته بردك الاسف مواعيدى مش سامعه قالى طب اقرب مكان ليك فيه قولته فيصل قالى هنبعتلك التليفون على العنوان
فعلا لقيت الساعه 7 واحد بيتصل وبيقلى انا منتظر حضرتك تحت العمارة قولته اتفضل طلع مندوب من التوكيل وجايبلى الموبيل الجديد وسماعه هديه وورقه صيانه 5 شهور اضافيه بعد الضمان
قولته شكرا وقمت بعت اميل بسحب الشكوى وتاكيد معاهم على الى حصل واستلام الموبيل
وتانى يوم اتصلو بيه عشان تاكيد كنسله الشكوى
الحمد الله
لسه فى حاجه كويسه فى مصر
ده كانت تجربتى الوحديه وان شاء الله مستنى التجربه التانيه معا توكيل غبور عشان اعلمهم الادب فى عربيتى القادمه