قواعد الفتيس

**nice_bird** · 05-01-2013 07:54 PM

السلام عليكم :-

انا معايا لانسر 1600 اوتو وكنت بشتكي من فترة من صوت غريب في العربية وبحس تخبيط تحت رجلي الشمال ووديتها لميكانيكي قعد يبص فيها شمال يمين المهم قالي قواعد موتور وهاتهم اصليين والتايلاندي والتايواني بيبوظ بسرعة رحت جبتهم وركبهملي المهم الصوت مظهرش سعتها وروحت البيت ركنت حوالي اسبوع كدا وجيت اطلع بيها تاني لقيت الصوت رجع تاني روحت لميكانيكي تاني و شافها قالي لا قواعد الفتيس هيا اللي بايظة مش الموتور بس كدا كدا تغير قاعدة الموتور افضل مع العلم انو مبصش في العربية مجرد ركب وادي الدي وسمع الصوت وادي الار وسمع وقالي علي طول قواعد موتور وانا خايف اجيبهم واغيرهم تطلع حاجة تاني وكنت عايز ازاي اكشف عليهم بنفسي (طالما الميكانيكية مكسلة واسهل حاجة غير وادفع ) وعايز اعرف سعرهم !

**M.Al-Hefnawy** · 05-01-2013 09:11 PM

ممكن توصف صوت التخبيط ده بيجي أمته؟

**nice_bird** · 05-01-2013 09:53 PM

لما العربية تكون باردة الصبح بدري بيبقي واضح اوي عالسلانسية وبيزداد مع الدي والفرامل او الار والفرامل وبحس بحاجة بتخبط او بتركرك قدام وكنت بنزل افتح الكبوت وابص عليها مش بلاقي اي جاحو بتتحرك بس الصوت بيعلي اوي ناحية العجلة الشمال وخاصة لو حطيت ودني عند السوستة بحس الصوت من ورا الكرتيرة البلاستيك.

**eldell** · 06-01-2013 12:02 AM

المشاركة الأصلية كتبت بواسطة nice_bird

لما العربية تكون باردة الصبح بدري بيبقي واضح اوي عالسلانسية وبيزداد مع الدي والفرامل او الار والفرامل وبحس بحاجة بتخبط او بتركرك قدام وكنت بنزل افتح الكبوت وابص عليها مش بلاقي اي جاحو بتتحرك بس الصوت بيعلي اوي ناحية العجلة الشمال وخاصة لو حطيت ودني عند السوستة بحس الصوت من ورا الكرتيرة البلاستيك.

باشا ده قواعد ماتووور وهتلاقى الاستاذ الى كب القواعد عندك مربطهاش عدل روح لميكانيكى عدل وقوله يبصلك على القواعد نفس الموضوع ده حصل مع صاحبى بس ياريت تقولنا انت اشتريت القواعد بكام علشان انا غالبا عندى قاعده تعبانه

**nice_bird** · 06-01-2013 07:52 PM

المشاركة الأصلية كتبت بواسطة eldell

باشا ده قواعد ماتووور وهتلاقى الاستاذ الى كب القواعد عندك مربطهاش عدل روح لميكانيكى عدل وقوله يبصلك على القواعد نفس الموضوع ده حصل مع صاحبى بس ياريت تقولنا انت اشتريت القواعد بكام علشان انا غالبا عندى قاعده تعبانه

انا غيرت القاعدة الجمل ب 350 الاصلية

**nabil.maher** · 14-01-2014 02:06 PM

كل سنه وانتو طيبين
انا معايا لانسر 1300 2008 اتوماتيك وعندى نفس الصوت ده تحس انه جاى من ناحيه الفتيس ناحيه العجله الشمال بس بيروح بعد شويه وبظهر جدا فى اول دواره ياترى لما غيرت القواعد الصوت راح ولا دى ممكن تكون حاجه تانى الله لا يقدر لانى بصراحه خايف لحسن تطلع حاجه فى الفتيس مع العلم انا العربيه بتنقل كويس وبتسحب كويس

**abogoda** · 14-01-2014 07:37 PM

المشاركة الأصلية كتبت بواسطة nabil.maher

كل سنه وانتو طيبين
انا معايا لانسر 1300 2008 اتوماتيك وعندى نفس الصوت ده تحس انه جاى من ناحيه الفتيس ناحيه العجله الشمال بس بيروح بعد شويه وبظهر جدا فى اول دواره ياترى لما غيرت القواعد الصوت راح ولا دى ممكن تكون حاجه تانى الله لا يقدر لانى بصراحه خايف لحسن تطلع حاجه فى الفتيس مع العلم انا العربيه بتنقل كويس وبتسحب كويس

القواعد مابتأثرش علي السحب هي معملوله عشان تقلل اهتزازات الموتور ولما الكاوتش بتاعها بيتقطع بتسمع صوت تخبيط خصوصأ عند دوارة العربيه بتلاقي هزه جامده

**halika76** · 21-01-2014 05:44 AM

السلام عليكم ... أنا كنت رايح للبتاع الشكمانات أشتكى من صوت العربية عالى شوية وشاكك فى الشوكمان لانسر 2008 أتوا 1300 سي سي قالى قواعد الموتور بايظة ومع النقل بيتحرك الموتور وبالتالى فيه جوان بتاع الفرن بيعالى الصوت وقالى روح لميكانيكى ....

روحت وبقى يطلب تغيير نقلة الفتيس وبلاقى فعلا الموتور بيتحرك للأمام والخلف مع نقل الفتيس ... وحلينا القاعده الأمامية والخلفية إللى إسمها الجمل .. ولاقيتهم فعلاً متقطاعين بتوع الفابريكا ... روحت جبتهم تايلاندى الأمامية 50 جنية والخلفية جبت الجلبه فقط ب 70 جنية وركبتها على الجمل الأصلى إللى كان فى العربية فى المخرطة ب15 جنية ومصنعية تركيب 100 جنية ...

المهم فعلا المكنة مش بتتحرك مع نقلة الفتيس ... بس لماروحت ونزلت تانى بقيت بسمع صوت عند دوارة العربية
مكنتش موجوده حتى والقواعد الأصلية المتقطعه راكبه ... وصوت الموتور لسه عالى أساس شكوتى من الأول

إيه بقى إللى حصل مش فاهم يا جدعان ... مفيش حاجه فابريكا بتتحل من العربية وبترجع زى ما كانت فى البلد دى :(

**Dawns_Mist** · 21-01-2014 10:57 AM

صوت الخبطه اللي بيجي تحت رجليك الشمال على الفرامل مع السلانسيه أو مع تدوير العربية غالبا بيمون فعلا قواعد موتور و قاعدة الجمل اللي هي بين الموتور و الفيتيس .... و الصوت بيكون أوضح و العربية بارده علشان اهتزازة الموتور و هي بارد بتكون أقوى من اهتزازته و هو سخن .

مش عارف بقى ده عيب تصنيع في البومه ولا إيه .. بس غالبا قواعد الموتو و الفيتيس مش بيعمروا كتير في كل الموديلات ..
طبعا الأصلي أفضل بكتير من التايواني .. و بتعمر أفضل .. لكن مع طرق مصر برضه هتبوظ بعد 30000 كيلو ولا حاجة بالكتير .. طبعا برضه بتفرق في طبيعة السواقة و الأماكن اللي بتروح فيها لإن القواعد دي كل مهمتها هي امتصاص الصدمات من الموتور و الفيتيس و تقيليل وصول اهتزازات الموتور و الفيتيس للكابينه ..
مشكلة القواعد الاتنين دول في البومه إنهم متركبين على القنطرة اللي بتكون متعلقة بين صدر العربية و الشاسيه بين العجلتين الأماميين ... وده هيخلي أي عربية بومه يكون فيها عيب في الشاسيه في الأبعاد بسبب أي خبطه أو حادثة خفيفة تأثر على أبعاد القنطره و بالتالي هتأثر على القواعد ، و بالتالي هتبوظ بسرعه .. فالأولى إنك تكشف على الشاسيه كمبيوتر الأول علشان تطمن إن أبعاده مظبوطه تمام زي المصنع ( الطرق في مصر لوحدها بدون حوادث كفيلة إنها تعمل عيوب في أبعاد الشاسيه ) عايز أقولك إنك لو عندك 0.5 سم متغير في ابعاد الشاسيه من تحت ده بيأثر سلبيا على العفشة كلها و القواعد كلها و كمان الثبات و الزوايا و الكاوتش ( طبعا تأثير بسيط بس مع الوقت و الجري هيخلي عمر قطع الغيار يكون قليل ) بعد مانطمن الأول إن القنطره دي أبعادها في مكانها الطبيعي و كلها تمام من تحت الشاسيه لازم تجيب قواعد أصلية الجمل بتعمل تقريبا 300 جنيه و الموتور بتعمل تقريبا 150 .... برضه فيه معلومه مهمة لو قاعدة الموتور أو الجمل اتقطعت لازم التانيه تتقطع و تبوظ بعدها بشوية بنفس المبدأ اللي شرحناه من شوية .

مشاكل القواعد في البومة و الهوندا متكرره و أغلب الناس بتشتكي منها فماتقلقش ( كلنا نفس الرجل يا أخي العزيز ) بإذن الله لو كشفت على الشاسيه الأول بـ 100 جنيه كمبيوتر عند أي مركز صيانة محترم ولو اكتشفت أي خلل عدلته سمكره و ركبت قواعد أصلية هتحس بفرق كبير في العربية بإذن الله في المشي و هتعيش معاك أفضل.