الموضوع: تـقـريـر مـصـور : رجـلاش دواسـة بـنزيـن سـوزوكـي الـتـو

بسم الله الرحمن الرحيم
السلام عليكم و رحمة الله و بركاته

موضوعنا انهاردة عن رجلاش دواسة البنزين في سوزوكي التو

والموضوع ده ممكن نعمله في اي عربية واير
مش كهربا احسن العربيات ذات بوابة كهربا بيوجعوا بطننا من أقل حاجة ههههههههه

هيجي سؤال من اولها انا عارف اعمل رجلاش ليه و امتي و ازاي و فين و مين و ماذا و لماذا ؟؟

اول ما تجيب العربية بتحس ان العربية من تكة بنزين عايزة تطير زي الصاروخ لكن مع مرور الوقت و السنين هتلاقي دواسة البنزين لازم تدوس عليها اكتر من الأول عشان تطلع او عشان تلقط زي العربية القديمة و تحس ان العربية مش فايقة زي الأول و تقعد تقول طب ايه السبب البنزين و لا الزيت و لا الرشاشات و لا .. و لا .. و لا ... الخ ..الخ , و ممكن تحس كمان ان دواسة البنزين سايبة شوية و الدواسة تقيلة
السبب ان الواير مش مشدود زي ما بيقولوا ع الشعرة و مرخي و ده مش بيخلي البوابة تتفتح صح مع الدوسة البسيطة و بالتالي كمية الهوا اللي داخل قليلة و بالتالي الحساسات بتقرا ان نسبة الهوا قليلة و نسبة البنزين قليلة يبقي السحب هيكون ع اد الاحتراق اما عن تقل الدواسة فده لأننا بننسي ان الدواسات زيها زي المفصلات محتاجة تتربط او تترجلش في حالة الدواسات و تتزيت لسهولة الحركة

اما عن طريقة عمل رجلاش البنزين هيحصل الآتي :

نفتح الكبوت و نشوف البوابة و واصل بيها الواير اللي هو السلك الواصل بدواسة البنزين و راكب ع البكرة اللي بنشدها عشان ندوس بنزين و احنا واقفين قدام الحوض



زي ما شايفين فيه قلووظ ع السلك و صواميل مهمتها التحكم في رجلاش دواسة البنزين فيه عربيات تانية ممكن تلاقي صامولة واحدة و ووردة زي كلبس هي اللي تتحكم في الرجلاش كل عربية و تقفيلها لكن في النهاية الفكرة واحدة

نشمر اكمامنا و نسمي و نبدأ الشغل
طبعا ندور العربية قبل ما نشتغل الناس هتقولي ليه لسبب بسيط عشان ممكن و انت بترجلش و العربية مبطلة متحسش ان البكرة اتشدت و العربية كانها دايسة بنزين و بالتالي لو العربية دايرة لو شدينا بدون ما نقصد هتلاقي كانك دوست بنزين فنرخي تاني

هنجيب مفتاح 12 و طبعا يختلف حسب العربية و نفك الصامولة ديه







و السلك هيطلع في ايدينا بالشكل ده



نفك الصامولة ديه ناحية الطرف لحد ما نوصل لخر كام سنة بلاش نوصل لأخر سنة ع الاقل سيب 3 -4 سنون الواحد برده يقلق ان الصامولة تلف لوحدها الا لو هتعملها زي محبس عليهم من فوق و ده اللي بفكر فيه فعلا عشان اخليها ع اخر سنتين



بعد ما ظبطنا الصامولة نرجع السلك ع البكرة تاني و نحطه ع الحلقة بتاعته و ندوس عليه لتحت زي ما شايفين
و بعدين ابتدي اربط الصامولة ديه لحد الحلقة اللي شايلة السلك



بس نخلي بالنا ان السلك يكون ع نفس الاستقامة و يكون معشق ع الاخر في مكانه لأني لما ربطت كان بيطلع لفوق سنة بسيطة لما أقرط عليه و بالتالي كنت ماسكة من مكانين عشان يكون متعشق صح و في نفس الوقت الدواسة مش دايسة بنزين



بعد ربطنا و اتأكدنا انه مش سايب و مش هيفك و احنا ماشيين و ده الشكل النهائي بعد الربط

لو ملاحظين مكان الصواميل كان معلم فين ع القلاووظ و باقي فين ده الدواسة كانت سايبة خالص هههههههههه



ندخل نجرب الدواسة طبعا محدش يفتكر لما كان بيدوس الأول لأ المرة دي هتلاقي العربية من تكة بتدوس بنزين جامد و خاصة للناس حديثي القيادة و بيقلقوا من المطالع الجامدة و العربية ترجرج
لقينا الدواسة تمام زي ما عايزين و ممكن تتحكم في الرجلاش اذاكان يرخي شوية او يشد ع الاخر عن طريق الخطوات السابقة


نيجي للجزء التاني لتقل الدواسة شوية في حركتها

هنقفل العربية و نجيب wd-40 و نفرش ورقة جرنال او فوطة تحت الدواسة و نرش ع الاجزاء المتحركة و نشبعها مع تحريك الدواسة و بعدين نمسح الي هينزل زيادة



ثم نطلع للحوض مرة تانية و نحط فوطة تحت البكرة و نرش عليها مع تحريك البوابة و نخلي بالنا ميجيش ع الحساسات و برده نستني الزيادة تنزل ع الفوطة اللي حاطينها و نمسح الزيادة من تحت



و بعدين نروح نجرب الدواسة و نشوف الفرق و ممكن ندي باقي الدواسات وش w-40 برده مع تحريك الدواسات

و اخيرا و ليس اخرا دور و اطلع جرب العربية و ادعيلي

بس خلي بالك اوعي تتغر عشان الدواسة مش زي الأول و هتلاقي التجميع بقي مختلف عن الأول و طبعا عشان متضيعش بنزين :)


و استعدوا للتقرير المفاجأة الذي ينتظره الجميع و ليس نسور السوزوكي فقط لأني بضع اللمسات النهائية و ان شاء الله خلال يومين هنزله اهم حاجة تابعوا القسم اليومين الجايين D:
( انت قولتلهم ليه ما تمسك لسانك شوية .... انت رجعت تاني هو انا مش هخلص منك... لأ وراك وراك و راشق في التقرير الجاي ان شاء الله ... اشوف فيك يوم ع اللي انت عملته فيا ... خلاص يا عم متعمليش فيه عبد الفتاج الجيرني )

خلوا بالكم بقي ضميري رجع تاني و زي ما شايفين راشق في الموضوع الجاي ربنا يستر

الي اللقاء في التقرير القادم ان شاء الله :)