الموضوع: تقرير مصور : شراء و تركيب سماعات كينوود 10 سم في تابلوه سوزوكي التو

بسم الله الرحمن الرحيم
السلام عليكم و رحمة الله و بركاته


بعد تركيب طقم سماعات بايونيير 400 وات بدل السماعات الكلاريون اللي شيعت و اتكسرت و متصلحش مغناطيس مسامير حتي
http://www.nilemotors.net/Nile/308603-400.html


و بعد موضوع فتح غطا السماعات في التابلوه قدام
http://www.nilemotors.net/Nile/321645-a.html

بدأت رحلة البحث عن سماعات 10 سم مدورة
و لقيت سوني 10 سم 130 وات , 30 ار ام اس في بي تك توكيل سوني فرع روكسي الي جنب قويدر بـ99 ج و ضمان 6 شهور تقريبا
و كينوود 110 وات , 20 ار ام اس عند فانتازيا بـ85 ج
و ملقتش بايونيير غير عند السجان و قالي تقريبا 140 ج و كذلك الكينوود 110 وات 130 ج او العكس مش فاكر
و كله صيني

المهم سمعت السوني و سمعت الكينوود عند فانتازيا ملقتش فرق غير ان السوني لما بتعلي بتصرخ
بالرغم انها ار ام اس اعلي 10 و راكبة ع سي دي و جي ام
قولت هجيب كينوود من عندهم مع اني عارف ان السعر زيادة شوية لأن سعرها تحت في التوفيقية حوالي 70 ج من سنة فاتت بس الدنيا مقلوبة خلقة هناك و لازم انزل بدري و وجع دماغ و اللي عايزين يقفلو كوبري اكتوبر و هي ما ناقصة فقولت مش مشكلة
روحت فانتازيا تعامل الشباب اللي واقفين هناك محترم جدا ماعدا ست كبيرة قاعدة هناك بتحاسب لما سالت ع الاسعار بترد بطريقة سيئة كنت هرجع في كلامي و مش هشتري الحاجة المهم ما علينا كبرت دماغي

السماعات ما شاء الله شكلها نضيف عن اللي بينزل ستوك الستوك تحس انها كرتون معاد تصنيعه

و ديه مكونات العلبة
- السماعتين
- الكتالوج
- 2 سلك قصير للتوصيل المباشر
- طقم مسامير و ورد للربط





و بدأت رحلة التركيب نزلت و سميت

و فكيت الوش الفيبر مكان السماعات في التابلوه



زي ما انتوا شايفين فيه مكان جاهز لتشبيك السلك و التركيب عالطول لكن للأسف مش هستخدمهم و هتعرفوا السبب بعد شوية



فكيت الوش الفيبر في التابلوه ثم طلعت الكاسيت و فكيت الكابل من ورا و محدش يستغرب من شكل الكابل الجهاز ده كابله عريض و مقسوم اتنين جزء للباور و الارضي و الذاكرة الخ الخ و الجزء التاني للسماعات و التوزيع







و كانت المفاجأة ناهيكم عن التقفيل المعفن اللي شوفته و اللي عملوه ساعة تركيب الهيد يونت لكن ابص ع اسلاك اللي موصلة للفتحات اللي هي جاهزة للتركيب اتصدم انهم مش واصلين و الاساتذة واخدينهم مشبكينهم مع الباور و الارضي و شوية لخبطة عجيبة و انا ساعتها عملت كده

مفيش غير حلين لا ثالث لهما اما اروح لواحد يعيد تظبيط الاسلاك لأن اخوكم بيتوه في كهربا العربية شوية
اما اني اطنش للاسلاك الواصلة و اجيب سلكين اوصلهم مباشرة ع الكاسيت
و اخترت الحل التاني لأني بتفقع من الصنايعية و ماشي بمبدأ و لا الحوجة للصنايعية في الحاجات الخفيفة ديه

و بدأت اشوف انهي فردة يمين و انهي فردة شمال و جبت سلك السماعات اللي كانت جايبه مع البايونيير عشان طويلة و قصيت ع اد المسافة بين الفتحة و الجهاز و قفلتها بشكل مؤقت لحد ما اجرب




و الحمد لله زي ما توقعت اشتغلت الفردة اليمين مع اللي موصله و قولت الدنيا ابتديت تنور مكنتش اعرف انها هتضلم كمان شوية

ده غير طبعا زي ما انتوا شايفين ان السماعات مش هتركب لأن فيها مكانين زيادة للمسامير ديه لسه مضلمتش الضلمة جاية في الطريق



المهم قولت اخلص التوصيلات و الكهربا الأول و بعدين نظبط مكان السماعات
كده خلصنا من الفردة اليمين الشمال سهلة هركب عالطول و زي مقولت الدنيا ابتديت تنور شيل الوش اللي ناحية السواق و اذ بالصدمة ضلمت ضلمة معتبرة يا ريتها ع تركيب او اسلاك مش واصلة لأ الدنيا متقفلة تقفيلة محترمة متعديش سلكة و لازم يلف جوة التابلوه و لا كأني بوصل مواسير غاز



ذهبت لعلبة العدة و جبت سلك ربط حاطه معايا احتياطي عشان الحركات النص كوم اللي بتحصل ديه فبيتنع و ابتديت امشيه حوالين التابلوه من جوة عشان انزله تحت و امده للجهاز و الحوار ده لوحده خد مني حوالي تلت ساعة و انا عمال اتنطط مرة فوق التابلوه مرة نايم في الشارع و مرة فوق الكبوت و مرة تحت الكراسي لحد ما وصلت السلك




و وصلته من تحت لحد الجهاز





و شبكت الفردة الشمال مع الشمال و جربت السماعة الشمال و بعدين بدات أأقفل الهرجلة اللي كانت معمولة ورا الجهاز









و وصلت الكابلات و كابل الراديو





و بعدين ركبت الجهاز تاني و قفلت التابلوه




و طبعا لسه الاسلاك كلها متشعلقة في التابلوه بتفكرني ايام ما كنا صغيرين و بنتشعلق في الاوتوبيسات هههههههه




المهم لميت البلاوي ديه كلها و ربطت و قفلت

طب كده خلصنا ؟؟؟ اكيد لأ يا فرحتي الاسلاك واصلة و مفيش سماعات هتركب
زي ما شايفين 4 اماكن للمسامير فقيت الحل الوحيد اني أأقص الاتنين اللي معلم عليهم بالاحمر حتي لو اتنوا مش هتدخل السماعة المهم توكلت ع الله و قصيت





و ديه النتيجة




و جبت الورد و السمامير و ابتديت اركب و ديه لوحدها مقرفة لأن الازاز مضايقني في تركيب المسامير ففضلت الف لحد ما قفلت و تنيت مفك صغير ع شكل حرف L و بدأ التقريط النهائي




ثم تم تركيب الوش




و بالمثل في الناحية الشمال





و بفضل الله و حمده تم التقفيل النهائي
و دخلنا في مرحلة التجربة مرة تانية للتاكيد النهائي

و كانت المفاجأة برده مش عارف ايه المفاجأت معايا ههههههههههههه
نسيت ان كل الراديو قنواته اتلغت و لازم و لاااااابد اعيد الضبط و الام بي ثري فوق و الكاسيت جنني عشان يتظبط لكن الحمد لله اتظبط بعد عذاب كأن البحث كأن بيعاند معايا

بدأت اجرب الصوت امامي فقط او امامي و خلفي
اجرب يمين بس او شمال بس امامي او امامي و خلفي

و ما شاء الله الله اكبر الصوت بقي اجمل خاصة مع السماعات ورا

تم بحمد الله


و انتظروني التقرير الجاي ان شاء الله خلال يومين او تلاتة هيكون مفاجأة و لن يكون قاصرا ع الالتو او السوزوكي بس لكن هيكون مفيد لجميع العربيات :)