الموضوع: تجربتي مع منظف انجيكشن ليكوي مولي

بسم الله الرحمن الرحيم
السلام عليكم و رحمة الله و بركاته

انهاردة هنقلكم تجربتي مع منظف انجيشكن ليكوي مولي
تحديدا في سوزوكي التو 800 سي سي

سمعت و قريت تجارب الناس لمنظف انجيشكن ليكوي مولي لكن انا مبقتنعش لازم اجرب بنفسي فقولت اجرب
و رحت لموزع ليكوي مولي في ش دمشق و جبته سعره 35 ج بصراحة التعامل كويس جداااا هناك و خاصة اني كنت ببحث عن منظف انتريور جابلي الـsonix لكن رفضت لأني جربته قبل كده و معملش حاجة و من الواضح اللي كنت جايبه مضروب فجاب علبة خاصة للتجربة و وراني التجربة قصاد عيني و بصراحة الجزء اللي عمله في السقف رجع جديد كأني لسه جايب عربية المهم مش قصتنا خلونا في منظف الانجيشكن دلوقتي و نشوف باقي الحاجات ديه في تقارير اخري

هي ديه علبة منظف الانجيكشن



طبعا طريقة فتحها بسيطة هنفتح البرشام البلاستيك ع الغطا و نفتح الغطا هنلاقي تحته برشام تاني بلاستيك زي جيركن الزيت نفتحه



و بعدين نركب هذا القمع الغريب الذي يصل للتانك غصب عنه هههههههه



للأسف طبعا اللي لاحظته ان العلبة معليهاش اي تعليمات للاستخدام غير 3 سطور

• مناسب لجميع المحركات التي تعمل بالبنزين
• تكفي العبوة حتي 70 لترا من الوقود
• يستمر التاثير حتي 2,000 كم

لكن مكتوب بس وظيفة المنظف و طبقا للمكتوب

• يقوم بازالة الرواسب الموجودة علي صمامات الحقن و فتحات الصمامات و شمعات الاشتعال و الرواسب الموجودة في حجرة الاختراق و يمنع تكون رواسب جديدة
• يهتم بجميع اجزاء نظام حقن البنزين
• يقوم بحماية نظام الوقود بالكامل من التآكل
• يقوم بتحسين قبول الغاز و الضغط
• يقوم بتحسين قيم غاز العادم و أداء المحرك
• تستهلك المحركات النظيفة وقودا أقل و تصدر ملوثات أقل

اما عن طريقة الاستخدام انا عارفها لكن قصدي هو لو شخص اول مرة يستخدم المنظف ده هيعمل ايه ؟؟

و طريقة استخدامي اضافته ع تلت ارباع التانك ع الاقل
و ناخد العربية مشوار طويل و يفضل لو سريع او تمشي تحرق ع الغيارات شوية عشان الرشاشات تضخ بقوة و تفتت اي رواسب
و بعد ما التفويلة ديه تخلص تفول و نمشي عادي
و بعدها تغيير زيت الموتور نظرا لأن كل الترسبات بتنزل في الزيت و تغيير البوجيهات و تغيير فلتر البنزين او تنظيفه لو لسه جديد
و ده سبب اني بستخدم المنظف لما اكون هغير زيت الموتور و البوجيهات و فلتر البنزين او تنضيفه ع الاقل

نيجي للتجربة

قبل اضافة منظف انحيشكن ليكوي مولي

العربية كانت بتاكل بنزين او نقدر نقول بتشفطه و السحب الي حدا ما ضعيف



بعد اضافة منظف انجيشكن ليكوي مولي

- اول حاجة لاحظتها ما شاء الله التجميع و السحب اختلف تماما
- وصلت لسرعات ع الغيارات مكنتش بوصلها من فترة طويلة لدرجة اني حسيت اني وصلت لأر بي ام 4000-5000 بدون ما احس
- مش عارف هل ده تهيئات ام ان صوت الموتور اهدي بنسبة بسيطة عن الأول
- استهلاك البنزين رجع تاني زي الأول
طبعا معرفش ايه نظام التنظيف الداخلي لكن واضح ان فيه تأثير و هيبان عند تغيير البوجيهات ان شاء الله
و كنت اتمني لو شركة ليكوي مولي توفر اختبار و هو رؤية داخل الموتور باستخدام منظار قبل استخدام المنتجات الخاصة بالموتور و بعد استخدام المنتجات

هل تفتكروا التجربة خلصت لأ لسه ديه البداية و هنشوف مع الوقت :)

لكن لحد دلوقتي نص التانك خلص لكن بدات الاحظ ان التأثير بيروح يعني الحرق ابتدي يقل ع الغيارات السرعات اللي وصلتلها مبقتش اوصلها تاني بسهولة لازم احرق اكتر و عامة انا متابع و اي جديد هبلغكم

بالتوفيق للجميع