الموضوع: محتاج نصايحكو فى مشكلة فى الأوبترا (محتاج ورشة مختصة كمان)

الأول السلام عليكم يا أهل المنتدى عموما و أهل الشيفروليه خصوصا.

الموضوع باختصار, ان شكل اتكتب على عائلتى انها تكون عائلة الأوبترا j, ببساطة اخو مراتى معاه اوبترا 2006 مانيوال فضى جايبها من سنة كده و كان بيشكر فيها, و انا جبت اوبترا اوتو سوداء من 3 شهور بشكل وقتى لأنى كنت لسه بايع عربيتى و ناوى على حاجة اعلى "سيفيك او اوكتافيا 5" بس محصلش نصيب ملقتش حاجة مناسبة ليا و كان وقفة العيد الكبير فخلصت فالأوبترا المعايا, و خطيب اخت مراتى باع عربيتو فجأه و ظهرت قدامو اوبترا مانيوال 2006 سوداء فخلص فيها. و أخيرا كان بقالى مده بدور على عربية لمراتى بعد ما باعت عربيتها القديمة و مع ارتفاع الأسعار, ظهرت أوبترا مانيوال 2006 بردو و كمان سوداء كانت مرفوعة فى جراج رحنا مخلصين فيها بردو كنت خايف من ازدياد الأسعار.
طيب انتا مصدعنا ليه بالحوار ده كوله احنا مالنا يا عم بعيلتك.
بصو الأول عربيتى ماشية 24000 ك تقريبا موديل 2009 و هيا عموما مفيش شكوى معينة منها لكن حاسس ان فيه حاجة فى العافشة الأمامية بذات مش مضبوطة "طب هيا لحقت دول 24000 ك" بصوا انا نفسى شكيت بسيط ان ملعوب فى العداد, لكن بالكشف على الموتور (الكشف تم على بستم بستم) و حالة الصالون و التابلوه و شكل حوض العربية يقول ان فعلن العداد صحيح, لكن المشكلة ان العربية كان راكب فيها جنط 15 صينى مع كاوتشات مش معروفة و بالتالى كانت بدبدب جامد, لكن انا حاولتها لجنوط 14 حديد و كاوتش كومهو و اداء العفشة اتحسن كتير اوى.
باختصار بأه شكوتى الأولى هى: انا من مدينة نصر و عاوز واحد بيفهم فى الأوبترا يكشفلى على العفشة لأن فيه دبدبة بسيطة ممكن غيرى مايحسهاش بس نظرا لركوبى كذا أوبترا, فحسيت ان فى حاجة عاوزة تتضبط اعتقد مش هتخرج بره الجلب او البارات او كاوتش ميزان مثلن و خصوصا مع وجود الجنط ال15 السابق الأكيد ساب بصمته فى العفشة (الميكانيكية العاديين قالولى مفيش حاجة ملحوظة فى العفشة و علشان كده عاوز مختص اوبترا).
شكوتى الثانية: العربية كانت بتترجج جامد على السرعات, الموضوع هدى كتير بعد تغيير الجنوط و بعد كده الرجرجة هديت زيادة بعد تظبيط جنط خلفى كان فيه رفة و لسه هكشف تانى على القدام احتياطى بس اغلب الظن القدام سلام, بس لسه فيه رجرجة خصوصا من 100 ل 120 بحسها فى الطارة و احساس بعدم ثبات العربية جزئيا (مقارنة بكلام الناس عن ثباتها) و بتقل الرجرجة بعد ال 120 بس بحس ان فيه حاجة مش مضبوطة, و فيه احساس منى ان الرجرجة ديه بتزيد مع تشغيل التكييف و بردو احساس بعدم الثبات.
شكى لو الجنوط الحديد طلع مفيهاش حاجة و من قبل خبرتى فى المواضيع ديه (سواء عن تجربة شخصية او قرائتى فى المنتدى او تجارب مع اصدقاء) ان الرجرجة فى الطارة و فى العربية جزئيا بتكون لسبب او اكثر من الأتى:
1- عيب فى الترصيص او رفه فى الجنوط
2- مشكلة فى الكبالن الداخلى بس مفروض ان ليها اختبار و هو ان الرجرجة بتروح لو حطيت ال n, لاكن بصراحة جربت و مش قادر احكم نهائى على الموضوع ده و عشان كده محتاج ميكانيكى بيفهم يكشف على اداء الكبالن الداخلى.
3- بلى العجل و معرفش يتم التأكد منه ازاى (بخلاف الميكانيكى)
4- سمعت ان كارونة الفتيس بتعمل الموضوع ده و كان فى موضوع معمول فى قسم المازدا عن كارونة الفتيس بتعمل رجرجة فى المازدا 3 بس بصراحة مش فاهم ليه لأنى مقابلتش مشكلة فيها قبل كده, بس عموما و انا بكشف على الأوبترا عند ورشة بتعمال معاها من ايام الكيا حظرنى من كرونة الفتيس الأوتو فى الأوبترا و قالى بتهيس بعد زمن و الله أعلم.
انتو ايه رأيكم و حد واجه مشكل بعينها فى موضوع الرجرجة ده فى الأوبترا و عندو اقتراحات.
طيب انا اعرف ميكانيكية كتير, يعنى الفولكس و السكودا معنديش مشاكل, و الهيونداى و الكيا معنديش مشاكل بردو, بس انا مؤمن بالتخصص و عاوز ميكانيكى او ورشة متخصص فى الشيفورليه يفضل تكون فى مدينة نصر اولا ثم مصر الجديدة ثانيا و برده محل قطع غيار امين. خصوصا ان عربية مراتى عاوزة شغل صيانة كتير شوية عشان الركنة (تنظيف دورة مياه عشان مليانة صدى – صيانى فلاتر و زيوت و كهرباء كاملة و كشف على العفشة و تغيير سيور) بس المستغربله ان رغم ان عربيتها داخلة على 100,000 ك فالطارة ماسكة نفسها فى الجرى و فى النقر اكتر من عندى. جايز الراجل كان مظبط العفشة, بس لاحظت ان الباور عندها اتقل من عندى, و معدتش ال 100 ك/س بعربيتها عشان احكم على الثبات خصوصا ان عندها مساعد خفيف ورا لازم يتغير بردو.

مستنى اقتراحتكو.