الموضوع: عايز أعمل ساوند جامد للانوس..ضروري ياجماعة

بسم الله الرحمن الرحيم

صباح الخير عليكم..

يا جماعة انا من زمان نفسي أعمل ساوند سيستم جامد أو على الأقل يكون حلو للانوس بتاعتي..لأن الكاسيت الكلاريون الشرايط اللي فيها دا مطلع عين أهلي كل شوية يفصل مع أي مطب ويهنج وأنا حاليا شغال عليه بـ الإم بي ثري

وكمان الأربع سماعات اللي فيها مش الأصليين بتوعها اساسا ولما فكيت الأبواب لقيت الرق بتاعهم متقطع ميت حتة واللي ورا نفس الكلام فالصوت عندي في الضياع خالص

المهم انا من فترة كدا اشتريت سماعات بايونير مقاس 16 من ارخصهم في التوفيقية وحطتهم ورا.. ودا الموديل بتاعهم:



موديلهم: Ts-G1644R..
250وات..2واي..40 وات RMS

الطقم دا صوتو جامد وحلو أنا مركبو ورا حالياً..بس طبعا الكاسيت الشرايط دا مخلي صوتهم وحش وفيهم وش..

فدلوقتي أنا هفك الطقم دا وأركبو في الأبواب..وعايز أركب مكانهم طقم بيضاوي..وكاسيت سي دي جديد..

بالنسبة للساوند:

اللي يهمني في موضوع الصوت عندي ان البيز يكون جاااااامد أهم حاجة..وصوت نقي وواضح في الأغاني..وكمان يكون عالي نوعا ما..

فدلوقتي انا هشتري كاسيت وسماعتين بيضاوي وعندي سماعتين أبواب..يبقى كاسيت وأربع سماعات..وقدام شوية هشتري جي ام اكون جمعت فلوسه..واحتمال أجيب صب أو بازوكا في الشنطة بس دا مش مهم بالنسبة لي عموما وكمان عشان الشنطة بتبقى مليانة عندي فالمساحة بتفرق معايا أوي..لكن أكيد الصب هيدي بيز حلو أوي..دا رأي..

وفي واحد صاحبي بيقولي حل تاني..

كاسيت + 4 سماعات بيضاوي ورا + سماعتين الأبواب + جي إم + ومش مهم الصب بردو..

بس سألت ناس كتير قالولي كافية أوي سماعتين ورا ولو ركبت 4 هيبقى الصوت مش حلو ومزعج..فمحتار جدا اعمل ايه..خايف اركب سماعتين بس ويطلع البيز ضعيف واي كلام..وخايف اركب 4 ويطلع البيز جامد بس الصوت زبالة..مش عارف بقى اكيد انتو فاهمين في الحكاية دي..مع اني شوفت واحد جاري مركب 4 سماعات على كاسيت بايو بدون جي ام وكان صوتهوم جميل بس البيز مش قد كدا ولما تعلي بيبقى في زنة..

بالنسبة للميزانية:

أنا حاليا معايا في حدود 850 جنيه..وممكن أوصلهم 900 بالكتير أوي..بس لو استلزم الأمر اني ازود عن كدا ممكن استلف بقى ههههههه

مقسمهم يجي 500 جنيه للكاسيت..و400 للسماعات..



نجي بقى للكاسيت:

اول حاجة انا عايز كاسيت يكون فيه: Cd+Usb+Aux أساسي..ويكون صوتو نقي وحلو والبيز بتاعه جامد..قدامي 3 اختيارات

أول كاسيت: Sony Gt500



سألت ناس كتير قالولي كاسيت جامد ولا يعلى عليه من الآخر..بس البيز بتاعه ضعيف..بصراحة أنا الكاسيت دا عاجبني أوي..انتو ايه رأيكو؟

تاني كاسيت:

سمعت انو نفس الــ gt500 في كل حاجة بس ميزته انك تقدر تغير الألوان بتاعته..ودي ميزة مهمة بردو بالنسبة لي..بس للأسف الميزانية لاتسمح لأنو أغلى بــ 200 جنيه من الجي تي 500..

تالت كاسيت:

بايونير عموما أكيد لايعلى عليه..بس مفيش موديل محدد في دماغي..وكمان البايو غالي جدا..

رابع كاسيت:

kenwood kdc-u3053



ودا شوفتو مع واحد معانا هنا في المنتدى وكان صوتو جامد وسمعت ان البيز بتاع الكينيوود أقوى من البيز بتاع السوني والله علم..

وكمان هو بيقولي اي كاسيت مش هيفرق المهم يكون لايقل عن 7 باند..

هو 7 باند يعني ايه؟

وكمان هو الصناعة بتاعة الكاسيتات دي صيني زي ماسمعت ولا ماليزي؟

بالنسبة للسماعات بقى:

1/ سماعات بايونير 400 وات
..ودي بيقولو مش بطالة..بس انا مسمعتهاش بنفسي..

2/سماعات كينيود 500 وات..
ودي سمعتها بنفسي وكانت جامدة..

3/ سماعات سوني 400..
سمعت ان السوني البيز بتاعها ضعيف عموما فبلاش منها..

4/ سماعات دبل بيز

ودي مش عارف نظامها ايه بس سمعت انها أقوى من أي سماعة عادية..فلو في نوع حلو ياريت ترشهولي..

مع العلم ان الميزانية للسماعات في حدود 400-500 جنيه بالكتير أوي..

بالنسبة للجي إم:

رشحولي جي إم يكون هيليق على السماعات والكاسيت اللي هترشهوملي..بس عمواما هو مش مهم بالنسبة لي دلوقتي عشان دا عايز ميزانية لوحدو..بس انا هشغل الكاسيت والسماعات من غيرو مؤقتا..

نيجي لمشكلة تركيب السماعات البيضاوي:

بالنسبة لي دي أرخم مشكلة هتواجهني عشان اركب السماعات البضاوي مكان الــ 16..وقدامي بردو 3 اختيارات (كفاية بقى محسسنا اننا في امتحان اختر الإجابة الصحيحة ههههه

1/ أقطع في الصاج بتاع العربية..

ودا حل سريع وسهل وشوفت أغلب الناس عاملنو..بس عيبو انك مش هتعرف ترجع السماعات الفابريكة..وكمان سمعت انو بيقلل من سعر العربية لما تيجي تبيع..

2/ عمل رف خشب mdf:

ودا حل مكلف شوية بس هيقوي الصوت نوعا ما وكمان السماعات بتركب عليه من فوق والمغناطيس بيسقط مكان الفتحات القديمة..بس عيبو انو هيعلي الرف ورا وبالتالي هيخلي الرؤية صعبة شوية ودي مش مشكلة بالنسبة لي..لكن المشكلة الأهم ان الستارة الكبس بتاعة الزجاج الخلفي مش متهيألي مش هتركب لما الرف يعلى ودي مهمة جدا عشان الشمس وكمان عشان السماعات متتاثرش بالشمس بردو..

3/ قواعد بلاستيك على شكل السماعة البضاوي:
ودي بتركب مكان القدام ومن فوق السماعات الجديدة..بس شوفتها عند واحد صحبي بتخلي الصوت مش حلو..والقاعدة الواحدة بــ 5 جنيه.

فإيه رأيكم انهي الأحسن والأفضل بس مضحيش بحاجة تانية زي الستارة..

بالنسبة للضمان:

هو الكاسيت والسماعات عليهم ضمان ولا لأ؟ وبيبقى في حدود كام شهر؟ وايه الحجات اللي الضمان لايشملها؟

اخر حاجة: بالنسبة لمكان الشراء والتركيب:

انا شايف ان أرخصهم حلو وأسعاره مقبولة بردو..أنا جيبت منو السماعات البايونير الــ 16..بس كنت بتكلم مع عضو معانا بخصوص الكاسيت فقالي الأفضل تركبه في التوكيل وتاخد ضمان عليه في التركيب..لأن ارخصم مش مضمون..ايه رأيكو هو أرخصهم بيدي ضمان ولا لأ؟

ولو هركب الكاسيت والسماعات برا عند صنايعي كويس انا اعرفه..يتكلفو في حدود كام تركيب؟

والكاسيت والسماعات عموما بيجي معاهم اسلاك التوصيل ولا هحتاج أشتري فيش أو أسلاك؟

-------------------------------

عموما أنا حاولت أكتب التفاصيل كلها عشان أسهل عليكم في الإجابة وميبقاش في حاجة مجهولة بالنسبة لكم..
وانا آسف عشان طولت عليكم لكن مليش غيركو أكيد هو اللي هيظبطني في موضوع الساوند دا

وياريت سرعة الرد ياجماعة عشان ممكن انزل اشتري الحاجة بكرا لو قررت النهارده..

وجمعة مباركة.

المشاركة الأصلية كتبت بواسطة AlGazar2

احسن سماعات تديك بيز هى الكينوود و خصوصا الدبل بيز بتاعها بس معرفش بكام
و الكاسيت هاته بايونير نضيف و بانداته حلوه و انضف من السونى و الكينوود

و لو هتركب صب و جى ام يبقى الصب جى بى ال او بايونير و الجى ام سيمفونى لو عايز بيز خبط و رزع لو عايز جوده يبقى البايو او كينوود

تمام يا علاء بالنسبة للسماعات فعلا انا كنت بدور في المواضيع القديمة في المنتدى ولقيت كلو بيشكر في الكينييود..بس في حاجة مقلقناي منها بيقولو البيز بتعها جاااامد بس الميد رينج مش قد كدا..خايف اجيبها وتطلع بيز جامد بص ميد رينج وحش ونقاء صوت مش حلو..معادلة صعبة بصراحة..

وأكسيل بيقول لو عايز تجمع بين الإتنين هات بايونير 400 بيز وترابيل وسط..بس مش داخلة دماغي بصراحة..وكمان لقيتها على موقع بايونير 40 وات ار ام اس!!

بالنسبة للكاست دلوقتي محتار بين 2 ونفسي ألاقي رد حاسم!!

1/سوني gt500
2/بايو 2450ub اللي كتبهولي العضو المحترم فوق بس مش عارف ايه مميزاته!!

بالنسبة للسماعات الكينييود في قدامي 3 موديلات:

1/ سماعات كينييود 400 وات عادية ودي قريت انها 130 ار ام اس..

2/ سماعات كينييود 400 دبل بيز مش عارف هي كام ار ام اس ولا كام سعرها..

3/سماعات كينييود 500 وات عادية بردو ومش عارف هي كام ار ام اس وسعرها في حدود 540 جنيه!!

انا عايز أعرف رقم الــ rms بتاع كل سماعة من دول ياجماعة عشان اختار احسن واحدة منهم وسعر مناسب..وهل الكينييود الــ 400 أقوى من الــ 500 ولا العكس؟

ياريت سرعة الرد ياجماعة بالله عليك..انا كل ما كنت بخش القسم دا بلاقي نص اعضاء نايل موتور هنا ههههههه لكن دلوقتي مفيش ولا واحد..في اييييه؟

والجي إم هجيبه قريب إن شاء الله..لكن الصب مش فدماغي خالص عشان المساحة عشان كدا عايز أعوض في السماعات!!