الموضوع: تقرير صيانة الألف و التكييف -تيدا 2013- و تركيب باركينج سنسور بالصور

تقرير

السلام عليكم و رحمة الله و بركاته

وصلت اوتو ايجيبت السبت 16 مارس 2013 الثامنة و الربع صباحا. ابلغت الريسبشن اني من حاملي استيكر نايل موتورز.

المهندس اسلام استقبلني و شرحتله ان زوجتي عملت صيانة الألف في مودرن موتورز و لكني لا أثق فيهم، قالي و لا يهزك، نعملها تاني و مجانية طبعا و بعدين طلبت تركيب الباركينج سنسور بعد الاضطلاع عليه.

بلغته بشكوتي من كومبريسور التكييف اللي بيشتغل 16 ثانية و يفصل 4 ثوانى ثم 16 ثانية و 4 ثواني ،الخ... الخ... للأبد.

استلم العربية الساعة 9 تقريبا و قالي تستلم قبل الساعة 2 و اداني انا و زوجتي كوبونات المشاريب و خلافه.

ضربنا اتنين نسكافيه و انتظرنا في الدور الارضي في انتظار ظهور العربية علي شاشة المعلومات. ما ظهرتشي تماما لغاية ما خلصت.

المهم العربية دخلت تقريبا عشان تغير زيت و تربط عفشة الساعة 10:30 مش عارف ليه كانوا سايبنها واقفة بره كل ده.

طلعت بعد كده علي ورشة تانية لتخريم الاكسدام.

جالي المهندس اسلام بكل ادب و احترام و قالي الاستراحة اللي فوق افضل، حاجة كده VIP و المفاجـــــــــــئــــــة ..... عدد 2 PLAYSTATION3 في الصالة و هاتك تقطيع يا معلم..

المهم العربية فضلت مرمية بره تاني ييجي ساعتين، انا قلت تلاقيهم بيرشوا السنسورز.

نزلنا الساعة 2:30 نزن علي اسلام عشان نخلص، قال لي خلاص بتتغسل و قعدنا نتكلم شوية علي نايل موتورز و قال لي انه قاعد كل يوم علي القهوة مع شباب نايل موتورز و احمد مصطفي... هربت منه شوية ... ما علينا.

و بعدين قال لي ان الكومبريسور عادي جدا و انه اتاكد من عربية مشابهة.... هربت منه تاني.

المهم بصنعة لطافة، طلبت منه ان احنا نتاكد سوا من الموضوع ده... غاب شوية و قاللي احنا اكتشفنا ان الجهاز اللي بنكشف بيه علي الفريون و الكومبريسور محتاج calibration و قاللي حانكلمك تاني عشان الموضوع ده، هو كده كده مش ماثر علي التبريد نهائي.

العربية اتغسلت غسيل كده غسيل علي ما تفرج، بس نضفوها من جوه كمان، تقرىبا عشان قلتلهم ان انا من نايل موتورز.

استلمت الساعة 3 و اختبرنا الباركينج سنسور .,... اسلام كان بلغني من الاول انه بيبقي بارز سنه.

استلمت 2 كبون بـ 100 جنيه كل واحد خصم الصيانات القادمةز

استلمت الدواسات عرض نايل موتورز ... لا تعليق ... اقل من متواضعة... بس مش مشكلة.. النبي قبل الهدية.

مدي رضائي عن التوكيل ككل.. مقبول

مدي رضائي عن مهندس الاستقبال.. مقبول يؤول الي جيد... بس بتهرب منه كتير و بعديله عشان هو محترم و راجل برنس مع اني لمحتله ان انا مهندس ميكانيكا و بحب جو العربيات ده مع انه بعيد عن مجال عملي

مدي رضائي عن النسكافيه ..... صفر

ارجو ان اكون وفقت و وفيت في التقرير و منتظر رايكم و استفسارتكم.

واليكم الصور.