عربيه للاحجام الضخمه

**h641313** · 21-03-2013 11:41 PM

هل فيه عربيات مناسبه للى حجمهم ضخم طولا و عرضا و بكرش علشان تكمل ؟
بدون تعديل يعنى من غير تهبيط كرسى القياده او استعمال دريكسيون صغير
زمان كانت الزاستافا 750 الدركسيون بعيد عن كرسى القياده و لذلك كنت تلاقى ناس تخان جدا سايقنها
واحتمال السيات133 و الفيات 127 كانو زيها وبعض الامريكانى القديم

لكن فى الموديلات الحديثه ايه المناسب ؟

**kar!m** · 21-03-2013 11:46 PM

أيام ما كنت ببيع السوزوكي سويفت واحد صاحبي ضخم جه يشتريها كانت ضيقة عليه جدا

على العكس لما كنت ببيع الأوبل فيكترا .. واحد زميلي تاني ضخم جه يشتريها و عجبته جدا .. قال لي أول مره أركب عربية و مرجعش الكرسي للاخر و أكون قاعد مستريح.

الأوبل فيكترا و الباسات و الأوكتافيا و العربيات اللي في الفئات دي مناسبة جدا للأشخاص اللي أحجامهم كبيره.

و ممكن برضه الشيروكي و الرانجلر و اللاند كروزر و العربيات ال 4*4

**h641313** · 21-03-2013 11:54 PM

متشكر على سرعة الرد
فعلا انا شفت صورة الاوبل فيكترا واضح المسافه الكبيره بين الدريكسيون و كرسى السائق لكن الشيروكى لم استطع الدخول
هل كل الاوبل مناسب ؟

**Land_Cruiser** · 21-03-2013 11:55 PM

تصميم العربيه هو اللي بيفرق من موديل للتاني و مش شرط يكون حجم العربيه مقياس : يعني عربيه زي الماتيز مثلا علي قد ما هي صغيره كده من بره لكن كانت واسعه جدا من جوه

**amrelsaqqa** · 22-03-2013 12:12 AM

العربية الاوبترا واسعة جدا حتى لو رجعت الكرسى ، بتفضل واسعة من ورا

**h641313** · 22-03-2013 12:12 AM

فعلا لان الزاستافا من اصغر العربيات لكن اتساع مكان القياده كبير
و لكن اتساع العربيه من الداخل عموما ساعات مبيكونش دليل لانى حاولت دخول الماتريكس بعد ما كتير قالو عن اتساعها داخليا الا ان بترجيع الكرسى للاخر مكان القياده ليس متسع , هى المسافه بين الزجاج الامامى و الكراسى هى اللى واسعه جدا .

**samyyousef** · 22-03-2013 01:14 AM

الجسم الضخم و الراحة في القيادة معادلة صعبة فعلا يعاني منها الكثير
من اوسع العربيات الفورد فوكاس
الكيا كارينز
و يقال التيدا
تحياتي

**h641313** · 22-03-2013 01:34 AM

متشكر على الرد و حشوف صور الداخل للعربيات دى
الناس بتدور على السحب و السرعه و السعر و الواحد بيدور على عربيه مقاسه

**Land_Cruiser** · 22-03-2013 01:44 AM

خللي بالك يا فندم ان في شويه حاجات برضه ممكن تساعدك علي ألراحه اكتر في القياده زي التحكم في ارتفاع الكرسي وده بيخليك تقعد مستريح من غير ما تحتاج ترجع الكرسي قوي لورا و كمان تعديل وضع الدركسيون نفسه لأكتر من وضع و ده بقي موجود في كتير من العربيات دلوقتي

**h641313** · 22-03-2013 01:48 AM

و المضحك ان لو اشتريت عربيه مستعمله كل الناس بتختبر المستعمل فى نص ساعه و انا التجربه فى
اقل من دقيقه مجرد اختبار امكانية الجلوس على كرسى القياده وتسمع من البائع الحلول العجيبه زى تركيب دريكسيون بلاى ستيشن و تركيب كرسى بى ام دبليو اللى مفيش اهبط منه وتروح الحرفيين يقولو لا كرسى ايبيزيا هو الاوطى