الموضوع: تجربة ترخيص أسترا 2007

السادة الكرام
النهاردة كنت فى مرور السلام لنقل ملكية سيارتىو ترخيصها و فيما يلى نص التجربة مع الأخذ فى الإعتبار إنى للأسف أستخدمت واسطة بس حأتكلم عن اللى مفروض يحصل فى الظروف العادية :
- توجهت لمرور السلام و كنت هناك الساعة 8 صباحاً .
- قمت بشراء ملف متضمن (نموذج سداد الضريبة - نموذج صرف لوحات - نموذج مطابقة بصمة من المرور بتاعى إلى المرور القديم للمالك القديم) 6.50 جنيه
- المفروض يكون معاك (عقد العربية الموثق بالشهر العقارى - أى توكيلات بيع متعلقة بعقد العربية - شهادة مخالفات من مرور المالك الأصلى للعربية - رخصة العربية سارية أو شهادة بيانات لو الرخصة منتهية - صورة بطاقتك - صورة بطاقة البائع - صورة الرخصة)
- يتم شراء نماذج خاصة بنقل الملكيه ( نموذج فحص فنى - نموذج فحص طفايه - نموذج ترخيص عن كل سنة - دمغات متنوعة ) 50 جنيه نماذج للترخيص 3 سنوات
- التوجه للفحص الفنى و أخذ بصمة الموتور ثم التوجه إلى مرور المالك القديم لمطابقة الفحص بالملف القديم (ما روحتش علشان الواسطة) ثم العودة للمرور الجديد (السلام فى حالتى) لتقديم المطابقة
- سداد التأمين الإجبارى . 350 جنيه 3 سنوات .
- التوجه بصورة البطاقة للإستعلام الأمنى داخل المرور (إستعلام مباحث)
- سداد الضريبة 670 جنيه عن 3 سنوات .
- سداد ضريبة رفاهية و ده موضوع رفع ضغطى لأنى لآقيت عربية كنت بايعها فى 2009 لسه متسجلة على أسمى لحد النهاردة :(((
- أستلمت تصريح بدل الرخصة لمدة 6 شهور و ده إلى أن يصل ملف السيارة من المرور القديم إلى المرور الجديد و فى شهر 10 حأسلم التصريح و أستلم الرخصة إن شاء الله .
الخلاصة :
- رسم ترخيص الأسترا 2007 لمدة 3 سنوات 1076.50 جنيه (بدون ضريبة الرفاهية 180 جنيه) و الغريبة إن رسوم الشهر العقارى كانت 1070 برضه !!
- التوجه مبكراً قدر الإمكان للمرور و إعمل حسابك إن الموضوع حيأخد يومين على الأقل.
- حاول يكون معاك أكتر من صورة لكل حاجة (مش حيخسروا و حينفعوا)
- إتباع التسلسل المذكور أعلاه لخطوات الترخيص.
- عدم التعامل مع الأشخاص الموجودين امام المرور على الإطلاق (مجموعة من البلطجية و اللصوص و مش حتأخد منهم حق و لا باطل لو ضحكوا عليك).
- شفت حالتين لعربيات مسروقة و الناس الغلبانة مش عارفة تعمل ايه :(((

المشاركة الأصلية كتبت بواسطة ahmed air

لازم صوره بطاقه البائع ؟

محدش طلبها فى المرور بس كل شىء ممكن .. لازم تكون معاك علشان العقد بيتعمل بيها فى الشهر العقارى !
خليك فى المضمون و حاول تجيبها علشان متخبطش مشوار على الفاضى