العربية بتحدف شمال

**islamagdi** · 26-05-2013 03:33 PM

سلام عليكم
العربية حادفة شمال جامد
انا لسه مركب فردتين كوتش بريدجستون جداد و مركب طقم كبالن خارجي الماني
ظبطت زوايا لسه زي ما هي الراجل قالي من الكوتش وبدل الفردتين وقالي هتحدف يمين لكن لما بدل محدفتش يمين ولا حاجة يمكن الحدفة قلت شوية بس لسه حادفة شمال
ده ممكن يكون من ايه عشان ما الفش حولين نفسي؟؟

جزاكم الله خيرا

**emad_2020** · 26-05-2013 03:42 PM

قبل ما تغير كانت بتعمل معاك كدا
على العموم ممكن يكون ترصيص وكمان ننتظر رد باقى الاعضاء

**islamagdi** · 26-05-2013 04:21 PM

قبل ما اغير كانت بتحدف شمال بي مش اوي كده
يعني دلوقتي مقدرش اشيل ايدي من على التارة بتحدف جامد

**MEDO2013** · 26-05-2013 05:43 PM

ما يلفظ من قول إلا لديه رقيب عتيد

**sakr_skoda** · 26-05-2013 10:28 PM

ارفع العربية من اليمين بالكوريك ولف العجلة وشوف حتلف معاك بسهولة ولا معصلجة وعمل كدا مع الفردة الشمال لو فى فردة قافشة حيبقى من تيل الفرامل....*

**Amr_Azab** · 27-05-2013 01:17 AM

المشاركة الأصلية كتبت بواسطة sakr1964

ارفع العربية من اليمين بالكوريك ولف العجلة وشوف حتلف معاك بسهولة ولا معصلجة وعمل كدا مع الفردة الشمال لو فى فردة قافشة حيبقى من تيل الفرامل....*

+111
فعلا الفرامل تعمل كده وتخلي العربية تحدف لو فيه فرده بتربط وفرده لآ وفي الحالة دي العربية تحدف لما تدوس فرامل بس غير كده تبقي ماشية عادي
لكن لو بتحدف علطول وانت ماشي من غير ماتدوس فرامل يبقي زوايا أو ترصيص ممكن وحتخلي الطارة ترج معاك مع السرعة وممكن تكون فرده قفشة علطول برده زي مقال أ/ صبحي

فممكن حضرتك تعمل اللي قال عليه أ/صبحي ولو موصلتش لحاجة تروح لميكانيكي كويس يحل العجلتين ويكشف علي الفرامل والطنابير ومسامير الربط بتاعة العجل
وطبعا أحنا شلنا من حسابتنا انه عيب في الكاوتش لآنك بتقول ان الكاوتش جديد
ربنا يوفقك

**Amr_Azab** · 27-05-2013 01:30 AM

انا كنت قريت قبل كده عن المشكلة دي برده وكان حلها بيترتب في ثلاث نقاط :-
أولا: لازم تظبط ضغط الإطارات لأن لو ضغط الهواء فى إطار قليل العربية هتحدف ناحية هذا الإطار (الإطار الشمال مثلا) لأن احتكاكه بالأرض هيكون أكتر وسرعته أقل بجزء بسيط جدا من الإطار اللي في الناحية التانية -اليمين- (لاحظ إننا بنتكلم عن إطار أمامى للعربية لأن الإطارات الأمامية هي المسئولة عن توجيه العربية وكمان العربية كانت بتحدف يمين ولما بدلت الكاوتش حدفت شمال فده يخلينا نشك في موضوع ضغط الآطار.)تانيا: ممكن تكون مشكلة فى العفشة (ممكن لو جلبة مقص متآكلة أو مساعد معووج أو شمعدان متنى تلاقى العربية بتحدف).
ثالثا: لو فيه مشاكل فى الجنوط ممكن تأثر على زوايا العربية وتخليها تحدف وممكن تكشف على الجنوط فى أي مركز وتعرف ويبقى الحل المظبوط هو تغيير الجنط اللى فيه المشكلة أو استعداله لو حالته تسمح بالتصليح.
حاول تكشف علي الثلاث نقاط السابقة وان شاء الله تتحل المشكلة