الموضوع: الحمد لله ظبط كهربة الفليشيا بنفسي

السلام عليكم ورحمة الله وبركاتة



بقالي كام يوم العربية مغلباني عداد الار بي ام بيعلي ويوطي والموتور بيرعش والعربية بتبطل في كل مطب أو كل مادوس فرامل






حاولت كتير اظبط السلانسية وافتح مسمار الهواء وازود مسمار البنزين ولاكن لا حياة لمن تنادي نفس المشكلة


رحت للميكانيكي اللى فى اخر الشارع وعلشان أنا رحتله مرة قبل كدة يعمل شغل فى عوامة البنزين وقاللي هنفك تنك البنزين ومش عارف اية وحسيت انه عاوز يفك العربية كلها سبته ومشيت



لما شافني ابتسم إبتسامة صفرا ((( معناها أيوة جيتلي يامعلم هبيع واشتري فيك ))))
وبعد ماكان بيقابلني على باب الورشة اهلا يا استاذ احمد لتفضل ياباشا
لقيته حاطط رجل على رجل






المهم قولتلو ياسطي السلانسية عندي عاوز أظبتة

قاللي والله ياباشا مش فاضي عندي شغل كتير مع أن مكنش عنده عربيات اصلا

المهم حسيت بإهانة شديدة لما الاسطي بيعاملني كدة





قولت يا واد ياحمد الحاجات دي مشروحة فأكتر من مرة هنا فى المنتدي وأنا حافظ الخطوات بس كنت قلقان بدل ما العربية بتدور وبتبطل فى المطبات تبطل خالص ومتدورش تاني ...... المهم اعتمدت على الله وبعد ماصليت العشا سميت الله وفتحت شنطة العدة وعلقت البلادوس على الكبوت



واتصلت بعم صبحي الله يباركله الراجل بصراحة راجل محترم فوق الوصف قاللي على شوية حاجات منها أراجع على وصلات البوجيهات والموبينة والمشط ووش الاسبراتير
المهم عملت كدة لقيت كل حاجة مظبوطة




فكيت الصامولة بتاعت الاسبراتير ولفيت الاسبراتير سنة ضغيرة فى إتجاة عقارب الساعة وربط تاني الصامولة وأجرب مرة العربية متدورش أصلا ومرة احس الموتور بيسقف المهم بعد كام محاولة لظبط الاسبراتير الوضع بقي تمام



النتيجة


صوت الموتور بقي أحسن والار بي ام بقي ثابت

ضبط السلانسية مرة تانية والعربية تمام التمام

حبيت أنقل تجربتي لعل حد يمر بنفس الاعراض ويقدر يحل مشكلته بنفسه

ويبعد عن الميكانيكية اللى من نوع الميكانيكي اللى رحتله إما أفكلك العربية واعجنلك فيها وتكون زبوني وحبيبي وإما لو خفت على عربيتك وسبتني ومشيت متجيش هنا تاني