الموضوع: الحمد لله اشتريت إمجراند إمبارح

الحقيقة كنت متردد جداً من ناحية العربية وخصوصاً لما عرفت إن ظهرت فيها بعض الأعطال لكن في المجمل كان التقييم إيجابي بالنسبة للعربية ... الحمد لله بعد الاستخارة ربنا يسر الأمور واشتريتها إمبارح ... اتفرجت عليها يوم الجمعة في معرض المصرية في طنطا وحجزتها بـ 500 جنيه عشان يجيبولو اللون الشامبين وامبارح استلمتها ودفعت باقي المبلغ على سعر 83 ألف فاميه. اللي عجبني في المصرية إنهم بينقلو العربيات بحمالة سيارات يعني مش سواقة زي معارض كتير عشان كده استلمت العربية عاملة 30 كم. انا كنت سائل عليها في معرض المكاوي - بنها قالي 82 وما كانتش عندو.
اللي ما عجبنيش في المصرية بعد ما شيكت على العربية وبمضي اقرار الاستلام ... الاستاذ اللي كان بيسلمني العربية بيقولو فيه إكرامية للعمال اللي غسلوا العربية وممثل المبيعات وأنا قولتلو ماشي المهم طلعت 100 جنيه وادتهالو يقولي نطمع في 100 جنيه كمان ... قولتلو معلش كده كويس وبعدين الشركة ما نزلتش اي حاجة من تمن العربية ... أخدت العربية ومشيت على ميعاد بكرة الثلاثاء لاستلام الفاتورة معتمدة من المرور وادوني شوية حاجة بيقولوا هدايا ميدالية اي كلام عليها كلمة مصرية وسي دي عليها قرآن وطقم دواسات عامل زي الفل وغطا خفيف جداً سهل جداً يتقطع.

بالنسبة للعربية ما شاء الله كويسة كده وتقيلة وكنت قاعد مرتاح جداً أنا سوقتها مسافة 25 كم وهي المسافة بين وطنطا وبركة السبع مكان سكني ... آه لاقيت معاها وصلة يو اس بي في درج الطابلوة والعربية نازلة ببطارية جافة مش سايلة ... الحاجة اللي ما عجبتنيش الكلاكس بتاعها صوته مش حلو خالص مش عارف ده الطبيعي ولا كده الكلاكس فيه حاجة وكمان حدفة خفيفة يمين في العربية.

فيه كمان بكرة في الجنب بتاع ظهر كرسي السائق ... وظيفتها ايه؟