الموضوع: تقريرى عن ايمى بعد 2000 كم

بسم الله الرحمن الرحيم

كل سنه و انتوا طيبين و رمضان كريم و بعوده الايام .. دلوقتى ايمى عملت 2000 كم فشهرين استخدام لانى مش بتحرك بيها كتير و كلها كانت مشاوير مفيش سفر ..

اولا العيوب:-
الباور وانت واقف بالعربيه بحسه انه تقيل شوية لكن وانت ماشى ممتاز و فالجرى مش خفيف يعنى بتبقى مطمن هو الباور زيت عالفكرة مش كهربا و ديه ميزة

لازال صوت علبه الشكمان الى فالنص عالى و مضايقنى بس دى مشكله الشكمان المصرى التعبان الى فيها مش ذنب العربيه لكنه عيب مخلى صوت العربيه عالى

الكاسيت تعبان و مالوش اى تلاتين لازمه و السماعات الى ورا فاشله 20 وات من جولدى

واضح ان الدهان فعلا خفيف اوى كان موتوسيكل حكنى من الاكصدام الى ورا لاقيتها اتخدشت و باينه و اكتر من حد اشتكى من نفس النقطه

اخر حاجه كان عندى عيب حصل معايا كذا مرة لما ادور العربيه و هى بارده كان مؤشر حرارة الموتور يفضل يطلع لغايه الشرطه الى قبل الاخيرة و يفضل كده شويه و بعدين ينزل لما روحت التوكيل قالولى دى الترموستات بايظه و لازم تتغير (ادى اول صدمه) و كانت لسه العربيه ماجبتش الف كم قلتلهم تمام نغيرها قالولى هنبعت نجيبها من الصين خلال اسبوعين و هنبقى نكلمك (الصدمه التانيه) و ماشى من غير ترموستات بس مش ماثر كتير لكن العربيه بتاخد وقت على ماتسخن و طبعا استهلاك البنزين اعلى بس مش اوى

ثانيا المميزات بقى حدث و لا حرج:-
السحب الى بقى حاجه جامده اوى ماشاء الله خاصه بعد صيانه الالف و جيبت بيها 150 عالمحور بسهولة

العربيه واسعه جدا وكذلك الشنطه و الشكل الخارجى وهم ما شاء الله و عاليه عن الارض

الفرامل حدث و لا حرج و دى اكتر حاجه حاببها فالعربيه بتقف فاقل مسافه فاقل وقت باقل مجهود منك و كمان بتقف بهدوء مش بتكفى عالوشك لا عادى كانك بتهدى حتى لو بتدوس جامد

الانوار كويسه سواء الوسط او العالى و المرايات الجانبيه مغطيه مساحه كبيرة و كذلك مرايه الصالون و ظهر العربيه العالى مش ماثر فالرؤيه

السنسور كويس اوى و عملى و صوته معقول بس لو مشغل الكاسيت لازم توطيه عشان تسمعه

العزل بتاعها جامد جدا انت جوه مش سامع حاجه و مفيش هوا بيدخلك

التكييف اداؤه اتحسن مع الوقت (من قبل صيانه الالف) و بيسقع جامد و فالصيانه عملوا الهوايات الى كانت بتدخل هوا سخن

الكراسى بقت افضل و مريحه او انا اتعودت عليها لكن فكل الاحوال مش بشتكى منها

العفشه ما شاء الله كويسه ساعات بتبقى ناشفه وساعات بتبقى طريه حسب الطريق والهوا فالكاوتش و كان صاحبى معاه رينو سانديرو ساق عربيتى قالى عفشتك احسن من عندى

اخر ملاحظتين ان الحمد لله فبره التنك عندى ماكسرتش و ده عشان كل ما اروح بنزينه انا الى بنزل اقفله بايدى تانى حاجه ان لمبه تشيك انجين منورتش عندى و ربنا يسترها

فنهاية التقرير انطباعى عن العربيه بيبقى بناء على امكانياتها و مشاكلها على سعرها و انا شايف انها حاجات ممكن تكون مش بسيطه اوى لكن ماتزعلش اوى يعنى مش مثلا فتيس فيه مشكله او دورة تبريد بايظه الحمد لله العربيه مشاكلها فالمعقول و لازلت انصح اى حد بيفكر يجيب عربيه فحدود ال85 الف انصحه بالامجراند7 لانها فعلا اعلى اوبشن فالفئه السعريه ديه ومش هيندم

و كل سنه وانتوا طيبين