الموضوع: قياس Ground Clearance for Corolla 2014

السلام عليكم ورحمة الله وبركاته

كنت بالامس فى زيارة للتوكيل فى التجمع الخامس وذلك لتغيير زيت الفرامل وزيت الفتيس بعد 85 الف كيلو لمعشوقتى كرولتى.

المهم ما زال الاقبال كما هو بل بالعكس بيزيد والمبيعات ما زالت فى الطالع وتقريبا وصل البيع الرسمى الى 60 عربية والحجز الى 108 عربية ربنا يبارك للجميع.

المهم قلت انتهز الفرصة وأقطع الشك باليقين بالنسبة للخلوص (الجراوند كليرانس) لاقيت 3 رجال ما شاء الله احجام ووزن يتعدى ال 110 للفرد تقريبا يعنى المهم ركبوا العربية فتوجهت اليهم وقلتلهم زى ما انتوا وجبت ورقه ونزلت تحت العربية (بصراحه اتكسفت بس علشان خاطر عيون زمايلنا هنا مش مهم) وقمت بالقياس من امام العجله الخلفية بحوالى 5 سم يعنى من تحت الكنبة الخلفية بالظبط وكانت المفاجأه ليا ولجميع الواقفين ومنهم ناس بتتفرج على العربية انى الارتفاع كان 14.5 سم وهم بالداخل وطلبت منهم ينزلوا وقمت باعادة القياس من نفس النقطه وكان الارتفاع 15.4 سم

الظريف بقى انى اللى كانوا جوا العربية نزلولى وجم ورايا وانا بأقيس بالمسطرة ولاقيت ناس تانية وراهم وبعد ما شافوا معايا لاقيتهم بيقولوا لمندوب المبيعات عاوزين اتنين فضى (حسيت انهم بيحجزوا بنطلونين مثلا )

حبيت انقل هذه التجربة للجميع لعل يكون فيها افادة وحبيت ان اتاكد انى 12.5 سم خلوص اللى مكتوبه فى البروشور بتاع العربية فعلا متاخد القياس من عند علبة الشكمان فى الخلف وهى ديه اوطى نقطه فى العربية وفعلا قستها لاقيتها 12.5 سم تقريبا.

تقبلوا تحياتى ولعل التجربة تنول اعجابكم وتفيد اى حد هنا فى بيتنا الجميل وهو منتدى نايل موتورز.

والسلام عليكم ورحمة الله

تقبل تحياتى مرة اخرى

المشاركة الأصلية كتبت بواسطة ahmed travco

معلش يا سيدي الفاضل... انا لما استلمت عربيتي من المعرض رحت على طول اقيس ضغط الهوا لاني كنت مسافر مشوار طويل بعد يومين... الراجل في البنزينة كان بيضرب كف على كف لما لقاها 55... ايوة 55 بالظبط... وحتى قالي ان العربيات بتبقى طالعة كده من مصنع بلادها تحسبا لظروف الشحن وتغيير الجو وغيره... ده اللي قاله!!