الموضوع: المختصر المفيد فى الفرق بين المستعمل والجديد

السلام عليكم

اليوم هاعمل موضوع للمقدمين على شراء سيارة ومحتار بين انه يشترى مستعمل أو جديد

هتلاقى هنا الدليل المؤكد والمفيد فى كيفية اختيار اما المستعمل أو الجديد

الأول هنسرد مزايا وعيوب كل منهما - ثم نضع الدليل الذى ياتباعه تقرر ماذا تشترى

مزايا الجديد (الزيرو)
1- مضموووون الى حد كبير (لأن بعض الحالات رصدت لسيارات مخبوطة وهى زيرو واتصلحت واتباعت على انها فابريكه وبعض حالات أخرى كانت غرقت بره من الفيضانات اللى كانت فى جنوب شرق أسيا واتصلحت وجاءت على انها زيرو برضه)
2- حرية أختيار اللون الذى تحبه (دائما أقول أن السيارة لون - زى الكورة أجوان)
3- حرية أختيار فئة الكماليات التى تناسبك
4- تمتعك بها وهى مفيهاش مشاكل من اول يوم والى فترة كبيرة زى مثلا خمس سنين الى عشرة بحسب النوع والجودة (الصينى مش زى الأوروبى مش زى الكورى وهكذا)
5- تمتعك بالضمان وبعض عروض الصيانة
6- أنت أول واحد يركبها ويسوقها وده أحساس تانى (زى اللى بيجوز عروس بكر) وريحة الفابريكة ليها برضة حلاوة
7- ممكن تأمن عليها من أول يوم

عيوب الجديد (الزيرو)

1- غالى - أغلى طبعا من المستعمل لو نفس السيارة والنوع والموديل
2- بتخاف عليها جدا - وبتكون مرعوب من انها تتخبط أو يجرى ليها حاجه
3- سعر اعادة البيع بتخسر فيه جامد - يعنى لو جبتها وبعدين طلع حظك فيها وحش او لم تعجبك فى سواقتها أو حصلك ظروف واضطريت تبيع بتخسر مش اقل من 10 الى 20 الف فى سنه واحدة على الأقل وفيه سيارات بتخسر بال50 وال60 الف جندى زى البى ام والمرسيدس
4- مع اول خبطة او تجريحة بتحس انك زعلان قوى ونفسيا متغاظ وخاصة لو كنت مش انت السبب - يعنى واحد خبطها وهى راكنه - واحد ضربهالك مفتاح وكده
5- بتاخد وقت فى الترخيص ممكن يوصل من أسبوع الى 20 يوم حسب الوكيل أو البائع والأفراج الجمركى وكده يعنى لو عاوز تركب على طول مش هينفع
6- بتاخد مشاكلها من الأول يعنى لما موديل جديد مش متجرب بيحصل فيه مشاكل بعد وقت معين طال أم قصر وانت بتشترى على السمعة فبتلبس لبسه محترمة وبتضطر تبيع أو تبلعها بالعافية وتعيش على عيبها (مثال الجيتا 2010 ومشكلة الجيربوكس - التويوتا الجنوب أفريقى ومشكلة الجيربوكس - الرينو الميجان ومشاكل متعددة - الأوبل فيكترا 2008 ومشكلة الجير بوكس و غيره كتير )

مزايا المستعمل
1- أرخص من الزيرو طبعا
2- تمشى بيها من اول يوم بمجرد عمل التوكيل اللى مبياخدشى ساعة
3- بتشترى عن سمعة وتجربة يعنى بتبعد عن اللى فيها مشاكل وحتى لو أشتريت اللى فيها مشاكل بتبقى عارف وعامل حسابك فى فرق السعر وصياناتها منين وازاى تعالج مشاكلها أو على الأقل مستعد نفسيا ولو بعت مش هتخسر زى الزيرو
4- مش هتخاف عليها زى الزيرو لأنها مستعمله
5- لو السيارة كسر زيرو بتستمتع بالضمان الباقى وببعض من ريحة الفابريكة وأيضا من الباقى من عمرها
6- ممكن تكسب فيها عند البيع أو على الأقل متخسرشى لو حبيت تبيع
7- تقدر تغير كل شوية سيارة - عندك الأوبشن ده لأنك لو جبت جديد هتخسر كتير قوى لو غيرت لكن مع المستعمل ممكن تغير كل شوية بأقل الخسائر

عيوب المستعمل
1- مش مضمونة (ممكن تكون عاملة حادثة ومتوضبة بحيث تخدع أى حد - أو فيها مشكلة مش هتبان الا لما تسوقها كتير زى مشاكل الجير بوكس والعفشة والسخونية )
2- اللون مش هتقدر تتحكم فيه - السوق هو اللى هيتحكم فيك
3- هتحتاج مصاريف اكتر من الزيرو (كاوتش - بطارية - تضبيط عفشة - شحن فريون - ضبط زوايا - تغيير سيور - الخ الخ)
4- هتتعرض للخداع من التجار المقرفين خاصة فى السعر المناسب لسيارتك - وتيجى تبيع تلاقى نفسك اتخدعت وسيارتك كان المفروض تشتريها بأقل من كده علشان لما تبيع متخسرشى كتير
5- ياهتلاقى اللون مش هتلاقى الأوبشن اللى انت عاوزه - يالعكس - يأما هتلاقى اللون والأوبشنز بس مش الموديل اللى انت عاوزه - وهكذا
6- مش انت الأول فى حياة السيارة وده احيانا بيمثل مشكلة نفسية عند بعض الناس زى اللى أتجوز واحدة متجوزة قبل كده واحد أو أكتر

بكده نبقى خلصنا المزايا والعيوب لكل منهما - لكن ياترى فيه دليل استرشد بيه انا هينفع معايا ايه ؟ ايوه أنا عملت لك دليل سهل وبسيط جدا - فقط اتبع هذا الدليل وانت تقدر تقرر قرارك الخطير فى شراء سيارة المستقبل .

يتبع