الموتور بيسرب زيت داخل الكربيراتير

**basem74** · 10-10-2013 04:22 PM

السادة خبراء الماروتى
تحية طيبة لكم وكل عام وانتم بخير

أنا معايا ماروتى 2008 أستعمال هذا الشهر تكون قفلت خمس سنوات أن شاء الله ،
لاقتها منذ اسبوعين مخنوقة جدا فى المشى أخرها كان 50كم وبطلع دخان كتير من الشكمان مع الغيار التالت عند طلوع اي كبري،
بلأضافة ألى أخر مرة غيرت زيت من اسبوع لاقيت الزيت نازل اسود وقليل جدا اقل من لتر،

ورحت لمكانيكى غير البوجيهات وأبلتين وفلتر بنزين ثم فلتر هواء ولاكن عند فتح الكربيراتير لوحظ زيت متسرب فية ،
وقال لى كان فية حد بتعلم على العربية ؟ لأن الموتور محتاج نصف عمرة أو ممكن تكون عمرة كاملة ،

فقلت أخذ برئي حضرتكم وأنتم أهل الخبرة أصلا ،
قبل ما أخد أي قرار أو حتى أروح لحد تانى يبص عليها ،
دي أيام عيد وخايف تفتح معايا
أرجو المشورة منكم وفى أنتظار ردكم
ولكم وافر الشكر والتقدير،،،

أخوكم باسم سعيد

**aldesha989** · 10-10-2013 04:55 PM

اللى اعرفه ان الزيت لما يدخل الكربراتير بيبقى من القرص على العربيه بس كون ان الزيت اللى نزل اقل من لتر معنى كده ان الزيت بيتحرق منك وانتا ماشى اكيد البوجيهات طالعه معرقه زيت يبقى طقم شنبر ولو المايه بتنقص يبقى وش سلندر كمان

**basem74** · 10-10-2013 05:10 PM

شكرا يا باشا على ردك الكريم ،
الحمد الله المية مش بتنقص ، ولا العربية بتسخن ،
وبالنسبة لموضوع الزيت للأسف بقالى كتير لما بغير زيت بيحط 3 لتر فقط للموتور
مع أنى أول ما جبتها كانت بغير زيت فى بنزينة وكان بيحط الجركن كلة 4 لتر
الميكانيكى كان موصل خرطوم للي طالع من الموتور واصل لتحت بس طلع دخان كتير جد
وبقى يحرجنى خاصة فى الأشارات والزحمة فقررت أن أرجع تان وأوصل على الكربيراتير مباشرة

وربنا يسترها
مرة أخري شكرا للأفادة

**saddam** · 10-10-2013 06:10 PM

صديقي المواطن
طلع الخرطوم.بره تاني ﻷن.تبخير الزيت خلاص حيقفل الكربريتير وحتعطل ويؤسفني أقلك إنك خلاص لازم تفتح مكنة و 40% ممكن.تنسد بطقم شنبر ولكن 60% الشنبر مش كفاية وحتعمل عمرة.عوضك الله بالخير خلص العيد بيها وإتكل على الله لميكانيكي يخاف الله وإشتري حاجتها بنفسك
ودمتم للنضال

**lidosasa** · 10-10-2013 06:34 PM

المشاركة الأصلية كتبت بواسطة basem74

وبالنسبة لموضوع الزيت للأسف بقالى كتير لما بغير زيت بيحط 3 لتر فقط للموتور
مع أنى أول ما جبتها كانت بغير زيت فى بنزينة وكان بيحط الجركن كلة 4 لتر

يا بيه اللى حضرتك عملته فى عربيتك ده حرام وإنت اللى جنيت عليها العربية بتاخد 2.5 كيلو زيت لو مش حتغير الفلتر ولو حتغير الفلتر يبقى 2.75 يعنى 3 لتر إلا ربع وحضرتك بتحط 4 لتر من أول ما جبتها . إقراء الكتاولج حتلاقى تحذير إن الزيت الزيادة مؤذى زيه بالظبط زى ما يكون العربية مفيش فيها زيت

**alking_2006** · 10-10-2013 09:51 PM

كدا لازم طقم شنبر على الاقل و فى الغالب كمان موضوع الزيت اللى 4 لتر دا ممكن يكون ضرب الاويلسيلات (كرنك امامى - كرنك خلفى - كامة)

**Amr Axel** · 10-10-2013 10:52 PM

يا ليلة بيضا 4 لتر ؟؟؟؟!!!!! ده انا اتصدمت يوم ما يكون صنايعي بيغير زيت و مش فاهم بيحط 3 لتر و اقل واجب ترزعه ع قفاه بسبب غبائه لأنه المفروض صنايعي و شغال في العربيات و فاهم لكن يحط 4 لتر ده المفروض يتعلق و يتسلم تسليم اهالي 4 لتر ليه هو موتور 1600 سي سي
الموتور عندك بالفلتر مبياخدش غير 3 لتر الا ربع يعني 3 لتر كتييير جداا كمان ع الموتور و زعلان انها عملت كده !!! كده يا باشا الموتور داخل في عمرة اقل الخساير طقم شنبر و الله اعلم ايه تاني اتأثر و خلي بالك لو مشيت بالعربية الزيت اقل من المستوي الصحيح الدنيا هتخرب جوة و هتشيل الموتور ترميه و تجيب غيره
نصيحة روح خلص عربيتك قبل العيد لأن العمرة دي بتاخدلها يومين او اركنها لبعد العيد و قضيها مواصلات لحد ما تظبطها عشان متعملش معاك حركة نص كوم في العيد و مش هتلاقي اللي يلحقك