أنا كنت في نفس الحيرة زيك من حوالي سنة، كنت عايز موديل 2008 و2009 بسبب رخص السعر، بس لقيت آراء كتير متضاربة عن الفتيس الـ mmt، خصوصًا من الأعضاء اللي "مالكين" الجنوب أفريقي اللي فيها فتيس mmt، ما بين واحد يقول إنه تأقلم على الفتيس وبيعرف يتعامل معاه، وواحد بيشتكي من مشاكله وفي معاناة ومشاوير مستمرة للتوكيل، وما بين واحد يقول ده تكنولوجيا ايش فهمكوا انتوا (وهو مش مالك العربية أساسا) وما بين واحد عايز يجمع ناس ويرفع قضية على التوكيل، وواحد يقول إنه كان حاجز العربية زيرو واتفاجئ بالفتيس واتصدم ولبس العربية من التوكيل، وواحد يقول إن العربية قعدت معاه فترة ذاق فيها الأمرين وما صدق خلص منها وباعها، وواحد يقول الفتيس معايا زي الفل الناس اللي مش فاهماه، وهكذا دوامة لا تنتهي من الآراء. وحتى لو التوكيل بقا بيحل المشاكل ويتحملها، أنا واحد من الناس بشتري راحتي أهم من العربية، مش عايز أبقى زائر دائم للتوكيل واتعرف عليه وابقى صديق دائم للمهندسين اللي هناك، كل شوية الفتيس يعمل حاجة أروحلهم ويقولولي فينك يا راجل اتأخرت علينا ليه بقالك كتير مبتجيش كنا لسه هنتصل بيك :)
عشان أخرج من الدوامة دي، قررت بعد تفكير طويل إني أزود شوية فلوس واطلع لموديل 2010 جنوب أفريقي (توكيل مش خليجي)، فتيس أوتوماتيك عادي بدون أي مشاكل (من أول 2010 وانتا طالع انتهت قصة الفتيس الأعجوبة mmt) والحمد لله كان قرار سليم.
في رأيي المتواضع، لو المبلغ المعاك ينفع يزيد عن 110 ألف ودماغك في الكورولا، فكر في موديل 2010 كورولا، وطبعًا هتزود المبلغ حسب انتا عايز أول فئة (أوبشن قليل)، أو الفئة التانية فول أوبشن، أو الهايلاين (مفتاح ذكي (ستارت إنجين) وإضاءة زينون وطارة مالتي وحساسات إضاءة وحساسات مطر وتكييف تاتش وكمبيوتر رحلات (عدادات أوبتيترون) وبخاخات للفوانيس و6 سي دي تشانجر وجنوط سبور ومثبت سرعة ومراية تعتيم وإيرباجز أكتر إلخ) . الهايلاين 2010 جنوب أفريقي هتعدي 120 ألف لو حالتها كويسة.
ولو المبلغ اللي معاك في حدود 80-90 ألف، مش هيبقى قدامك غير الـ 2008-2009 الجنوب أفريقي بالفتيس mmt، وفي الحالة دي أنصحك تصرف نظر عن الكورولا وتفكر في عربية تانية.
ده رأيي ونصيحتي من واقع تجربتي، ونفس الموقف اللي كنت فيه والحيرة اللي مريت بيها، والنصيحة لوجه الله، والله أعلم.
المفضلات