الموضوع: تقرير سريع على الياريس السيدان 2014

السلام عليكم و رحمة الله و بركاته
بعد يومين من استلام السيارة الياريس السيدان احب انقلكم انطباعي المبدئي عن العربية
انا مش هانقل الكلام اللى فى البروشور بتاع العربية عشان ده موجود عل الموقع بتاعهم و ممكن تقروه لوحدكم
Toyota - Yaris Sedan Specifications

انا معايا الفئة الاولى اوتوماتيك استلمت من ابو رواش العربية كانت عاملة 40 كم و لمبة البنزين منورة و فولت من موبيل اللى قبل البوابات
ضغط الكاوتشات كان كبير و ظبطه فى البنزينة على 30 بعد ما سألتهم هناك ( قايم العربية مكتوب عليه 21/22)
ال4 كاوتشات دانلوب 15
الحاجات اللى جاية مع العربية 4 طاسات و شنطة عدة و استبن و مسمار قطر و كوريك متثبت تحت الكرسي و طفاية سجاير و كتيب ارشادات عربي/انجليزى.

السيارة من الخارج:
عالية عن الارض - الخلوص 14.5 سم انا مقستوش للامانة بس انا عديت على مطبات حلوان المشهورة و محكتش.
الصاج بتاع العربية محمل مش خفيف - صاج السقف فى تكريب خفيف مش عارف ده تقوية و لا علشان مقاومة الهوا
عزل الموتور ممتاز و العربية متقفله كلها من تحت
ورا الاكصدام فيه قايم حديد متوصل فى الشاسيه و ورا القايم بمسافة يجي الريداتير - لا قدر الله فى حالة حدوث صدام من الامام الاجزاء الداخلية بعيدة شوية عن الضرر.
من الداخل
الفرش بيج التابلوه شكله عاجبني-و دى اذواق طبعا - انما الخامات كويسة
3 عدادات - سرعة - RPM- بنزين
مافيش عدادحرارة - انما فى لمبتين بيان واحدة زرقاء بتفضل منورة لحد ما العربية تسخن و واحدة حمراء بتنور و تطفى لو العربية سخنت و بتفضل منورة لو الحرارة اصبحت كبيرة و لازم تقف.
الصفارة بتعات الحزام بتفضل شغالة دقيقتين و بعد كده بتعرف ان انت مصري و تقف :)
تانك البنزين 42 لتر و اللمبة بتنور لما يوصل 7.5 لتر
الشاشة اللى فى التابلوه فيها الساعة و عدد الكيلومترات المقطوعة و فى زرار تدوس عليها يعرض مسافة الرحلة و ممكن تحسب رحلتين
الكاسيت صوته حلو و فيه مدخل USB-AUX
فيه مسند بين الكرسين و فيه مكان تخزين
العربية واسعة من وراء و من قدام و الشنطة مساحتها كبيرة
الفتيس الاوتوماتيك فيه L-2-3-D-N-R-P و لمبة الاستهلاك الاقتصادي بتنور فى حالة الوضع D بس و بتتطفى بعد سرعة 130 كم/س
العربية طبعا زى ما انتم عارفين 1300 سي سي و الموتور قدرته 84 حصان - ناس كتير شايفة الموتور تعبان - اعتقد اللى ساق 1600 او2000 سي سي هيحس بفرق طبعا - بس على فكرة الفرق مش كبير العربية سحبها كويس جدا رغم انى بالين و معدتش 3 RPM و السرعة معدتش 90 الحاجة الوحيدة للامانة و انا باخد مطب باحس ان العربية ضعيفة بس بعد كده السحب ممتاز
ملحوظة : العزم الاقصى للياريس 121 /4400 و موتورها 1300 فى حين ان البيجو ال 301 موتورها 1600 سي سي و عزمها الاقصى 110 و المعلومة من موقع كونتاكت كارز
http://www........cars.com/newcars_p...3581#specs_tab
الفتيس ناعم و مش بتحس بالنقلات
العفشة ناعمة و الناس اللى ركبت ورا كانوا مبسوطين
طبعا ممكن تفتكروا انى فرحان بالعربية و باقول مميزاتها بس --انا قلت ده بعد 48 ساعة يعنى طبيعى متظهرش عيوب و الا الناس دي تبقى بتهرج. و عموما لينا لقاء تانى مع صيانة ال 1000 كم
العيب الوحيد بالنسبة لى لحد دلوقتى انى فعلا حاسس ان العربية دى المفروض تبقى ارخص شوية بس هما معتمدين على الاسم بتاع تويوتا بشكل كبير
لو فى موضوع على طريقة رفع الصور يا ريت حد يحطلى لينك له و يبقى مشكور

اتمنى اكون اضفت حاجة و دعواتكم ربنا يكفينى شرها و يدينى خيرها

الف مبروك ربنا يديك خيرها ويكفيك شرها