الموضوع: احمد و سوزى

بعدها بيومين قولت اخرج بقى اشم نفسى . و حظى الاسود وقعنى فى مدينة نصر تزامناً مع مظاهرات الشعرية .
طبعا العربية صوت ماتورها كان بيقولى كلام قبيح و حاجات مترضيش ربنا يا بيه . و فى الاخر عملت معايا الجلاشة و سخنت و حلفت ماهى ماشية . قومت منزل الناس الى معايا ركبتهم تاكس يروحوا و كانت الساعة 12 بالليل .

.. فضلت بقى واقف مع العربية لحد ما هديت و بردت و فتحت الريداتير لقيت الجلدة بتاعة الغطا بتاعته مقطوعة . و طبعا بناءاً على كدة ضغط المياه فى الريداتيور مش مظبوط و المياه بتغلى و تدخل على القربة و تتتبخر منه . + كمان ان التاكيات عايزة تتظبط و العربية صوتها عالى و دة لوحده يخلى المكنة تولع و المياه جواها تبقى بتتقطع مش بتغلى بس
لكن ايه السبب ان الجلدة تتقطع !
السبب يا سيدى انها لما جابت جوان وش سلندر فى زيت دخل ع المياه و دة الى بوظ الجلدة بتاعة الغطا .

فضلت ماشى بقى تاتا تاتا واحدة واحدة و كل شوية ازود مياه لحد ما وصلت للبيت . راجع بيتى الساعة 2 و نص بالليل

تانى يوم قولت اروح للميكانيكى يظبطلى التاكيات و يقرطلى على وش السلندر .
و انا ماشى عديت على عادل عواد بتاع قطع غيار اليابانى الى فى عين شمس و جبت منه غطاء ريداتير انجليزى ب 25 جنيه . و للأسف مفيش غير النوع دة الى موجود فى السوق .

.. ركبت الغطاء و روحت لاسطة رمضان الميكانيكى . خد يا عم اظبطلى التاكيات دى العربية بتولع منى و انا ماشى .
ظبطها . تمام التمام . العربية صوتها هدي . خدتها و مشيت .

مسخنتش معايا و انا فى الطريق . تانى يوم نزلت بصيت ع المياه لقيتها زى ما هى منقصتش .

الحمد لله .

عايز اروح اكتوبر بقى ازور الناس الى هناك . نزلت اخدت عربيتى السوزوكى التو موديل 2008 الـ 800 cc و قولت اتدنجل لحد مدينة الشيخ زايد .
و انا ماشى ع المحور بقى ادوس بنزين شوية الاقى العربية سحبها بيقل و مؤشر الحرارة بيعلى و اسمع صوت تسقيف !
اخف بنزين الاقى مؤشر الحرارة رجع تانى مكانه فى نص الشجرة و الدنيا هديت .
على المطالع العربية متكلبشة و حاسس انها بتتجر و صوت تسقيف !
.. الجميل فى الموضوع ان المياه مش بتنقص و ان المروحة شغالة . هتقولى عرفت منين انها شغالة ! هقولك لما لقيت المؤشر بتاع الحرارة على ركنت العربية و سبتها دايرة و نزلت فتحت الكبوت لقيت المروحة شغالة !

قولت لاء بقى مبدهاش .
و انا فى الطريق مروح عديت على الراجل بتاع الريداتيور الى فى الشارع الى قصاد مستشفى منشية البكرى و الى وصفلى الراجل دة ناس حبايبى .

كان قاعد فى الورشة شاب محترم اسمه ابراهيم .

سلامو عليكم ياسطة ابراهيم . عايزك تبصلى على دورة التبريد عشان العربية بتسخن منى جامد و انا ماشى .

قام ابراهيم الله يكرمه فاكك المروحة و الريداتير و كشف ع الريداتير لقاه سليم . مش مسودود . مش مخروم . قام منضفه من برة بالفرشة و مركبه .
جرب تقليب المياه . لقى المقلباتى شغال .
طب يمين شمال . !!
قالى بص .
الريدايتر مفهوش حاجة انت تروح لكهربائى تخليه يشوفلك السينسور بتاع المروحة ممكن تكون المروحة بتشتغل متأخر .
- كام حسابك يا باشا !
- 30 جنيه .
ادتله ال 30 جنيه و راضيته و انا بدعى على ابن الهرمة الى اخد منى 70 جنيه و معملش حاجة :/

روحت للكهربائى قولتله انبى اباشمهندز العربية بتسخن و روحت للراجل بتاع الريداتير قالى دورة التبريد سليمة و روح للكهربائى خليه يشوفلك الحساس بتاع المروحة .
الراجل بص و جرب و شاف و عاين .
قالى المروحة زى الفل و الحساس شغال و مفيش اى مشكلة .
- طب امال ايه ؟
قالى هى بتعمل ايه معاك العربية ؟
قولتله سحبها ضعيف و بتسخن جامد و لما اجى اطلع على مطلع او كوبرى بتسقف .
قالى روح غيرلها اسطوانة دبرياج .

..

كان معايا واحد حبيبى .
خدنى و روحنا لميكانيكى تبعه .
يا عم الميكانيكى دلوقتى العربية دى لسة مغيرلها جوان وش سلندر . و بتسخن جامد . و سحبها وحش و بتسقف .
روحت لبتاع الريداتير قالى الدنيا شغالة روح للكهربائى .
روحت للكهربائى قالى الموضوع خرج من ايدى روح للميكانيكى خليه يغيرلك اسطوانة

ايه رأيك يا عمو الميكانيكى !

الميكانيكى ركب العربية و مشى خطوتين كدة . و قام نازل قالى اه . انت عايز طقم درياج .
الدبرياج عندك متاكل عشان كدة عزم العربيه كله ع الماتور و بتسخن منك جامد .

طب تقضى بكام الليلة دى ؟
قالى ممكن املالك الاسطوانة و الدنيا تتلم هتتكلف 400 جنيه .
- طب و لو جبتلك طقم الدبرياج ؟
قالى هاخد مصنعية 150 جنيه .
طقم الدبرياج الفاليو ب 400 جنيه حسب سعره المكتوب هنا فى المنتدى .

قولتلوا طب يا باشا الله يكرمك هشوف هعمل ايه و هرد عليك . و اخدت عربيتى و مشيت .

مانا اصلى مش هسلم العربية لواحد معرفهوش ! و بعدين مقتنعتش اصلا بالى هو عمله ! هو لحق عرف ان فيها طقم دبرياج ؟

ركنت العربية و قومت نازل النهاردة الصبح لاسطة رمضان .
خد ياسطة اركب . العربية بتعمل معايا كذا كذا كذا . و الريداتير سليم و التبريد شغال و كل شئ على ما يرام .
الاسطة ركب و اعدنا نكروز بالعربية فى شارع ترعة الجبل فى الزتون .
قالى يا معلم العربية دى فى حاجة قافشة فى العجل هو الى عاملها كدة .
طب ياسطة انا لسة مغير طقم تيل فرامل و طقم اساتك !
قالى سيبها بس العجل يبرد و اشوفلك ايه الى قافش فيه .
طب ياسطة انا امبارح روحت لميكانيكى قالى عايزة طقم دبرياج !
قالى لاء طبعا الدبرياج ماله و مال سخونة العربية !
العربية متكلبشة عشان كدة مبتسحبش معاك و طبعا بتاكل بنزين و بتسخن .

طب ياسطة العربية معاك اهى . اعمل الى انت عايزه . المهم تكلمنى و تقولى فيها كذا و هيتكلف اد كدة .

سلام عليكم . سلام عليكم .

و العربية دلوقتى انا سايبها عنده معرفش وصل لـ ايه فيها ولا اشتغل ولا لاء اصلا و بكرة الصبح باذن الله هنزله .

و انتوا عاملين ايه دلوقت ؟