الموضوع: قطع غيار اوبل فكترا

انا اسف للتأخير بس ظروف الشغل حاجة فل ...

وقبل اى حاجة انا بشكر فادى على تعبه ومجهودة وهو صاحب الفكرة وهو اللى كبرها فى دماغى وهو اللى شرحلى الطريقة من اول فك القوايم لحد لزق السقف


طبعا شكل السقف الاّيل للسقوط وطريقة الفك واللزق مش هلاقى احسن من موضوع فادى للشرح فا مش هزود عليه
نايل موتورز - NileMotors.net (كيفيه تغيير فرش السقف لفيكترا b بالصور ..)

بداية الموضوع انى جبت القماش من محل فى الحرفيين , قماش ستوفة امريكى نفس لون الفابريكة بـ 50 جنيه للمتر و 3 علب غرا

بعد كده فكيت السقف .. فك السقف مياخدش نص ساعة سهل جدا , انك تطلعه من العربية حاجة تقرف بصراحة ربنا يسامح اللى عملها :)

بعد كدة شلت القماش القديم وحتة صنفرة وفرشاة ناعمة ونضفت مكان السفنج القديم من السقف وبعدين بالمكنسة شلت البواقى والتراب من على السقف ... بعدين اديت السقف كله بطانه غراء ودى اخدت اول علبة وسبتة يومين ينشف

بعد مالبطانة نشفت ابتديت الزق القماش بنفس الطريقة اللى قال عليها فادى , اهم حاجة بعد اللزق تضغط على القماش كويس ... بنفس الطريقة كملت باقى السقف , ارخم حتة المنطقة اللى فيها الشماسات عشان فيها تنيات كتير

بعد ماخلصت السقف سبته اسبوع على ضهره ياخد راحتة على الاخر لحد لما ينشف تماما ... بنفس المنظر ده





طبعا زى ماكان خروج السقف من العربية مقرف فا دخول السقف مقرف جدا جدا لأن القماش جديد وعمال تحسس يمين وشمال عشان ميحصلوش حاجة...

نسيت اقول انى قبل التركيب جبت منظف فرش armor all


ونضفت بيه القوايم والشماسات ومقابض السقف علشان التركيب يبقى على نضافة... ماهو اللى اتلسع من الشوربة ينفخ فى الزبادى

ملحوظة:
ضفيرة السقف فيها سلوك عند مقابض السقف للابواب الخلفية علشان اللى عايز يركب مقابض البى 2 اللى فيها نور صالون

طبعا فرق شاسع بين المنظر قبل وبعد حاسس ان العربية رجعت جديدة :)