الموضوع: تجربة ناجحة لآعادة أحياء العفشة لحالة الزيرو

[OVERLINE]بسم الله الرحمن الرحيم
[/OVERLINE]

انا بقالي فترة في فكرة في دماغي كان نفسي أعملها وكل مقول لحد عليها يقولي الموضوع مش مستاهل وحتكلف كتير من فلوس ووقت وملهاش لازمة وكلام كده

والفكرة دي خاصة بالعفشة وهي عبارة عن فحص كامل للعفشة بس مش وهي راكبة في العربية لآ
ولكن حلها بالكامل وتفصيصها زي مبيقولوا حته حته والكشف عليها

وطبعا الكلام ده كده يبان انه موال وفتوحة ولكن عند التنفيذ أكتشفت فعلا ان الموضوع الكل بيهول فيه اكتر من اللزوم

والحمدلله فعلا نفذت الموضوع ده

حالة العفشة قبل : صوت تزييق بيجي ويروح مع المطبات والحفر مع صوت نحرة عند لف الطارة سواء ماشي او واقف مع احساس بعدم تماسك في الجزء الامامي من العربية ومسمع في الطارة مع رجة في الطارة عند اي مطب او حفرة وعدم الاحساس بنعومة العربية المعروفة وعند الكشف في اكتر من مكان اللي يقولي المساعدين بايظين وعايزين يتغيروا واللي يقولي الاسكترا بايشة وأفلام هندي كتير بقي تخشلها في مصروف محترم

وفاتفقت مع الصنيعي اللي بتعامل معاه وحددنا يوم يكون فاضي فيه وروحتله من أول النهار من الساعة 1 الظهر تقريبا

[OVERLINE]وتم عمل الآتي :-[/OVERLINE]
تم فك المساعدين الامامي بالكامل من البطاحات وحتي الطنابير

ثم تم فك البطاحات وهي عبارة عن جزئين جزء علوي يتم ربطه في فخذه العربية بـ 3 مسامير وجزء سفلي مربوط بالجزء العلوي برمان بلي

1&2&3 دول الجزء العلوي
4 الجزء السفلي اللي فيه الرومان بلي
بعد فك الجزئين تم تنضيفهم وغسلهم جيد جدا وبعد التاكد من نضافتهم تم تشحيم الرومان بلي لان الشحم كان قليل وكانوا مليانين تراب وبالتالي
(يعمل صوت نحرة كده مع لف الطارة)
وبكده يبقي خلصنا البطاحات

بعد كده تم فك الياي والكاوتش البيانو والاولسيل بتاع المساعد وكاوتش الصدادات
وطبعا كاوتش البيانو كان مقطوع وتم تغييره ووظيفته انه بيقفل الجزء بين البطاحات وحتي اولسيل المساعد وبالتالي يمنع دخول التراب في البطاحات وعند اولسيل المساعد

كاوتش الصدادات نفس الكلام كان في قطع برده وتم تغييره وده شكله


المساعد بقي نفسه والياي فكانو كويسين الحمدلله وتم تنضيفهم وصيانتهم مش اكتر

بعد كده تم فك الطنابير وتيل الفرامل والاجهزة وتم تغيير التيل لانه بدأ في التأكل وتنضيف الباقي
( كانت بتعمل صوت تصفير يجي ويروح مع صوت نحره برده عند ضغط الفرامل)

وبكده تم الانتهاء من المساعدين بالكامل
وطبعا بعد الغسيل والتنضيف وتركيب الكاوتش من بيانو وصدادات كان شكلهم رائع اكنهم رجعوا زيرو

بغد كده تم حل الكبالن وتغيير الكاوتش الخارجي والشحم طبعا لان الكاوتش بيجي معاه الشحم والاولسيلات بتاعته والحمدلله الكبالن كانت كويسة
( لان الكوبلن لو سليم وجديد والكاوتش تعبان يبقي حيتقطع وحيبوظ الكوبلن في وقت قصير جدا )


بعد كده تم الكشف علي بيضات المقص والدريكسيون فلاقينا كاوتش بيضات المقص مقطوع فتم تغيير الكاوتش مع تغيير بيضة المقص شمال و تنضيف وتشحيم البيضات
( كانت هي اللي بتعمل صوت التزييق مع المطبات)


بعد كده تم الكشف علي جلب المقصات والحمدلله كويسة وده شكلها
( برده لو بايظة حتعمل تزييق جامد)


ثم تم الكشف علي الآسكاترا وجميع الكاوتشات وكلها كانت كويسة مع العلم ان اكتر من واحد كان بيقولي انها بايشة والعيب منها

وبكده يبقي العفشة بخ وتم الكشف عليها بالكامل حته حته والبايظ اتغير والسليم اتنضف واتشحم

الحالة بعد الشغل :
تماسك رهيب في جسم العربية ومحسوس في الطارة
عدم الاحساس بالمطبات والحفر والتكسير بتاع الشوارع بلا مبالغة
نعومة في مشي العربية لاقصي حد
أختفاء جميع الآصوات من تزييق ونحر
يعني من الآخر العفشة رجعت زيرو بمعني الكلمة

التكلفة الاجمالية للموضوع كله :-
بيضة مقص أصلي 130 جنيه
تيل فرامل أيطالي شبه الاصلي 130 جنيه
2 كاوتش خارجي كبالن أصلي 70 جنيه
مصنعية 180 جنيه
يعني أجمالي الشغل 510 جنيه مع ملاحظة اني غيرت التيل كمان أضمن وميتحسبش في شغل العفشة

لو انا مشيت بقي ورا كلام الصنيعية في الاول كانت التكلفة حتعدي 1000 جنيه بمراحل من تغيير سكاترا ومساعدين أمامي وفي نفس الوقت مكنتش حبقي مطمن علي باقي العفشة عاملة ايه والمستخبي منها ظروفه أيه

يعني كده تم توفير التكلفة لآقل من النصف مع التاكد من حالة كل شبر في العفشة
يعني من الاخر تنسي العفشة خالص لمده محترمة من الزمن

بصراحة انا استفدت وفهمت كتير اوي من التجربة دي والنتيجة تستاهل أضعاف المجهود والفلوس اللي اتصرفت

فانصح اي حد بقالوا فترة مشتغلش في العفشة انه يعمل الموضوع ده ويفك العفشة حته حته ويعملها صيانة حتي لو شكلها سليم وحيشوف الفرق حيبقي عامل أزاي ومتمشيش ابدا ورا كلام الصنايعي اللي يعملك فتوحة منغير ميحل ويشوف...