شوية استفسارات مهمة بخصوص فرامل و فتيس البيجو 301

**m.basha** · 01-12-2013 09:54 PM

السلام عليكم الحمد لله استلمت عربيتى البيجو منذ 3 اسابيع تقريبا عندى بس شويه ملاحظات محتاج ابداء الراى فيها من الملاك اولا الفرامل طبعا هى كويسة و كويسة جدا كمان بس لسه ما اخدتش عليها اوى ليه لان لما ببقى ماشى و تبقى فى حاجة محتاجة فرملة جامده شويه بحس ان الار بى ام بيعلى يعنى واحد و نصف مثلا و تحس بشفط هواء كده و كان العربية حاتبطل مش عارف الاحساس ده طبيعى و لا ايه اعتقد ان الفرامل مع الفتيس ده بتخليه يسقط نقلات عشان الفرامل تبقى اسرع مش عارف انا الوحيد اللى بحس بكده مع الفرامل و لا ايه ؟ ثانى حاجة لاحظتها عن الفتيس التوماتيك ان النتشة اللى بيقولو عليها دى اه موجوده بس مش ناتشة هى زى خطفه كده من الاول للثانى او العكس بس الموضوع ده مش مضايقنى و لا حاسس بيه اوى بس السؤال بحس ان مع المارشيدير ان الاستجابة بتاعت الفتيس بطيئة شوية لمدة ثانية كده و خصوصا لما الواحد يكون مثلا مستعجل و بيرجع للوراء و موقف السكة مش عارف بقى ده الطبيعى و لا ممكن فى سوفت وير فى التوكيل بيظبط الكلام ده ؟ اخيرا عشان الناس متفهامشى كلامى انى بشتكى من العربية و حايقوللك خوفتنا و قلقتنا لاء العربية ما شاء الله جميلة جدا و لا يوجد بها اى عيوب حتى الان هى بس شوية ملاحظات مش اكتر لكن بجد العربية كمجمل ممتازة و لو حد نصحنى يجيب ايه فى الفئة السعرية بتاعتها اكيد حانصحه بالبيجو و معلشى طولت عليكم و مستنى ارائكم و شكرا

**Ahmed Amin** · 01-12-2013 10:57 PM

علو ال RPM وأنت بتفرمل طبيعي لأن العربية بتسقط من الغيار اللي هيا ماشية عليه للغيار الأقل,
ولما بتدوس فرامل جامد أو بشكل سريع علي الدواسة والعربية بتسقط غيار بدري وبتكون الكاوتشات لسه ماشية بسرعة أعلي من السرعة اللي ياخدها الغيار دا علي السلانسية هتلاقي ال RPM بيعلي معاك ودا طبيعي ومفهوش أي مشكلة,,
شفط الهواء دا مفهمتش قصدك بيه, لو قصدك في الدواسة فادا هتحسه إن الدواسة ناعمة لأن الأوروبي كدا بس الفرامل مش هتلاقيها ضعيفة, والعربية مش هتبطل,
ولو عايز تجربها وتتأكد بنفسك هات أي واحد من أصحابك بعربية ياباني أو كوري وأطلعو جنب بعض بس في طريق فاضي وميكونش حد جاي وراكم عشان ميلبسش فيكم,, وأول ما تجمعو سرعة 70 أو 80 حد فيكم يزمر ودوسو فرامل في نفس الوقت وهتلاقي إن البيجو بتقف في مسافة أقل من العربية اللي جنبك.

بالنسبة للنتشة اللي هيا أحساس بالنقلة بس من الأول للتاني أحنا كنت أتكلمنا عليها في الموضوع دا وأعتقد أنك قريته معانا, بس خليني أحط اللينك تاني عشان يفيد أي حد يقرأ موضوعك.
http://www.nilemotors.net/Nile/38710...post3875267061
http://www.nilemotors.net/Nile/38710...post3875308810

بالنسبة لل reverse الفرنساوي كله فيه delay حوالي ثانية لما بتديه R لان مفيش عندك زرار تضغط عليه وأنت بتختار ال R زي الكوري والياباني,
والتأخير ثانية دا الفتيس بيتأكد فيه إن العربية واقفة زيرو علي الأرض لان العربية لو بتتحرك لقدام بسرعة ولو متوسطة مش هياخد ال R علي عكس باقي الفتيس الأوتو ممكن ياخد R بالغلط وهيا العربية بتتحرك لقدام والتروس هتلف عكس بعضها وممكن تتكسر,

خد مثال علي دا,
http://www.nilemotors.net/Nile/39050...post3875295010
http://www.nilemotors.net/Nile/39050...post3875295015

خد وقتك في أنك تاخد علي العربية وعلي ما التيل كمان يطبع كويس بما أنها لسه جديدة,
ومبروك علي العربية الجديدة.

**Ahmed Amin** · 02-12-2013 09:44 PM

الشكر لله ياباشا, وكويس أنك معندكش مشاكل,,
وإن شاء الله تنبسط من العربية وأدائها, وربنا يبارك لك فيها.

**m.basha** · 03-12-2013 02:36 PM

المشاركة الأصلية كتبت بواسطة ah_tharwat

السلام عليكم ......

أولا ألف مبروك يا باشا على البيجو و انك بقيت من ركيبي الأوروبي عامة و البيجو بصفة خاصة .... ربنا يرزقك خيرها و يبعد عنك شرها ...
ثانيا عايز أعرف انطباعك عن العربية و خصوصا انك كنت راكب اوبترا و الاوبترا بالنسبة ليا من العربيات المعقولة اللي موجودة في السوق و المقارنة بيها هتكون مفيدة الى حد كبير , يعني فرق السحب لصالح مين , الثبات , المكيف , العفشة و الراحة في المطبات و الطرق المكسرة ... يعن يكده شوية بهريز .

و مرة تانية ألف ألف مبروك عليك

بص يا باشا حاقوللك بمنتهى الامانة اولا انا لسه يدوبك عامل بالعربية حوالى 500 كيلو مش اكتر الاوبترا قعدت معايا حوالى 4 سنوات بص يا سيدى الانطباع الاول ما بين البيجو و الاوبترا العفشة بتاعت البيجو انعم من الاوبترا و لا هى ناشفة و لا ناعمة اوى معقولة جدا الاوبترا بصراحة اكتر حاجة كانت مزعلانى منها من و هى زيرو عفشتها ناشفة دى اول حاجة فى صالح البيجو الثبات لسه ما جرتشى بالعربية على طريق عشان احكم لكن كانطباع اولى معقوله و الوبترا لحد 160 كانت بالنسبالى معقولة التكييف جيد فى الاثنين بالنسبة بقى للنقطة الوسع كصالون و شنطة تخيل ان البيجو اوسع بالنسبة ليه ماشاء الله فى الاثنين الخامات الداخلية فى مصلحة البيجو اما اماكن التخزين الداخلية زى الموبايل و باقى الاغراض الشخصية الاوبترا تكسب بص الاوبترا اللى خلانى ابيعها موضوع سرقتها اللى كان منتشر بس نصيحة اخوية كمجمل البيجو اكيد افضل و بالتوفيق فى الاختيار ان شاء الله

**Ah_tharwat** · 04-12-2013 10:35 AM

ألف شكر يا باشا على الرد الوافي .....

أنا أصلي معجب بالعربية دي جدا خاصة انهم قدروا يعملوها أوروبي و بالسعر ده .... و علشان تسمع حكم أي حد على أي عربية لازم تعرف هو كان راكب ايه قبلها لان ده بيكون من أكبر العوامل المؤثرة على تقييمه , أنا حاليا معايا بيجو 406 2001 و عايز أجدد و حسيت ان أفضل الخيارات المتحاة قدامي مقارنة بالسعر هي ال 301 ... و أول ما عرفت انها اسباني كمان الموضوع عجبني أكتر , و بأسأل عشان الواحد يكون عمل اللي عليه ... نفسي بس ألاقي حد غير من 406 ل 301 علشان يجيبلي من الأخر .

و ألف شكر ليك و ربنا يسعدك بيها يا رب .....