الموضوع: وظيفة الحماية من الاحتباس (نافذة السائق فقط) كورولا 2014

المشاركة الأصلية كتبت بواسطة meggieboy

باشا مشكور على التوضيح و لكن اسمحلى اعترض و بشدة......
طبعاً اللى صمم العربية معندوش فكرة عن موضوع البلطجية او خلافة و لكن الهدف الاساسى منه الحماية و خاصة للأطفال حال خروج ايديهم او راسهم بره الشباك و حضرتك مش واخد بالك و رفعت الزجاج و طبعاً اى حد عنده اطفال فاهم كويس قوى اد ايه هما فى لحظة واحدة بيمدوا ايديهم و لا قدر الله بتحصل الحادثة
ال code الاوروبى للأمان ان اى زجاج كهرباء one touch لازم by default يكون anti pinch و ذلك لحماية الأطفال

أتفق معاك في النقطة دي ولكن مصر لها ظروفها الخاصة ولو كنا زي باقي الدول اللي أتصممت العربية ليها مكنوش عدلو ارتفاع العربية علشان يناسب طرقنا ومطباتنا الجميلة يعني كمثال ايه نسبة المطبات اللي مطابقة للمواصفات العالمية الي المخالف للمواصفات !

بالنسبة لموضوع البلطجية هل حضرتك تتخيل ان لو بلطجى حط ايده و انت بترفع الزجاج كهربا ولا حط حته شومه فى سكة الزجاج هل مكنة الزجاج الكهربا هتقاوم ايد بلطجى و لا شومة محطوطة فى سكة الزجاج؟؟!!!!! لا أظن

الموقف ده حصل مع واحد صحبي كان واقف مستني زميله وبيسمع الراديو وطلع عليه بلطجي فجأه وحطت مطوه علي رقبته فمسك المطوة من النصل الحاد بأيده الشمال وزق ايد البلطجي بره الشباك ورفع الازاز وبعد وشه عن الشباك وحاول البلطجي يعوره بالمطوة بس الازاز رفع ايده لفوق وأضطر يخرج ايده بره الازاز وفي نفس الوقت كان صحبي شغل العربية وداس بنزين وطلع لقدام شوية ولف علشان يخبطه بالعربية بس زوغ مع زميله علي الموتوسيكل.

وفي موقف أخر لما تكون واقف في أشارة ويجي شلة عيال صغيرة و يحطوا ايديهم علي الازاز وهو مفتوح ويرفضوا يسيبوك الا لما تدي لكل واحد فلوس وأحيانا مبيكونش معاك فكة.

وفي موقف آخر لمل بتكون واحدة ست سايقة ومن غير قصد تخبط اللي قدامها وينزل مش شايف قدامه وفي قمة الغضب ومش مفرق في المعاملة مابين ست ولا راجل في الحالة دي أحسن حاجة الست تعماها أنها تقفل ازازها عليها .

تعليق : في مواقف الخطر الثانية بتفرق والبلطجة أنواع في بالايد وفي بالمطوه وفي بالمسدس وفي بالآلي وقفل الازاز بينفع مع الايد ونفع مع المطوة في حالة زميلي.

طبعاً كون ان عربية زى الفلوانس بما ان حضرتك اخدتها كمثال تنزل اربعة زجاج كهرباء one touch مع خاصية anti pinch و اربع روافع زجاج مع بعض اوريجينال بيطلعوا مع بعض مش زى المكن الصينى اللى فى السوق اللى بيرفع الزجاج واحد ورا التانى ده قمة الرفاهية و اعيب على تويوتا و الكثير من الشركات الاخرى اللجوء لخفض التكاليف و نزول زجاج واحد فقط بهذه الخاصية الرائعة

بالضبط زي ما أنا بعيب علي الفلونس أن مفيهاش vsc ولا فيها trc وحضرتك تحكم ايهم أهم

بنفس الكيفية اللى حضرتك اتكلمت بيها يا ريت كل العربيات كانت نزلت من غير ايرباج لحماية الارواح لان الايرباج لما بيفتح تمنه غالى قوى
و يا ريت كل العربيات كانت نزلت من غير اضاءة زينون و مش مشكلة الاضاءة الرائعة بتاعته لأن تمن الكشاف الاصلى لما بيتكسر ٦٠٠٠ جنيه

أولا القياس هنا مش صح لأني مجبتش سيرة أي تكلفة أنا بتكلم عن ميزة وعيب

ثانيا الحكم علي العربيات مش بوحدات الرفع والزينون لأن في النهاية اسمها كماليات وممكن أي حد يضيفها . كويس لما تكون موجودة طبعا بس لما تكون باقي الأساسيات متوفرة (vsc-trc) ودي مينفعش أي حد يضيفها


ثالثا
بنفس الاسلوب:

حضرتك بتقفل باب الشقه ليه وانت رايح الشغل محضرتك عارف أن فيه حرامية ممكن تتعامل مع كالون الباب ويفتحة

وبنحط فلوس في الخزنة ليه ما فيه حرامية خزن

وبتركب انذار ليه في العربية مع أن معظم الانزارات بتركب علي السنتر وحرامي بمفك بيعطلو في أقل من دقيقة

وبتغسل العربية ليه ماهي هتتوسخ تاني

وبتستخدم قفل الدركسيون ليه والحرامي ممكن يفوره


الخلاصة : أحنا بناخد كل أحتياطتنا و الحافظ هو الله




طيب و لما البلد ان شاء الله حالها ينصلح و يرجع الامن و الامان ساعتها هتبقى هذه الخاصية ميزه و لا عيب؟

آمين ولكن لحد ما ده يحصل أنا أعتبره عيب أكتر ما هو ميزه وخاصة أن موجود في باب السواق واعتقد ما فيش اطفال بتسوق.


وفي النهاية بشكرك علي المشاركة واتمني تتقبل ردي بصدر رحب

ملحوظة : لا اقصد التقليل من قيمة الفلونس ، وربنا يبارك فيها لمالكيها