إصلاح اول مسمار فى الكاوتش الشمال لعربيتى الحبيبه البيجو 301 هاى لاين

**Ashraf Fawzy** · 27-03-2014 06:22 PM

الحمد لله تم سحب اول مسمار من الكاوتش الشمال فى عربيتى الحبيبه البيجو 301 هاى لاين.

بصراحه كنت غاية فى القلق بعد ما قرأت بعض الموضوعات إنك تروح تصلح مسمار فى الكاوتش و يقوم اللى بيصلح الكاوتش بإضافة مسامير تانية - ربنا يحفظنا - عشان يزود فى الحساب (وخصوصاً فى البنزينات اللى بتبقى على الطريق). وعشان كده صلحته عند واحد فاتح عندنا فى المدينة, والموضوع ماأخدتش ثلث ساعة فك و تركيب و تصليح و ظبط الضغط.

المهم رحت النهارده وفضلت واقف على إيد الشاب اللى بيصلح خطوة بخطوه لغاية ماخلص والحمد لله كله تمام و ظبط الضغط بتاع الكاوتشات و اخد عشره جنيه بس (ربنا يباركله و يزيد عليه الرزق), وبصراحه فضلت اسئله على الخطوات بتاعة التصليح لغاية ماضحك, وانا نفسى ضحكت لما اخدت بالى من إنى سألته يجى 4 اسئله (اول مسمار فى الكاوتش بقى وكنت عايز افهم) وبصراحة العشرة جنيه ماتغطيش التصليح و الإجابات :)

هو قالى عنده نيتروجين (بمناسبة بقى دخول الصيف), ولما سألته بيعمله إزاى, قالى بيشفط الهوا الأول و بعد كده بيحط نيتروجين, أنا قرأت من بعض الإعضاء الكرام إن ده ممكن يأثر على الكاوتش و الأسلاك اللى فيه, إيه رأيكم و نصيحتكم بالنسبه للطريقة الافضل و خصوصاً لنوع الكاوتش اللى فى البيجو 301 هاى لاين؟

برده كنت عايز اعرف متوسط سعر الكاوتش للبيجو 301 هاى لاين, وإزاى اعرف إنه اصلى؟ و تاريخ التصنيع (أنا اعرف إن صلاحية الكاوتش 5 سنوات من الإنتاج مش من الإستخدام)؟

**د.عماد صلاح** · 27-03-2014 06:44 PM

ربنا يجعله اخر المسامير

**mahmed0100** · 27-03-2014 11:53 PM

كل شيئ عن الكاوتش بالصور والأرقام

الرابط ده حيفيدك بمعلومات كويسه عن الكاوتش
كاوتش الميشلان ال 16 سعره 1050 جنيه لكن مش متوفر .. فحافظ علي كاوتشك لحد ما تغيير الاربعه سوا او ينتشر المقاس ده في السوق علي اخر السنه ان شاء الله

**Mohamed_301** · 28-03-2014 12:00 AM

ان شاء الله مايحصلكش حاجة وحشة تانى :))

**doc mohamed** · 28-03-2014 02:01 AM

انا لما جيت مليت نيتروجين اول مرة في فيت اند فيكس قالي انه غلط موضوع شفط الهوا خالص لانه بيضعف الكاوتش هو بيسيبه يفضي خالص وبعد كده يملاه نيتروجين ويفضي تاني كذا مرة ده اللي حصل معايا

**Ashraf Fawzy** · 28-03-2014 08:41 AM

المشاركة الأصلية كتبت بواسطة د.عماد صلاح

ربنا يجعله اخر المسامير

المشاركة الأصلية كتبت بواسطة raventennes

ان شاء الله مايحصلكش حاجة وحشة تانى :))

آمين

المشاركة الأصلية كتبت بواسطة limo81

هو بس بيفضي الهوا من الكاوتش وبيملاه نيتروجين ، بعد كده بيفضيه تاني لضمان خروج الهواء بالكامل ثم بيعيد ملأ الكاوتش بالنيتروجين مره اخري
بس خلي بالك من ضبط ضغط الاطارات مهم أوي

المشاركة الأصلية كتبت بواسطة mahmed0100

كل شيئ عن الكاوتش بالصور والأرقام

الرابط ده حيفيدك بمعلومات كويسه عن الكاوتش
كاوتش الميشلان ال 16 سعره 1050 جنيه لكن مش متوفر .. فحافظ علي كاوتشك لحد ما تغيير الاربعه سوا او ينتشر المقاس ده في السوق علي اخر السنه ان شاء الله

المشاركة الأصلية كتبت بواسطة doc mohamed

انا لما جيت مليت نيتروجين اول مرة في فيت اند فيكس قالي انه غلط موضوع شفط الهوا خالص لانه بيضعف الكاوتش هو بيسيبه يفضي خالص وبعد كده يملاه نيتروجين ويفضي تاني كذا مرة ده اللي حصل معايا

شاكر ليكم جداً على النصائح, وإن شاء الله أقدر أستفيد منها انا وباقى الأعضاء.

**faroojj** · 28-03-2014 01:57 PM

ممكن تركب 16*205 سعره أرخص

**محمود سامح** · 28-03-2014 02:53 PM

اوعى من عمل الخوابير كلها نصب وبيبوظ العجلة احنرس

**Ashraf Fawzy** · 28-03-2014 04:41 PM

المشاركة الأصلية كتبت بواسطة محمود سامح

اوعى من عمل الخوابير كلها نصب وبيبوظ العجلة احنرس

ربنا يبارك فيك على النصيحة, فعلاً الشاب اللى صلح الكاوتش - لما اخويا سأله على موضوع الخابور لتصليح الخرم فى الكاوتش - قال إن الخابور اسهل لكن مش افضل عشان الكاوتش.