الموضوع: عملت حادثه بالياريس

السلام عليكم ورحمه الله وبركاته

الحمد لله ... الحمد لله ... الحمد لله ... انا عملت حادثه بالياريس .. وربنا ستر والخسائر مش كتير وفي شويه حاجات احب أشاركها مع الناس عشان تخلي بالها .

أنا كنت راجع من القريه الذكيه .. واخد الصحراوي ومن بعد حازم حسن في ملف كبير شويه مكسر ويدوبك اخر حته خالص علي اقصي الشمال هي اللي ممكن تمشي منها ... هنا لازم اقولكم شويه حقائك

1- العجله اللي ورا يمين كانت مهويه شويه وكسلت أعدي علي عجلاتي أشيك عليها .
2- حاله الكاوتش عندي مش تمام وكنت روحت fit & fix وقالي ياريت تمشي بيه علي مهلك وتغيره في اقرب فرصه ومرضاش يرصص ساعتها عشان قالي حرام .
3- أنا كنت رابط الحزام عشان التعود (الموضوع ده فرق جدا والحمد لله وهتعرفوا ليه بعدين)

كنت داخل الملف بسرعه شويه .. علي 100 كيلو تقريبا .. قافل الازاز ومش حاسس بالسرعه .. معلي الكاست شويتيين .. مش شايف لاخر الملف ودي غلطه كبيره .. عربيه تريلا بمقطوره ماشيه في أقصي الشمال من غير نور خالص لقيتها ادامي .. طبعا الطريق مكسر والتريلا ماشيه في أنضف حته وبقيت الطريق مكسر ... بدل ما أفرمل معرفش ليه قررت أزود وأحاول اعدي من حته ضيقه أوي في الشمال .. الحته مكفتش .. في اخر لحظه رميت يمين !!! .. العربيه لفت وخمست بيا .. الحمد لله محدش كان جاي من ورايا وإلا كان لبس فيا بالجنب .. هنا الحزام فادني جدا جدا جدا لقيت نفسي مربوط في الكرسي ولسه مالك العربيه .. دوست فرامل وبرضه عرفت قيمت ال abs وال ebd .. الفرامل والحزام الحمد لله أنقذوني .. انا دخلت في الطوب والعربيه وقفت قبل لحظه من الحاجز الخرساني ..

أنا فضلت واقف وماسك الدريكسيون فوق الربع ساعه مش قادر اتحرك .. العربيه واقفه علي الطوب اللي جنب الحاجز .. محدش وقفلي خالص الحقيقه ومش هقدر ألوم علي حد .. بعد ما هديت اتحركت ونزلت من ع الطوب ونزلت اشوف العربيه ..

الخسائر :

الكاوتش اتكسر طبعا والسلك ضرب .. الاكصدام وقع من جنب وخد خبطه من تحت.. الجنط أتنا .. المصفحه شالت كتير الحقيقه الحمد لله ... في حاجه في العفشه ولا لأ دي حاجه لسه معرفهاش وربنا يستر علي المقص والجلب .. انا ماشي علي الاستبن اللي اصلا فيه بالونه لحد ما اروح اغير الكاوتش واكشف علي العفشه .. وفي رجه كده مش طبيعيه


نصيحه لكل واحد بيسوق .. انا طبعا غلطان في حاجات كتير .. داخل ملف بسرعه .. زودت عشان اعدي في لحظه تهور ... قافل العربيه ومعلي الكاست ومش حاسس بسرعتي .. الكاوتش كان مريح ومرحتش ازوده وطبعا فرق في الثبات جدا جدا

1-أربطوا الحزام فعلا بيفرق
2- خلي عينك علي كاوتش العربيه علطول ومتستهترش لو مريح شويه
3-الفرامل ال ABS وال EBD ليهم لازمه
4- السواقه ملهاش كبير مفيش داعي تمشي بسرعه عشان مش هتفرق في الاخر كتير

الحمد لله وربنا يحفظ كل واحد سايق