الموضوع: تقريري الأولي عن السانديرو الجديده

العربيه معايا بقالها كده ٣ ايام وماشيه ١٥٠ كم انا جايبها عربيه تانيه للبيت مش الاساسيه
معلومه جانبيه كده عشان الناس وهي بتقرأ تبقى عارفة انا بتكلم على انهي اسا انا معايا دلوقتي فيات لينيا متعدله ٢٠٠ حصان ومتعدلها العفشه والفرامل فممكن اكون ظالم السانديرو وانا بتكلم في الحتت دي

الأول خارجيا:
العربيه شكلها حلو جدا ووجود النور النهاري والفوجات ورا وقدام حلو جدا وارتفاعها عن الارض مناسب

داخليا:
الكراسي كويسه ومريحه
التابلوه خامته اقل من العادي شويه وكمان الملتي فنكشن مش حلو
الدركسيون والفتيس والتكيف والراديو خامتهم كويسه جدا
من الأخر اي حاجة إيدك بتيجي عليها كتير خامتها حلو اي حاجة تانيه مش قد كده في التبلوه
الفروقات في التبلوه واسعه شويه بس مفيش اصوات منها

التكيف:
ملحقتش اجربه قوي بس كويس بس بيزود الإستهلاك ١ لتر \١٠٠كم رأي الشخصي كتير شويه

القياده نفسها:
مبدأيا عندي صوت كده كإن فيه كرتيره مفكوكة ولسه مشوفتش الصوت ده من إيه

الدركسيون مريح وتوجيه العربيه كويس بتروح زي ما إنت عاوز بالظبط
الفتيس هزة الموتور واضحه فيه بزياده عن العربيات العاديه
إستهلاك البنزين على سرعة ٩٠ بيبقة ما بين ال ٥لتر\١٠٠كم وال٦.٥ لتر\١٠٠كم
على ١١٠ من ٦.٥ ل٧.٥ لتر\١٠٠كم
انا شايف ده كتير مقارنه بعربيتي اللينيا إستهلاكها أقل من كده

الموتور: بالنسبالي بطة بلدي وده انا عارف اني متحامل عليها عشان عربيتي الي راكبها حاليا بس هي بعد ال ١٠٠ تسارعها بيقل وبعد ال ١٣٠ هتنام عشان تجيب بعد كده
ممكن ادائها يتحسن بعد التليين بس مش هتفرق كتير

الثبات والفرامل:
بالنسبه لفئتها فثباتها مرضي جدا والفرامل فوق الجيد بشويه

الكاسيت:
كويس فيه كل حاجة بلوتوث usb aux cd كل حاجة ويمكن الكاسيت احسن من عندي في الفيات
الفيات البلوتوث للمكالمات فقط في السانديرو ممكن تشغل اغاني من الموبيل على سمعات العربيه بالبلوتوث

لو فيه أساله قولوا وانا موجود