الموضوع: انطباعي عن فلوانس 2014 e3

مبروك ، وطبعاً الفلوانس من احسن العربيات ال في فئتها

المشاركة الأصلية كتبت بواسطة ahmed mahgoub

رأي في الفلوانس e3 بعد استخدام 850 كم:

الحمدلله استلمت ورخصت يوم الاربعاء 2-4-2014 وده انطباعي الشخصي (وحط 100 خط تحت الشخصي عشان محدش يزعل مني) من مميزات وعيوب العربية:

أولا المميزات:
1-الميزة الاساسية في العربية هي فخامتها وشياكتها من الخارج والداخل (ومافيش خلاف على كدا) ويمكن ده اكتر حاجة بتجذب الناس للعربية.

2- كثرة الاوبشنز والكماليات في العربية مع المقارنة بالعربيات اللي في نفس الفئة السعرية وممكن ألخص الكماليات في الاتي (الترتيب لا يعني الأولوية):
2.1- المرايات الضم وامكانية ضمها مع السنتر.
2.2- مثبت السرعة والكروز كنترول (في ناس بتقول مالهومش لازمة، لكن أنا شايف إنهم مهمين قوي خصوصا مثبت السرعة على الزراعي، والكروز كنترول على الصحراوي)
2.3- تكيف touch, back openings & dual zone وفي نفس الوقت الناس بتشكر في كفائته كتير(انا لسة مقدرتش احكم عليه).
2.4- بلوتوث.
2.5- نظام صوتي متميز.
2.6- جنوط اسبور شيك جدا.
2.7-فوجات امامية وخلفيه مع ليدات امامية.
2.8- طارة الدريكسيون اربع اتجاهات telescopic
2.9-فرش نص جلد ونص قماش شيك ومريح جدا.
2.10-زجاج كهرباء بضغطة واحدة مع خاصية anti-pinch عشان الزجاج مايقفلش على حد، مع 4 وحدات رفع.
2.11- عداد ديجيتال.
2.12- اضاءة بالشنطة ودرج التابلوه والشماسات.
2.13- مقاعد بخاصية تثبيت كرسي الاطفال isofix
2.14-حساسات ضوء ومطر.
2.15-أحزمة امان ثلاثية التثبيت.
2.16- بصمة و start engine.
2.17- تحكم في نظام الصوت من التارة.

**بس!! ده اللي فاكره من الكماليات.

3- ارتفاعها عن الارض مناسب جدا للمطبات المصرية الغبية.

4- وسع العربية والشنطة الخلفية ممتازة.

5- متانة العربية ماعادا الاكصدامات.

6- سحب العربية ممتاز (مع اختلافي للناس اللي بتقول سحب العربية وحش.. المشكلة وجهة نظري هو موضوع الفتيس ال سي في تى وطريقة سواقته الغريبة شوية)

7- ثبات العربية جميل جدا.

****()()()()()****

ده بالنسبة للمميزات أما العيوب فهي:

1- ضعف بعض الخامات في صالون العربية وخصوصا مقبض البابين الاماميين والجزء اللي فوق الدريكسيون والجزء اللي فوق الشاشة.

2- الكاسيت ساعات بيهنج.

3- غياب زرار الاوكى من التحكم في الطارة.

4- قلة اماكن التخزين في الصالون.

5- درج التابلوه تحس انه مش باين او انك تشوف اللي جواه لما توطي جامد.. برضو مكان الكاسيت والتكييف تحس انهم مزنوقيين جنب الفتيس.

6- عدم غلق او فتح الزجاج الا اثناء تشغيل العربية (عيب رخم ومالوش لازمة، لا توفير كهرباء ولا اي حاجة، حج فارغة).

7- المرايات لا تضم بشكل نهائي (بحس انها بارزة بعد الغلق).

8- بسمع صوت رجة كدا في الشنطة من ورا مش عارف من ايه زي مايكون البنزين بيتحرك في التانك!!!!،، برضو صوت تزييق الابواب مضايقني.

دي بعض العيوب والمميزات من وجه نظري

وشايف ان العيوب لا تؤثر على المميزات اطلاقا وكلها عيوب هامشية (ماعادا موضوع ضعف الخامات).

** في حاجة اخيرة :
في كذا عضو اشتكى من نقص زيت الماتور وعلى راسهم الدكتور مصطفى مجدي، لو طلع ان الماتور فعلا بياكل زيت يبقى ده عيب خطير في العربية وبانصح اي واحد انه مايشتريش العربية لو الموضوع طلع بجد. أما لو هي حالات خاصة يبقى إن شاء الله التوكيل يحلها ليهم ويستمتعوا بالعربية الجميلة دي.....

شكرا للي قرأ البوست واسف على الاطالة

شكرا جدا على كلامك الموضوعى المحايد الخالى تماما من المبالغات

المشاركة الأصلية كتبت بواسطة ahmed koller

مبروك ، وطبعاً الفلوانس من احسن العربيات ال في فئتها

الله يبارك فيك يا باشا
هيه فعلا عربية جميلة

المشاركة الأصلية كتبت بواسطة hmostafaahm

شكرا جدا على كلامك الموضوعى المحايد الخالى تماما من المبالغات

الله يكرمك
انا اهم حاجة عندي ان القارئ يستفيد من التقرير
يمكن ينفع حد في انو يشتريها او مايشتريهاش

الف مبروك و انا اعرف ناس عملت بل عربية دى فوق 100 الف كيلو و مفيش نقص زيت ولا الكلام دا خالص اكيد دى حالة فردية و استمتع بعربيتك و عيش وربنا يباركلك فيها

المشاركة الأصلية كتبت بواسطة hany saad

أحمد بيه....الف مبروك العربية...ربنا يباركلك فيها و يكفيك شرها
بعيداً عن المميزات اللى بتلفت نظر كل الأعضاء ان متفق معاك فى كتير من العيوب و عايز استفسر منك على بعضهم علشان كلنا نستفاد بعد اذنك

1- ضعف بعض الخامات في صالون العربية وخصوصا مقبض البابين الاماميين والجزء اللي فوق الدريكسيون والجزء اللي فوق الشاشة.

حضرتك تقصد المقابض النيكل الداخلية و لا طلا المقابض الخارجية؟ بالنسبة للجزء اللى فوق الشاشة و الدريكسيون حضرتك تقصد فقر الخامات و لا ضعف الخامات؟

2- الكاسيت ساعات بيهنج.

مشكلة فلاشة فى الأغلب مش مشكلة كاسيت الا لو هنج مع حضرتك بدون وضع فلاشة

3- غياب زرار الاوكى من التحكم في الطارة.

متفق مع حضرتك

4- قلة اماكن التخزين في الصالون.

طبعاً ده شىء نسبى بس اعتقد هى مقاربة لمثيلاتها فى نفس الفئة

5- درج التابلوه تحس انه مش باين او انك تشوف اللي جواه لما توطي جامد.. برضو مكان الكاسيت والتكييف تحس انهم مزنوقيين جنب الفتيس.

مظبوط يمكن مزيته ان فيه اضاءة و لكن فعلاً هو واطى....و مظبوط بالنسبة للكاسيت و التكييف

6- عدم غلق او فتح الزجاج الا اثناء تشغيل العربية (عيب رخم ومالوش لازمة، لا توفير كهرباء ولا اي حاجة، حج فارغة).

هيشتغلوا معاك بعد ما تطفى السيارة لمدة دقيقة مثلاً و مش هتلاقى عربية فيها ازاز كهربا بيشتغل و العربية مطفية

7- المرايات لا تضم بشكل نهائي (بحس انها بارزة بعد الغلق).

مظبوط

8- بسمع صوت رجة كدا في الشنطة من ورا مش عارف من ايه زي مايكون البنزين بيتحرك في التانك!!!!،، برضو صوت تزييق الابواب مضايقني.

بالنسبة للرجة حضرتك بص على منطقة الاستبن و العدة لو فيهم حاجة سايبة....لو الابواب بتزيق يبقى انصحك تزور التوكيل يبص عليهم و يشوف ايه المشكلة


اتفق مع حضرتك ان سحب العربية مرضى جداً و لسه كمان بعد ما توصل لل 3000 كم هتلاقى السحب اجمل و اجمل و الموتور صوته انعم
و فعلاً لو لا قدر الله طلع فيه مشكلة موتور فى عربية مصطفى البيه المحترم هنكون اول ناس تحذر من هذا الموضوع فى قسم رينو

الف مبروك مرة اخرى
تحياتى

باشمهندس هاني الانسان المحترم بلداياتي:
بالنسبة للمقابض انا قصدي المقابض الداخلية بس هي في الفئة بتاعتي مش نيكل.
بالنسبة للخامات ضعفها وليس فقرها

الكاسيت مش بيهنج ويقفل خالص، لا ، مثلا لما اجي اقلب من ملف للتاني يقعد بتاع دقيتين عقبال ما يستجيب وده مش بيحصل كتير على فكرة (حصل مرة او مرتين). يا الفلاشة ياما البلوتوث مش فاكر الصرحة

بالنسبة للزجاج الكهرباء
انا عاوزه يشتغيل مع فتح الكونتاكت زي الكاسيت
في واحد مخترم على الفيس قالي لو حطيت الكارت في مكاته هايشتغل
بس انا في الشغل ، لما انزل اجازة هابئا اجرب.

بالنسبة لصوت الرجة
مش بسمعه على طول
بس انا شيكت على الاستبن والعدة . ده انا فضيت الشنطة خالص وسمعته برضو
مع اول زيارة للتوكيل هاظبط كل ده انشاء الله.

بالنسبة لموضوع الماتور اتمنى انه يكون حالة فردية عشان ده هايقضي على سمعة العربية وهايقفلني منها خالص.

سؤال يا باشمهندس هاني

ينفع
اغير الزيت عند 5000 كم جوه الضمان عشان انا استخدامي قليل جدا بطبيعة شغلي وممكن اقعد سنة عقبال ماوصل لي 10000 والتوكيل بيقولي ياسنة يا 10000 وانا شايف سنة كتير الصراحة..


شكرا لسعة صدرك
واتمنى اني اقابل حضرتك في اقرب فرصة.

المشاركة الأصلية كتبت بواسطة kokowasfy

الف مبروك و انا اعرف ناس عملت بل عربية دى فوق 100 الف كيلو و مفيش نقص زيت ولا الكلام دا خالص اكيد دى حالة فردية و استمتع بعربيتك و عيش وربنا يباركلك فيها

الله يكرمك ياباشا
عامل 100000 بي 2014 ولا قبل كدا
2014 موتور ياباني نيسان
قبل كدا موتور فرنسي رينو