الموضوع: تجربة قاسية مع البطارية السائلة فى أوتو إيجيبت خذوا بالكوا من صيانة البطارية

[justify]عاوز اشرح اللى حصل معايا واعرف أيه حكمكم عليه
العربية نيسان صنى الشكل القديم مانوال موديل 2012 وعامل جميع الصيانات فى مركز أوتو إيجيبت كل 5000 كم بانتظام .
المهم ما حدث معى يوم الاثنين اللى فات كنت أنا وصديقى نزلنا نشترى غطاء للسيارة من وكالة البلح المهم وأنا بركن العربية لقيتها بطلت لوحدها استغربت قوى المهم قولت أدورها تانى لقيت لمب التابلوه منورة ضعيف وأول ما أدور التالبوة يطفى طبعا أنا فهمت على طول ان فيه مشكلة فى البطارية المهم لقيت بتاع الفرش بيقولى فيه حاجة قولتله أنا مش من هنا وعاوز كهربائى سيارات قالى مفيش مشكلى هتصلك بكهربائى حالا فعلا الكهربائى متأخرش المهم فتح الكابوت وبص على البطارية وقالى البطارية بايظة فأنا استغربت وقولتله طب أنت مكشفتش عليها قاللى مش محتاجة كشف البطارية منفخه بص فعلا البطارية منفخة من الجانبين المهم قولتلة والعمل قاللى هزود الماية وهتمشيك لغاية البيت الساعة كانت حوالى تسعة ونصف مساء المهم قولتله ماشى فتح الغطيان وكانت المفاجئة اولا الغطيان بالكامل سوداء يعنى البطارية من جوه كانت على وشك الانفجار . ثانيا مفيش ماية خالص فى البطارية نهائى .
المهم قاللى لازم تغير البطارية روحت هنا وهناك كل المحلات اللى أنا عارفها قافلة المهم اتصلت بواحد صاحبى قاللى فى شركة اسمها الايمان فى الدقى فاتحة باستمرار . روحت المحل ده واشتريت بطارية سعودى جافة ودفعت 350 جنية بالقديمة وركبت واحده جديدة 45 امبير حسب القديمة قولت لصاحب المحل نخليها 55 امبير احسن قاللى مش مهم المهم أنا احترمت التوكيل اللى هوه اهمل فى صيانة البطارية وركبت ذى امبير القديمة .
معلش أنا طولت بس عاوز اعرف رأى اهل الخبرة فى هذا الموضوع بجد علشان أنا متغاظ قوووى .
المهم اتصلت يوم الثلاثاء بمودرن موتورز واشتكى أوتو ايجبت لانهم معملوش صيانة للبطارية بصفة مستمرة وجفاف المياه فيها لاننى كنت عامل صيانة 25000 من حوالى شهرين . وقلتلهم علشان يبلغوا أوتو إيجيبت بالموضوع علشان ميحصلش مع حد تانى .
لكن لقيت الرد من المهندسة اللى كلمتنى بعد الشكوى حسب كلامها :
المهندسة : حضرتك لما العربية عطلت روحت التوكيل ( أوتو إيجيبت ) عملوا أيه فى العربية .
أنا : العربية اول ما عطلت أنا مفكرتش غير فى حل المشكلة لانى كنت فى الشارع .
المهندسة : علشان نحكم على الموضوع لازم كنت تروح التوكيل الاول .
أنا : يعنى لازم كنت ازق العربية لغاية التوكيل يعنى .
المهندسة : لا ممكن تقطرها لهناك .
أنا : يعنى كده فيه يوم عطله تانى .
المهندسة : بس أنت كده ضيعت حقك بعدم الكشف على البطارية القديمة .
أنا : ضيعت حقى ليه المفروض ان كل صيانة يتم عمل لها تقرير .
المهندسة : مودرن موتورز متقدرش تعمل لحضرتك حاجة فى الموضوع ده .
أنا : شكرنا لذوق حضرتك . سلام .
وأنا هفرقع من الرد أنا كنت عاوز التوكيل ياخد باله من عربيات الناس بس لاننى بكل بساطة حسبت حسبة التوكيل وهى :
اكتر من سنتين يعنى ضمان البطارية بقى حوالى 30% .
يعنى بطارية سائلة كلورايد كانت مثلا 360 جنية بعد اكتر من سنتين هيحسبها 100 جنية .
فقولت ابيعها قديمة احسن واخلص نفسى .
بس أنا عاوز افهم حاجة :
تصرف التوكيل كده صح ولا غلط مش فاهم ومش عاوز اتكلم فى حاجة مليش الحق فيها .

اسف مره ثانية للاطاله . وشكرا للجميع .[/justify]

المشاركة الأصلية كتبت بواسطة msanad

حصل خير الحمد لله
كان المفروض حضرتك ما تبيعشى البطارية القديمة مش علشان التوكيل يستبدلها - لا علشان تقدمها كدليل للاهمال بتاعهم ولما يحصل مع حضرتك حاجة زى دى لازم تقدم شكوى فى نيسان مصر وفى حماية المستهلك وانا اضمنلك انك هتاخد حقك كما ينبغى

شكرا لتوضيح حضرتك فعلا الكل اجمع على الاتصان بنيسان وانا بعتها علشان اولا مش هخلص مع التوكيل بس ذى ما حضرتك قولت اثبت ان فيه اهمال وان شاء الله هروح صيانة 30 وهتكلم من المسئولين هناك وانا مش عاوز حاجة بس هوضح لهم مدى التقصير والاهمال بس
وشكرا للرد مع وافر تحياتى