مساعدة في شراء قشقاي

**nabiiiiil** · 10-05-2014 01:48 AM

السلام عليكم

]قررت ان شاء لله شراء قشقاي 2014 و لكن المشكلة ان كل معرض حاطط سعر و امكانيات مختلفة زي سينسورز و GPS و DVD و كاميرا خلفية و فرش و الواحد مش عارف الحاجة دي اصلية ولا مضروبة و لو اشترتها بالمواصفات الزيادة دي تطلع من التوكيل؟ و لو اشتريت الbasic من غير هذه الامكانيات و ركبتها برة تطلع من التوكيل؟
معلش سؤال اخير, ياريت تدوني اقتراحات عن معارض موثوق فيها في القاهرة و يكون سعرها معقول
اسف علي الاطالة و ياريت نستفيد من حضراتكم

**Mo3taz mostafa** · 10-05-2014 02:43 AM

اهم حاجه تركب العربيه و تجربها

**nabiiiiil** · 10-05-2014 03:14 AM

المشاركة الأصلية كتبت بواسطة mo3taz mostafa

اهم حاجه تركب العربيه و تجربها

تمام يا باشا انا مجربها كتير و بدور علي الاوبشينز و السعر دلوقتي

**insurancebroke** · 10-05-2014 03:22 AM

انت عاوز انهي فئة
وجبت سعرها ولا لا
شوف عاوز انهى فئة
وجبت كام وانا هجبلك اسعار ان شاء الله

**Ahmad Shawky** · 11-05-2014 12:34 PM

حضرتك ازاى هتجيب 2014 ؟؟؟
شهر واحد الى جى هينزل الشكل الجديد خساره
انا مستنى لحد ما الشكل الجديد ينزل

ويريت تقولنا الاسعار بقت كام دلؤاتى

**nabiiiiil** · 11-05-2014 12:52 PM

المشاركة الأصلية كتبت بواسطة ahmedshawki

حضرتك ازاى هتجيب 2014 ؟؟؟
شهر واحد الى جى هينزل الشكل الجديد خساره
انا مستنى لحد ما الشكل الجديد ينزل

ويريت تقولنا الاسعار بقت كام دلؤاتى

اولا الشكل الجديد لا خلاف انه روعة لكن كل حاجة بسعرها, حضرتك متأكد انه نازل شهر 1؟ انا سألت كتير و لسة مفيش تأكيد و محدش عارف اي حاجة عنها, دا غير ان معظم الوكلاء اكدوا لي ان الموديل الجديد سعره هيضرب جامد و انا حاطط حد اقصي بصراحة.

بالنسبة للسعر الحالي اقل حاجة لقيتها كانت 206 (من غير سينسورز و شاشة) و نزلت ل203 و الاستلام فوري (مفيش حجز خلاص), لو عايز اوبشينز زيادة (مش اصلي لكن في الضمان) اقل حاجة 215.

**الكندي** · 12-05-2014 02:26 AM

أنا كنت النهارده في معرض مودرن موتورز (وكيل معتمد لنيسان) في أبو رواش... كل عربيات نيسان معروضة عدا القاشقاي! وأنا كنت رايخ أسأل عليها اساسا... قالي مفيش حاليا عندنا قاشقاي 2014 خلاص! عشان كده اتشالت من المعرض... سألته ليه طيب؟ قالي عشان خلصانة من الستوك ووقفنا حجزها خلاص عشان الشكل الجديد نازل في شهر تسعة ومش عارفين أي حاجة عنه خالص ولا سعره... مواصفاتها ها تنزل في شهر سبعة... أما السغر في علم الغيب وده كلام المندوب عندهم... (أنا طبعا متوقع أنها توصل مستريح لحد 250 ألف جنيه) .... سألته طيب سعرها كان كام بدون الإضافات المحلية؟ قالي كان 190 ألف جنيه.... (طبعا السعر ده عمرك ما كنت تلاقيه بسهولة لانك لازم تحجزها كذا شهر)

بعض التجار حاليا عندهم ستوك بس سعرها أوفر مش اقل من 12 ألف جنيه بدون إضافات

**Ahmad Shawky** · 12-05-2014 06:02 PM

حتى لو وصلت 250 الجديده ملهاش علاقه بالقديمع خالص

كفايا تغير الموتور
القديمه تحس انك راكب تيدا مش عربيه suv خالص ده غير الشكل الى اى كلام

علشان كده مستنى

**الكندي** · 13-05-2014 11:32 PM

المشاركة الأصلية كتبت بواسطة ahmedshawki

حتى لو وصلت 250 الجديده ملهاش علاقه بالقديمع خالص

كفايا تغير الموتور
القديمه تحس انك راكب تيدا مش عربيه suv خالص ده غير الشكل الى اى كلام

علشان كده مستنى

القشقاي بالشكل الحالي من أفضل ما أنتجت نيسان خلال العشر سنوات الأخير والكلام ده من رئيس نيسان نفسها..السيارة الحالية محطمة الأرقام القياسية في الانتاج في مصنع انجلترا حتى انهم احتفلوا بانتاج السيارة المليون من المصنع وده شيء غير مسبوق لهذا الموديل.

العربية واخدة أفضل تقييمات في مجلات السيارات البريطانية في فئتها... ومنتشرة جدا في انجلترا. صناعة إنجليزية لسيارة يابانية... مفيش احسن من كده مزيج. مش عارف انت قافل من العربية ليه يا أستاذ أحمد. وبعدين دي سعرها 190 ألف جنيه بكل الكماليات دي... الهيونداي الكوري ix35 ب 240 ألف جنيه والسبورتاج بمائتين وعشرين اعتقد كده.

القشقاي سيارة ناجحة عالميا بكل المقاييس وبعدين انتشرت بشكل رهيب في مصر وتخيل سيارة بتتباع باوفر برايس 13 ألف جنيه والناس برضه بتجيبها بالأوفر عشان عاوزينها!!!