منور يا أبو حميد .. ولك تعليقاتي :
بعد ما اتفرجنا علي الصور ولاحظنا فرق بين تويوتا كورولا 2014 النسخة الأمريكية وبردو تويوتا كورولا 2014 النسخة الأوروبية، كنت عايز أقول ملاحظاتي وتعليقي علي الصور
التويوتا كورولا الأمريكي شكلها طبعاً أحلي لا خلاف وحلاوته في بساطته سواء من الأمام او من الخلف
التويوتا كورولا الأوروبي شكله جديد ومتناسب مع السوق اللي نازله فيه - يعني مصابيح led بخاصية الday light وبالتالي وهي ماشية في اوروبا شكلها مش هيبقي شاذ عن باقي السيارات نفس الموديل
لا طبعاً يوجد خلاف .. أنا عن نفسي شايف أن النسخة الأوروبي أحلى من الخارج مع تحفظي على خلفية العربية والرفرفين الخلفيين .. يبقى منقولش لا خلاف أن الأمريكي شكلها أحلى لأنها تندرج تحت بند لولا اختلاف الأذواق لبارات السلع .
طيب ومن الداخل
التويوتا كورولا النسخة الأمريكي فرش بتنجيد جلد وطارة مكسوة بالجلد وتابلوه مكسو بالجلد وكسوة جلد لمقبض فرامل اليد ومقبض ناقل الحركة
التابلوه تتوسطه ساعة ديجيتال وفتحات مكيف الهواء علي الجانبين وفيه شغل جلد كتير اوي بصراحه مخلي مظهره مبهر وشيك جداً بالأضافة لشوية شغل نواكل عالي الجودة
لوحة العدادات تقسيمها مختلف عن الأوروبي وشايفه بصراحة أشيك وكلاسيكي
من الأخر شكلها من برة بسيط ولكن من الداخل تحفة بمعني الكلمة
ما النسخة الأوروبي برضه الطارة فيها كسوة جلد .. ولكن الكراسي جلد على قماش في الهاي لاين وكل شيء بتمنه .. وبرضه بالنسبة للشكل تندرج تحت بند لولا اختلاف الأذواق لبارات السلع .
التويوتا كورولا النسخة الأوروبي فرش قماش × جلد وطارة عادية ومقبض ناقل الحركة نيكل
التابلوه تتوسطه فتحات التكييف واغلب الظن ان الساعة في لوحة العدادات زي العربيات الأوروبي
لوحة العدادات لو شوفتها للوهلة الأولي ولو ماتعرفش انها عربية تويوتا فوراً هتقول دي لوحة عدادات عربية اوروبي تحديدا فولكس - اللوحة شكلها رياضي وشاشة عرض البيانات في المنتصف وطبعا تحكمها من الطارة
من الأخر شكلها من برة تحفة ومن الداخل بسيطة
الطارة من الفئة الثانية مكسوة بالجلد .. ولكن الفرش قماش فعلاً .. والهاي لاين قماش × جلد .. لوحة العدادت بالنسبة ليا في الاتنين كويسين .
جدير بالذكر ان محرك النسخة الأمريكية 1.8 والأوروبية 1.6 والأتنين بنفس الفتيس
دي بترجع لاتجاهات السوق وميول المستهلك .. ففي الخليج توجد بنسختين 1600 ، 2000 سي سي مع الفتيس الأوتو العادي وليس ال cvt .
التعليق
انا شايف تويوتا كدة بتصنع بناء علي السوق المستهدف واول مرة اشوف اختلاف كبير جداً كدة في الشكل الخارجي. يعني كنا بنشوف البيجو 504 زمان النسخة الأمريكية بأكصدامات فيبر وليس نيكل وفوانيس امامية مزدوجة دائرية وليس بالشكل المعهود بتاعها
كل دة عادي
شوفنا اللادا الأمريكي اكصدامتها بردو مختلفة عن الشكل المعهود - بردو عادي
ليه في المثالين اللي فاتو عادي؟ لأن التغير بسيط جداً مش تغيير تماما
حتي تويوتا لما كانت بتغير في الشكل كانت بتغير حاجات بسيطة جداً
طب ليه هي من الداخل مهتمة اوي بتقفيل التابلوه بشكل مبالغ في الدقة والأناقة للنسخة الأمريكية
وبتتبع النمط الأوروبي في العربية اللي نازلة للسوق الأوروبي
طب ما فيه موديلات بالكامل مش مجرد التغيير في الشكل فقط بتنزل في أسواق وأسواق تانية لآه .. كل ده بيندرج تحت بند اتجاهات وميول السوق .. على سبيل المثال في الأسواق الخليجية ليس من المنطقي أنزل عربية 800 سي سي
ملحوظة كمان مهمة اوي اوي اوي
شوفنا العربيات الأسيوي كلها في الفترة الأخيرة (تقريباً ابتداء من 2009) بتنزل من غير عداد حرارة - واكتفوا انهم ينزلوا لمبة بداله تنور وانت في مرحلة الخطر - دي انا شايفهاعيب مش ميزة !!!
ليه؟ لأن لما بيكون في مؤشر فأنا ممكن الاحظ المشكلة من قبل العربية ماتدخل في الأحمر وابقي بالفعل جوة مرحلة الخطر
يعني من الأخر ممكن تلحق نفسك وتتدارك المشكلة وتحاول تحلها وانت لسة في الsafe side
لكن وجود لمبة فقط وتنور وانا في مرحلة الخطر دي انا شايفها حركة مالهاش اي لازمة
والمشكلة ان في الحالتين لازم بيكون في حساس حرارة - يعني انت لغيت العداد لمجرد تخنق علي القائد
الملاحظة بقي ان النسخة الأمريكية من غير مؤشر حرارة (النمط الأسيوي) لكن النسخة الأوروبية فيها مؤشر (النمط الأوروبي)
اتفق معاك في أهمية وجود مؤشر الحرارة على الأقل من الناحية النفسية بالنسبة ليا .. ولكنه قد يكون هوجة أو اتجاه أو موضة لدى صانعي السيارات بصفة عامة
في النهاية
انا شايف ان المفروض اي شركة مصنعة يكون ليها شخصية ومعايير هي اللي تفرضنها علي زبونها وليس التصنيع بما يتناسب مع العميل
مش هنكر ان في شركات كبيرة جداً زي مرسيدس ممكن تنزل فئة تتناسب مع سوق معين - لكن دة بيبقي بتزويد اوبشن او تعديل في حاجة بسيطة جداً لكن ماشوفتهاش غيرت شكلها او غيرت اسلوبها لكونها نازلة سوق معين.
في تصوري أن الموضوع ده ممكن يحصل لو لدى صانع السيارة مصنع مستقل في سوق كبير كالسوق الأمريكي (القارة بأكملها) ومؤخراً السوق الصيني اللي اتجهت ليه الكثير من الماركات العالمية .. فبيبقى فيه إدارة غير مركزية وشبه مستقلة عن الشركة الأم رغم انها تحت نفس البراند .. وليها معامل ابحاثها وتطويرها وتصميمها ولكنها تحتفظ بطابع البراند سواء في العفشة أو المواتير أو التكنولوجيا اللي وصلتلها .. وشايف الموضوع عادي لا هو ميزة كبيرة ولا عيب كبير .
منتظر أرائكم ومشاركتكم معايا في الموضوع ووجهة نظركم
تحياتي للجميع
المفضلات