الموضوع: ساعدونى انا اشتريت تيدا 2007 انهارده و محتاج اعملها صيانة و اظبطها

انا بصيت عالنت لقيت فى توكيل اسمه مودرن موتورز عند السندباد و واحد فى الاتوستوراد اسمه عوادى جروب عند دخلة المعادى و واحد فى زهراء المعادى . احتمال اروح اللى عند السندباد . هم طبعا مش بيشتغلوا بالليل مش كده؟ طب حد يعرف مواعيدهم ايه و يوم الخميس و الجمعة ظروفهم ايه و هل لازم حجز قبلها ولا لأ.

رأي الشخصي سيبك من التوكيل لإن في افضل منه
العالمية - الحرفيين - مهندس احمد نوفل
غاليين شوية بس عارفين بيعملوا ايه وحافظين موتور التيدا حتة حتة مهما كان ارخص من التوكيل
وممكن تشتري قطع الغيار من عندهم او تجيبهم من التوكيل في شارع الحجاز - مصر الجديدة
وعندهم مهندس للكشف بالكمبيوتر بسم الله ما شاء الله عليه ، هيجيبلك كل كبيرة وصغيرة في العربية

ولو مصر عالتوكيل يبقي متروحش غير اوتو ايجيبت لأنه افضلهم واستبعد تماما مودرن موتورز الهايكست، فرعهم في ابو رواش ، وسمعت انه فتحوا فرع في شارع التسعين التجمع - بنزينة شل

يعنى انا روح الحرفيين ان شاء الله و اسأل عن العالمية اللى فيها واحد بيشتغل اسمه مهندس احمد نوفل

و اعمل كشف كامل و صيانة.

طيب عند حضرتك فكرة بيشتغلوا بالليل ولا لأ.

سلام عليكم

انا هاقولكم انا عملت ايه لحد دلوقتى

انا اتصلت بأوتو ايجيبت و قالولى صيانة ال 80 الف + غيار البوجيهات هايكلفك 2100 تقريبا و الصيانة دى بنديك معاها تقرير شامل عن العربية ( بس من غير كشف كمبيوتر) و لو عاوز تكشف كشف كامل ب 450 جنيه بس هو رأيه مش مستاهلة كشف لأن صيانة ال 80 كده كده بتاخد معاها تقرير شامل

بس للأسف كان لازم احجز قبلها و انا كنت عاوز استغل يوم الاجازة انهارده غير انى ماعييش فلوس حاليا للصيانة و يادوبك ممكن اكشف و كام يوم كده و اروح اعمل صيانة.

المهم خدت بعضى و طلعت على الحرفيين مركز العالمية مهندس احمد نوفل زى ما نصحنى استاذ عمر.

انطباعى العام عنهم هم جايز شاطرين بس هو مهندس احمد خلقه ضيق شوية و بتطلع منه الكلام بالعافية خصوصا انه كان لسة صاحى من النوم.

المهم

قولتله انا معايا تيدا 2007 سيدان و عاملة 87 الف كيلو و عاوز اكشف عليها و اعمل صيانة ال 80 الف و اى حاجة تانية . قاللى مافيش حاجة اسمها 80 الف اسمها 90 الف و بدأ يقوللى اسعار كل حاجة من عنده و هاكتبلكم فى الاخر سعر كل حاجة.
قولتله طب لو عاوز اكشف كمبيوتر قاللى 50 جنيه قولتله طب لو كشف شامل عن كل حاجة و قواعد الموتور و كده قاللى يبقى 50 كمان يبقى كل الكشف 100 جنيه.

قولتله يبقى نتوكل على الله و نكشف
نده للى عنده و قالله اكشفلى على القواعد دى قولتله خلى بالك مش بس القواعد انا عاوزك تطمنى على كله قاللى طيب.

الصنايعى كشف و قاللى القواعد تمام و فى عندى حساس ال vti مكسور كده و انا اللى قولتله عليه . و طمنى على ان مافيش زيت ولا حاجة جاى من علبة الدركسيون ( عشان الباور كهربا :) ) . و المهندس احمد كشف بالكمبيوتر و قاللى تمام سليمة .
دفعت ال 100 جنيه و بعدين قولت لمهندس احمد ممكن طلب. ممكن تركب معايا تجربها ؟ قاللى حاضر
ركب و مشى بيها مترين قاللى العربية دى فيها قاعدة. قولتله ما الواد كشف على القاعدة . قاللى لأ ممكن تبقى قاعدة مريحة شوية بس مش مقطوعة.
و بعدها قاللى و المساعد اللى قدام يمين ده عاوز يتغير.
و لف و رجع على طول و كل اللى مشيناه حتة 20 متر بالظبط قدام المحل .

الخلاصة انا انطباعى مش 100 100 عشان كان مفروض لما اقوله كشف كامل هو من نفسه يعمل كل اللازم عشان يعرف ايه اللى فى العربية بالظبط و خصوصا انى ماليش خبرة فى العربيات و زيى كتير بيعتمدوا على المركز و بس و لولا ان ليا كذا واحد صاحبى شافوها و قالولى احنا شاكين فى قاعدة الموتور و ان الحساس مكسور ماكنش عرف .
بس فى النهاية ممكن فعلا يكون مركز كويس و يعمل المطلوب منه

قائمة الاسعار من شركة العالمية و يا ريت اللى يعرف مكان ارخص او اضمن ان كل حاجة تبقى اصلى يقوللى:

طقم بوجيهات 460
فلتر بنزين (صينى) 195
فلتر هواء 150
زيت فتيس ( تويوتا) 300
سير مجموعة 195
فلتر زيت 60
زيت موتور ( ليكزس تويوتا lexus ) و مكتوب عليه زيت مركب و الراجل قاللى 10000 كم و مافهمتش ده معدنى ولا لأ 300 جنيه
حساس vti . ( ب 250 جنيه)
قاعدة موتور استيراد حوالى 350 جنيه
مساعد امامى يمين ( ماجبتش سعره)

بخلاف ده كله انا حاسس ان فى دقدقة فى العجلة اللى ورا يمين بس مش عارف سببها

انا لسة ماخدتش قرار هاعمل الصيانة عنده ولا برة ولا هاشترى الحاجة من برة و اعملها عنده ولا ايه . تحديدا زيت الفتيس هو اللى عاوز اجيبه نيسان و اتمنى اغيره عند حد كويس.

الف مبروك