الموضوع: البطارية بتفضي بسرعة

السلام عليكم
بص يا سيدى انت هتجيب لمبه بيان من اى واحد بتاع اكسسوار عربيات هى لمبه صغيره بتبقى مع الكهربائى لما بيكشف على حاجه فى العربيه فيها كهربا ولا لا وغالبا بتبقى على سن مفك او ليها شوكه كده وطبعا الطرف التانى سلكه طولها تقريبا 1 متر لو لقيتها بالشكل ده يبقى خير وبركه لو ملقتهاش اشترى اللمبه لوحدها وهى فى حجم حبه الفول السودانى المقشره والوات بتعها قليل جدا واطبخلها سلكين وجربها على البطاريه مباشره فرده على السالب وفرده على الموجب وساعتها نورها هيبقى شديد جدا اعلى اضاءه ليها
بعد كده اقفل عربيتك وتسيب القزاز مفتوح بس تقفل السنتر وكل حاجه وتشيل كابل البطاريه السالب ولاحظ وانت بتشيله فى اصوات تشريز ولا لا بعدين ركب طرف اللمبه على الكابل بتاع العربيه السالب وطرف اللمبه التانى على قطب البطاريه السالب يعنى اللمبه بقت فى طريق كابل السالب اللى رايح للبطاريه لو اللمبه نورت يبقى فى تسريب كهربا فى العربيه وعلى قد اضاءه اللمبه هتحدد حجم التسريب وطبعا لو نورت شعره خفيفه جدا يبقى مش مشكله لان فى حاجات فى العربيه بتاخد كهربا والعربيه مقفوله عشان بس تبقى ستاند باى زى الكاسيت والساعه بس الكلام ده هينوراللمبه نور بسيط جدا طب لو منورتشى يبقى البطاريه ضعيفه او شحن الدينامو ضعيف طب نورت اعمل ايه عشان احدد العيب
تطول سلك اللمبه شويه ونحاول توصلها قدام القزاز اللى قدام عشان تشوفها من جوه العربيه ولو انت جسم يساعدك تمد جسمك من الشباك المفتوح وتشيل فيوز فيوز لحد ما اللمبه تطفى طب لو جسمك مش هيساعدك هتفتح الباب وتقفل لوك الباب بمفك عاده يعنى تحاكى كالون العربيه وندوس على زرار الباب عشان لمبه الصالون تطفى ولو عندك فيوزات فى الحوض تجربها برضه والكتاوت برضه بس معظم الكناوت معديه على فيوزات فغالبا هتلاقيه فيوز بيؤدى اكثر من وظيفه زى فيوز السنتر ونور الباب والصالون او فيوز مرايات الكهربا او ممكن حتى الولاعه
صاحبى قدرنا نوصل للمشكله اللى عنده وكانت فى السنتر بس معرفناش نصلحها بس التسريب مكانشى كبير لدرجه انه يفضى البطاريه فاكتشفنا ان الدينامو عنده شحنه ضعيف بسبب تهريب فى كابل الدينامو الرئيسى وبتغييره العربيه مبقتشى تفضى البطاريه رغم التسريب حتى لو اتركنت 4 ايام
طب انت راجل دقيق ونفسك تشتغل بطريقه علميه يبقى تجيب افوميتر ب40 جنيه من باب اللوق وهتظبطه على التيار الثابت 20فولت وتتعامل معاه كانه لمبه القياس بس الافو هيطلعلك قرايه هتعرف بيها حجم التسريب ولو الموضوع سكه 1 الى 3 فولت مش قضيه مش هيفضى البطاريه لو 70 امبير على ما اعتقد المهم بعد ما تخلص كل ده رجع الاقطاب مكانها بحنيه وركب طرفين الافو على البطاريه وشوفها مخرجه كام لو 12.5 يبقى لوز العنب وشحنها تمام قوى لو اقل 9 مثلا تبقى محتاجه تتشحن وبعدين وجه الافو نحيتك وانت بتدور المفروض الافو هيرفع بمقدار 2 فولت او 1.5 فولت وميحصلشى حاجه لما تزود بنزين لان لو الفولت على وانت بتزود بنزين يبقى كتاوت ظبط الشحن جوه الدينامو بايظ ودى نصيحه موثوق منها (ربنا يمسيك بالخير يا مهندس ايهاب)
ملاحظات
-وانت بتشيل اى قطب من اقطاب البطاريه شيل السالب الاول لو هتشيل الاتنين ولو هتركب يبقى الموجب الاول وبعدين السالب
-على قد ما تقدر متخليش اى حاجه فى العربيه شغاله وانت بتشيل او بتركب اقطاب البطاريه حفاظا على الكنترول
-باى حال من الاحوال متشيلشى اى كابل من كابلات البطاريه والعربيه دايره خصوصا لو انجيكسن
-لو عربيتك ميجان او سيتروين منصحكشى ابدا تقرب جنب الكهربا بتاعتها لانها معقده جدا وصعب تحديد الاعطال فيها موديلات ما بعد 2005
-وانت مركب لمبه البيان كوصله بين كابل السالب والقطب السالب اوعى تشغل اى حاجه فى العربيه تحت اى ظرف لحسن سلك لمبه البيان يتحرق
كل المعلومات العاليه بناء على تجارب خاصه وكلفتنى خساير فى بعض الاحيان فحاول يكون حد معاك وانت شغال لمراعاه الامان والسلامه
دمتم بود