سؤالي لملاك السوزوكي وخصوصا الألتو 800 سي سي ومن يتكرم ويكون لديه فكره

**Abo_Mazen** · 27-05-2014 10:36 AM

أنا معايا سوزوكي ألتو 2008 - 800 سي سي ..في حاجه موجوده في العربية دي مش عارف هي عيب ولا ميزه ..بس أنا عموما متعايش معاها وكنت عايز أعرف من ملاك السوزوكي وخصوصا الموديل ده ..اللي هو ألتو 800 سي سي ...الحاجه دي إن الجيربوكس لو جه عليه مياه من فوق وخصوصا من عند حساس الزيت العربية متدورش ولو عملت ليها حاوي ..وحلها الوحيد عشان تدور إن الحته دي تتنشف كويس جدا جدا جدا بالهوا ..طبعا الموضوع ده بيعملي مشكلة بس في حالة غسيل العربية في البنزينه ..لإن بعد الغسيل بأضطر أقعد بتاع 10 دقائق أنشف فيها وبضطر أظرف بتاع البنزينه شلن زياده عشان وقفته معايا لغاية ما ينشف الحته دي تماما عشان ترضى العربية تدور ..مش عارف ...هي العربيه دي كده أصلا ..ولا ده عيب صناعه ..

**al_manara** · 27-05-2014 11:07 AM

ممكن صورة لو سمحت للمكان دة بالتحديد .

الي ان يفيدنا اي عضو .

**إبراهيم المصرى** · 27-05-2014 11:12 AM

هل المارش بيشتغل بس مبتيقاش عايزه تدور ولا مفيش صوت اصلاً ؟

**Abo_Mazen** · 27-05-2014 11:33 AM

المشاركة الأصلية كتبت بواسطة إبراهيم المصرى

هل المارش بيشتغل بس مبتيقاش عايزه تدور ولا مفيش صوت اصلاً ؟

بتبقى كأنها مفيهاش بنزين ..يعني فيه كهربا ومارش وكله تمام ..بس كأن مفيش بنزين ..شوف اي عربيه لو مفيهاش بنزين بتبقى عامله إزاي فى الدواره ..هي بتبقى زيها

بالنسبه للمكان فلأسف المكان ضيق وحاولت اصوره بس الصوره مش هتبقى محدده المكان بالضبط ..بس عموما هو المكان سطح الجيربوكس..يعني العربيه جر أمامي مانيوال يعني هتلاقي الشكل العام للجيربوكس للعربيات الجر الأمامي المانيوال شبه بعض ..فهو المكان يبقى سطح الجيربوكس من فوق علطول وأنا هحاول أصور المكان تاني

**bondokk** · 27-05-2014 01:11 PM

+ متابع

**أبو بلال** · 02-06-2014 05:44 PM

هل الألتو فيها شفاط بيساعد على دوار السيارة في حالات البرد؟ لو فيها شفاط، هتعمل الآتي لازم،قبل ما تدوّر، اضغط ضغطة على البنزين للآخر، وبعدين اسحب الشفاط عليك للآخر، وبعدين دوّر 5 ثواني، وريّح خمس ثواني، هتدور من تاني او تالت مرة، الماروتي نظامها كده، و800 برده، معرفش الألتو اخبارها ايه بالضبط.

**Abo_Mazen** · 03-06-2014 09:35 PM

المشاركة الأصلية كتبت بواسطة أبو بلال

هل الألتو فيها شفاط بيساعد على دوار السيارة في حالات البرد؟ لو فيها شفاط، هتعمل الآتي لازم،قبل ما تدوّر، اضغط ضغطة على البنزين للآخر، وبعدين اسحب الشفاط عليك للآخر، وبعدين دوّر 5 ثواني، وريّح خمس ثواني، هتدور من تاني او تالت مرة، الماروتي نظامها كده، و800 برده، معرفش الألتو اخبارها ايه بالضبط.

شكرا لإهتمام حضرتك ..بس حضرتك هي الألتو الـــ 800 سي سي إنجيكشن ..ونظام الشفاط ده في المحركات الكاربراتير ..فعشان كده هي مفيهاش شفاط

**أبو بلال** · 03-06-2014 11:33 PM

طيب هل جرّبت تغير في درجة حرارة المية المستخدمة في الغسيل؟ وهل جربت تقف ال10 دقايق دول من غير ما تنشف عشان تشوف هتدور ولا لا؟

**D . a .\ AYMAN** · 04-06-2014 03:15 AM

أنا ماعنديش الكلام ده وغسلت العربية والمحرك أكتر من مرة وبتشتغل على طول مافيش مشكلة ... احتمال يكون انت عندك حاجة مكشوفة في الضفيرة بتعمل كدة

**Abo_Mazen** · 05-06-2014 08:36 PM

المشاركة الأصلية كتبت بواسطة d . A .\ ayman

أنا ماعنديش الكلام ده وغسلت العربية والمحرك أكتر من مرة وبتشتغل على طول مافيش مشكلة ... احتمال يكون انت عندك حاجة مكشوفة في الضفيرة بتعمل كدة

حضرتك غسلت المحرك بالمياه كده عادي ..ولا إديت رشة جاز خارجيه كده .وخلاص .وبعدين معلش سؤال تاني هتقل على حضرتك ..هي إيه الفيشه اللي راكبه فوق الجيربوكس من فوق ..ﻹن هي دي اللي لما بتيجي عليها المياه بتحصل الحكايه دي