الموضوع: تحذير من التعامل مع معرض محمد زكي

ان كان هيتنصب عليا من معرض محمد زكي فرع القطامية

خلاصة الموضوع ان واحد كلمني من المعرض وقالي ان اللوجان متوفره عنده ومفيش غير واحده بس لون شامبين الفئة الرابعه بـ 97 الف روحتله في نفس اليوم بعد ما اتنفخت من الطريق المنيل بتاعه لاني مش معايا عربية واول ما عرف اني هجبله الشيك عن طريق البنك الاهلي وانا واخد علي الشيك موافقه من البنك من قبل ما اروحله قالي معلش هتبقي 98 الف علشان 97 الف ده للكاش فقط لكن طالما هنستني الشيك يبقي 98 الف ومن هنا لهنا وافقت دي كانت اول نصابيه النصابيه التانية خدت منه عرض سعر برقم الشاسيه ومواصفات العربية بعد ما عاينتها طبعا وكل ده كان يوم الجمعه اللي فاتت وطبعا السبت والاحد كانوا اجازة في البنك ويوم السبت بليل لقيت واحد بيتصل بيا من المعرض بيعتزرلي ويقولي معلش العربية اللي حضرتك حجزتها اتباعت لواحد كان حاجزها قبلك بيوم طبعا انفجرت فيهم وقولتلهم بتبيعوا عربية لاتنين ازاي يا شوية حرامية قالولي كان في مشكلة في السيستم بتاعهم والنور كان قاطع ومحدش بلغ الفرع انها محجوزة طبعا شغل نصب وقولت هروحلهم اسحب ال 7000 جنيه اللي كنت دافعهم حجز للعربية قابلني مدير المعرض وقالي حقق علينا وهنوفرلك عربية وخصم 500 جنيه هديه من المعرض وطبعا شغل السهوكه والطيبه ووافقت بحكم اني فعلا محتاجها وخدت عرض السعر الجديد وروحت البنك والبنك طلب مني استلام العربية وابلاغهم برقم الماتور والشاسيه فوجئت بالمعرض بيعترض وبيقولي لا انتا هتمضي علي استلام العربية بس العربية هتفضل عندنا في المعرض لحد ما نستلم الشيك من البنك قولتله ما انا جايبلك الجواب وهو في حد بيمضي علي استلام من غير ما يستلم في الدنيا دي وطبعا صمموا علشان ميخسروش فيها واهو الرفض يبقي جه مني علشان ميطلعوش وحشيين وروحت النهارده سحبت الحجز بتاعي ودي كانت قصتي مع معرض محمد زكي وحسبي الله ونعم الوكيل لانهم اتسببوا في اني لاغيت الحجز بتاعي مع المصرية للسيارات وفي الاخر طلع كله نصب في نصب


ودي مشاركة من أخ حازم معانا في جروب رينو لوجان علي الفيس بوك





الواحد مش بيعيب علي المعارض قد ما بيعيب علي الوكيل نفسه اللي سايبنا ملطشه في ايديهم

انا عامل الموضوع ده علشان محدش غلبان زي حالاتي يقع في ايد الناس دي تاني ويأمنلهم

المشاركة الأصلية كتبت بواسطة mastermind

على فكرة فعلا العروض والمعاملة دي كلها للكاش بس وكل المعارض بتعمل كده مع الشيكات او التقسيط
انا شخصيا اتعاملت مع محمد زكي كانوا في منتهى الاحترام والوضوح في المعاملة - حضرتك بتقول كده عشان انتا مشفتش غيرهم
لو شفت العك بتاع سمير ريان او القرش او غيرهم هتعرف ان محمد زكي محترمين جدا
انا والله مليش مصلحة اني ادافع عنهم بس بقول كلمة الحق من خلال رحلة بحث 4 شهور شفت فيها الويل من المعارض النص كم رغم اسمها الكبير

وعلى فكرة كلام استاذ جبريل مظبوط 100% لو رينو يبقى السبع ومحمد زكي والطارق - بس

تحياتي

انا عارف والله ولما بنلاقي معرض الناس بتشكر فيه اتوماتيك بنروح نتعامل معاه وده اللي خلاني اتعامل مع محمد زكي لاني لاقيت الناس في قسم رينو بتشكر فيهم وجيت علي نفسي وضربت المشوار العلقه بتاعهم ده اللي في طريق العين السخنه علي اساس ان العربية متواجده في الفرع ده بس وده كلام المندوب بتاعهم اللي كلمني بس لما يتلعب بينا الكره كدا لازم ندخل نقول اللي حصل وده للامانه علشان بعد كدا اللي يروح يتعامل مع محمد زكي يكون هيتعامل معاهم كاش مش قسط هتلاقيه يبعلك اي عميل جاي يقسط من عنده علشان انتا بالنسباله هتكون أهم منه مليون مره

المشاركة الأصلية كتبت بواسطة k.lotfy

السبع كان عايز يعمل معايا كده امضي استلام لغاية ما يصرف الشيك بس الوضع كان مختلف شويه كان معايا جزء بكاش وجزء بشيك فدفعنا الكاش واستلمنا العربيه وحطيتها تحت البيت ولما صرفوا الشيك بباقى المبلغ روحت استلمت الاوراق ده طبعا بعد حوارات مع مسؤل المبيعات ومدير المبيعات هو اللى خلص الموضوع

ما انا نفس النظام انا كنت دافعلهم في محمد زكي جزء كاش والباقي كان هيوصلهم بشيك عن طريق البنك الاهلي المصري ولو كانو طلبوا اني مستلمش الاوراق بس واستلم العربية لحد ما يستلموا الشيك كنت وافقت

المشاركة الأصلية كتبت بواسطة miromido75

للامانه انا اشتريت عربيتى من محمد ذكى و الناس كانوا فى قمه الاحترام

مفيش حد اتكلم في نقطة الاحترام دي هما الصراحه مبيغلطوش بس كفايا انهم يضحكوا عليك بس وعلي ما اعتقد حضرتك اكيد بردك عميل كاش عندهم