الموضوع: تحذير من التعامل مع ادريان الهرم

السلام عليكم ورحمة الله وبركاته

في البداية ربنا يعلم اني مش من النوع اللى بيحب يتكلم عن اي محل لان ده يعتبر اكل عيشه في الاول وفي الاخر, لكن احنا هنا هدفنا اننا نستفيد من تجارب وخبرات بعض

ومن واجبي اني انقل تجربتي وبما يرضي الله عشان ماحدش يقع في نفس المشاكل اللى حصلت معايا

البداية كانت لما رحت اشتري من عند ادريان "شارع الهرم - في المطبعة"

جي ام بايونير 820 وات 2 شانيل

وطبعا اكتشفت انه سعره اغلى من سعره في التوفيقية بكتييير !! ؟ ومش الجي ام ده بس ؟؟ ده كل حاجة عنده زود مش اقل من 150 جنيه عن سعرها برة

ودي كانت اول تجربة ليا في عالم الصوتيات فطبعا كنت زيي زي اي حد !! كل ماتسال يقولك روح لادريان

دول بيفهمو دول بيطلعو شغل مظبوط !! اوعى حد غير ادريان يركبلك !!

رحت هناك بكام الجي ام ؟؟ قالي 770 جنيه << انا سالت عليه في التوفيقية كانت اسعاره في حدود ال 600 جنيه

المهم من هنا لهنا !! قلتله بص انا هيجب معاك من الاخر الجي ام ده في التوفيقية بكذا

وانا عايز اشتري من عندك عشان اركب عندك فمن الاخر كدة هتدهولي بكام ؟

قالي بص هديهولك بكل الوصلات اللى هتحتاجها وال RCA والتركيب ب 750 جنيه

قالي الوصلات دي ب 90 جنيه لوحدها يعني انا كدة موجب معاك في الجي ام جاامد !!

حسبتها كدة لقيته اغلى شوية قلت مش مشكلة طالما هاخد شغل نضيف

قلتله ماشي توكل على الله

ركبنا - طبعا الصنايعي مش عارف يظبط الجي ام ومقلل ال Gain بتاعه ع الاخر !! ؟ اقوله ليه ياعم الحج يقولي ده جي ام جامد واخاف احرقلك الصب

قلتله نعم ؟؟ ده صب كيكر ياعم

قالي لا يا باشا هيتحرق لو عليت !! المهم قلت مش مشكلة وانا هظبط الجي ام بعدين

الكلام ده كان من شهر ونص تقريبا

في خلال الشهر ونص دول لفيت كتيييير وسالت هنا وهنا واتفرجت على صبات وبوازيك وتوصيلات كتييير وبقى عندي خلفية كويسة في المجال ده

وبعد كدة اكتشف بقى التالي والخزووووء الكبييير اللى انا لبسته يوم مارحت ركبت عند ادريان , طبعا ده بغض النظر عن فرق السعر الرهييب اللى بينه وبين اي حد تاني :

1- الوصلات اللى ركبهالي اسوء واردء انواع التوصيلات اللى موجودة في السوق !! قالي انها ب 90 جنيه في حين انها بتتباع في التوفيقية ب 25 جنيه

2- السلك اللى بيوصل مابين الجي ام والصب !! الباشا حاططلي سلك سماعات !! ؟ سلك سماعات يا ناس يركب على صب دبل كويل !!!!!!

3- ودي اللى بعتبرها كارثة !! اني لما جيت اشتري الجي ام سالت على الضمان قالي مافيش جي امات في السوق بتطلع بضمانات خالص !!! بعد كدة رحت التوفيقية والتوكيل كل المحلات أكدتلي ان ماينفعش اي محل يبيع اي جي ام بايونير من غير شهادة الضمان !!!!! حتى ادريان نفسه !!! يعني من الاخر اكل عليا الضمان

4- سلك الباور اللى واخد من البطارية لحد الجي ام !! نوعيته رديئة للغاية

وطبعا ماترتب على سوء التركيب والتوصيلات والصنايعية اللى مش فاهمين اي حاجة ان الجي ام اللى دافع فيه 750 جنيه !! ماكملش معايا شهر وبدات يهرتل

ولما رحتله يقولي الصب بتاعك هو اللى باظ والكفاءة بتاعته قلت !! مع اني مجرب الصب على 3 جي امات تانيين شغال زي الفل

مش بس كدة !! ده انا خدت صب بايونير 1400 وات وركبته على الجي ام اللى عندي حصل نفس الهرتلة !! ؟

ولان الباشا مديني الجي ام من غير ضمان !! فانا كدة لبست الجي ام

والله واعلم ان كان فيه حجات تانية بايظة وانا مش متذكر

الخلاصة : ادريان مابقاش ادريان زي زمان !!

يوم ماهتفكر تشتري من ادريان اعرف انك هتدفع اقل واجب 150 جنيه زيادة عن سعر الحاجة اللى هتشتريها من برة !!

ولو هتاخد مقابل وتركيب نضيف وتحس ان الفلوس راحت في مكان تستاهله نقول معلش !! ؟ لكن مايبقاش فلوس غالية وكمان شغل ردئ

وضحك على عقول الناس !! والله واعلم

جايز الجي ام اللى باعهولي اصلا كان فيه مشكلة واتصلح وعشان كدة مارضاش يديني شهادة الضمان !!!

انا حكيت الموضوع بما يرضى الله وربنا يعلم اني لا بفتري عليه ولا اي حاجة !! ده بالعكس يمكن فيه تفاصيل كمان انا مش متذكرها حاليا

وكل اللى شاف عربيتي وشاف التوصيلات شتم وسب اللى ركبها

انا لا هروح اتكلم معاه ولا هعمل اي حاجة لان انا مش بتاع مشاكل بس يكفيني اني خلاص علمت عليه وان اي حد اعرفه هحذره منه

وربنا يعوض عليا في الجي ام اللى ماكملش شهر

وربنا يشهد عليا في اللى بقوله