مستعمل فى حدود 65 الف ( جيتز 2008 او بروتون 2009 او هوندا سيتى 2006)

**ghostfeda** · 20-07-2014 02:45 PM

السلام عليكم
عايز اشترى اول عربية ليا فى حدود 65 الف ممكن اكتر حاجة بسيطة
محتار جدا فى انى اختار بين الثلاث عربيات دول ... الهيونداى اقل امكانيات بس اعادة البيع ممتازة .. الهوندا عاجبنى شكلها و امكانيتها و استهلاكها للبنزين و كمان معدلات الامان بتعتها عالية بس للاسف قطع غيرها عالية و اعادة بيع ضعيفة و خصوصا ان فى السعر ده عربية موديل قديم نسبيا و معظم الى لقتيهم بيبقى كاسر ال 100 كيلو فلو جبتها و محتاجة صيانة كتيرة اكيد مش حستحملها . البروتون الناس كلها بتشكر فيها و سعرها كويس بس المعروض قليل و المطلوب كتير فسعرها ابتدى يزيد و المعلومات عنها مش متاحة زى العربيتين التانين فمش قادى اتوكل على الله من غير ما ابقى عارف عنها كفاية
انا مليش فى العربيات فاتمنى تسعدونى

**shiko85** · 20-07-2014 03:21 PM

وعليكم السلام ورحمة الله وبركاته
من كلام حضرتك واضح ان اهم حاجه ان مصاريف العربيه تكون قليله و قطع غيارها تكون رخيصه و سعر اعاده البيع مقبول بدون خساره كبيره, تمام كده ؟
يبقى من الـ 3 اختيارات ارشحلك الجيتز

**speranz** · 20-07-2014 04:39 PM

من بين اختياراتك اختار الجيتز
ولو اختيارات تانية بفضل الاوبترا

**S O P H O S** · 20-07-2014 06:12 PM

الجيتز او البروتون شرط الحالة

**eng.m7md.ali** · 20-07-2014 06:28 PM

قبل اي حاجة ادخل كل قسم واقرى عن كل عربية

الجيتز لو حالة كويسة ارشحهالك عشان قطع غيارها رخيصة الى حد ما وموجودة كتير .. وفي نفس الوقت عايزك تبعد عنها عشان عربية خفيفة وتفتقر لكل وسائل الامان .. وكمان فراملها زي الفيرنا

**Omar Mahmoud** · 21-07-2014 05:23 AM

الاول شوف قسم بروتون و هتلاقي إجابات عن اسئلتك
الجيتز تتفوق في انتشار قطع الغيار و انها تعتبر رخيصة
انما الجين 2 او الهوندا احسن منها في كل حاجة ما عدا إعادة البيع و قطع الغيار

**dr_hady4447** · 21-07-2014 08:13 AM

شوف الياريس

**ghostfeda** · 21-07-2014 09:40 AM

المشاركة الأصلية كتبت بواسطة shiko85

وعليكم السلام ورحمة الله وبركاته
من كلام حضرتك واضح ان اهم حاجه ان مصاريف العربيه تكون قليله و قطع غيارها تكون رخيصه و سعر اعاده البيع مقبول بدون خساره كبيره, تمام كده ؟
يبقى من الـ 3 اختيارات ارشحلك الجيتز

شكرا للنصيحة بس للاسف من 3 عربيات الجيتز الاقل فى كل حاجة بس بسبب اعادة البيع بقيت الاعلى قيمة .. عماتا انا حبص تانى على العربية و اجرب اسوقها ..

المشاركة الأصلية كتبت بواسطة s o p h o s

الجيتز او البروتون شرط الحالة

شكرا للنصيحة

المشاركة الأصلية كتبت بواسطة eng f3lix

قبل اي حاجة ادخل كل قسم واقرى عن كل عربية

الجيتز لو حالة كويسة ارشحهالك عشان قطع غيارها رخيصة الى حد ما وموجودة كتير .. وفي نفس الوقت عايزك تبعد عنها عشان عربية خفيفة وتفتقر لكل وسائل الامان .. وكمان فراملها زي الفيرنا

ما هى دى المشكلة .. الجيتز كعربية فعلا اقل من البروتون و الهوندا بكتير ... فالواحد يا يركب عربية نضيفة و يخسر فيها يا يركب عربية اقل علشان السوق ... عماتا انا ميال اكتر للبروتون و قريت كتير عنها هنا ... و العربية شدت حالها جامد فى المستعمل .. كانت قدامى نفس الموديل مستعمل قبل كدة فى 2011 و ارخص بكتير و مكنتش اعرف عنها حاجة فمردتش اجبها

المشاركة الأصلية كتبت بواسطة omar mahmoud

الاول شوف قسم بروتون و هتلاقي إجابات عن اسئلتك
الجيتز تتفوق في انتشار قطع الغيار و انها تعتبر رخيصة
انما الجين 2 او الهوندا احسن منها في كل حاجة ما عدا إعادة البيع و قطع الغيار

شكرا للنصيحة غالبا حتوكل على الله و اجيب بروتون

المشاركة الأصلية كتبت بواسطة dr_hady4447

شوف الياريس

مش بحبها ولا بحب شكلها .. ركبتها مرة كانت ضيقة و من جوة رخيصة ...

المشاركة الأصلية كتبت بواسطة speranz

من بين اختياراتك اختار الجيتز
ولو اختيارات تانية بفضل الاوبترا

فكرت فى الاوبترا بس نادرة و لما تابعت العربيات المستعملة على النت ملقتش منها حالة كويسة فى حدود المبلغ الى انا حطه .. و الموديل كان فى حدود 2006 ففضلت الهوندا عليها علشان وسائل الامان و الشكل ... عماتا حدور علها تانى

**cojak72** · 22-07-2014 07:43 AM

اتوكل على الله وخليك ف البروتون ومش هتزعلك وكيلها عزالعرب مهتم بيها والعربية اساسا محترمة وبعدين كل قطع الغيار غالية المهم هتعمر معاك ولا لأ
وزى ما بيقولوا فى الامثال الغالى تمنه فيه