موقف مع سايس(ة) , وما كنت أتمناه

**Mr.Lawyer** · 22-07-2014 02:32 AM

أولاً دول بلطجيه من بعد الانفلات الامنى وثوره يناير وهما فى كل الشوارع والحوارى بحته زفره وشغالين بلطجه على الخلق واللى ميدفعش يجر شكله ويتخانق معاه ويبوظله اى حاجه ف العربيه

ثانيـاً لازم الامن يرجع احسن من الاول والاشكال الضاله دى تتلم فى اسرع وقت لان الموضوع بقى زياده اوى

يا جدعاااان انا مره رحت اقعد على قهوه وركنت العربيه قدامى وانا قاعد لقيت عيل شكله زباله وبيشيل المساحات ، فبقوله بتعمل ايه ، قالى دا باركينج يا بيه ، قلتله باركينج ايه يعم دنا راكن فى الشارع قدام القهوه ، قام قالى يا باشا الركنه فى الشارع هنا ب 5 جنيه ، قلتله يعنى انا عشان اشرب شاى ب 2 جنيه ادفع 5 جنيه ركنه للعربيه ، ليه يعنى واتخانقت معاه ومشيت بالعربيه ومدفعتش جنيه وكل يوم خناق بالمنظر دا ولو وقفت ثانيه فى اى حته ينط عليك واحد وعايز قرشين

**ahmedamgad18** · 22-07-2014 02:39 AM

البلطجة ..... ثقافة شعب
للاســــــف

**Abo.Moazz** · 22-07-2014 02:45 AM

حصلت معايا فى باب الشعرية فى العيد عند زيزو بتاع السندوتشات
كنت أنا وأخويا وكل واحد معاه أسرته فى عربيته
جه واحد شكله غلط وقاللى خمسه جنيه على العربية
قلتله مش هدفع غير خمسه جنيه على العربيتين
قاللى براحتك ياباشا وسابنى ومشى وأنا نفخت صدرى وقلت أنا كده عملت الصح
خمس دقايق لقيت واحد تانى شكله أغلط من الأولانى وجه فاللى عايزين خمسه جنيه كمان ياباشا
طبعاً أنا نفخت صدرى وضربت ............................................. أيدى فى جيبى وطلعتله خمسه جنيه كمان زى الباشا وقلتله معلش كنت بدورلك على فكه

**wahba87** · 22-07-2014 02:51 AM

لا ولما تقوله لما أرجع يرد يقولك: لا يا باشا انا باخد مقدم !!!!

بجااااحة

**Elawany13** · 22-07-2014 02:58 AM

انا بحاول ابعد عن الاشكال الوسخه ديه
ولو وقفت بحاول معبرهومش وأخرى معاهم 1 - 2 جنيه
وبيكون بعد مش قبل
ولو مش عاجبه بسيبه وامشى
بس المشكلة ان الواحد دمه بيتحرق وبيعلى صوته وبيتلف أعصابه

أخر موقف كان من كام يوم فى طنطا
ركنت فى شارع البحر قدام البنك الأهلى
فوجئت بـ 2 شباب كل واحد فيهم طول بعرض زى البغل بعد ما ركنت بيقفلى المراية
وبينادى على الواد التانى وبيقوله خد 5 جنيه من عربية تانية كانت بتركن قدامى عربية اسبرينزا صينى هاتش باك ولاقيت الشاب اللى نزل منها بيدفع بعد كلمتين معاهم
والواد التانى بيقولى 5 جنيه ياباشا
قولتله بتوع ايه ان شاء الله
قالى نفحتنا ياباشا كل سنة وانت طيب
قولتله طيب لما ارجع هبقى اشوف
قالى طيب اخلى الواد يمسحهالك ويروقها كده علشان تبقى راضى
قولتله لأ متعملش حاجه
وكان فى نيتى اديله 1 جنيه وخلاص وانا ماشى
بس قولت فى بالى العيال ديه بتستعبط وممكن يطمع ويبلطج ويتخانق وانا مليش مزاج اتخانق
بالذات علشان معايا المدام
وأنا ماشى متغاظ من البجاحه والرخامه كبرت فى دماغى وقولت مش هدفع وهربيهم
وقولت خليك ايجابى واعمل الصح
قولت اجرب اتصل بالنجده 122
يمكن تحصل المعجزة ويردوا عليا ويتحركوا
وكالعادة النمرة مشغولة وبائت كل محاولاتى بالفشل
على بعد خطوات بيكون فيه قوة من المرور واقفه روحت ملاقيتش غير أمين شرطة واقف على الإشارة
كلمته قالى أوعى تدفع ولا مليم دول بلطجية ومتعبرهومش واشخط فيهم
قولتله انا مش عاوز ازعق ولا اشخط انا عاوز اربيهم بقوة القانون
قالى والله احنا لمين امبارح 6 من الحته ديه ومقبوض عليهم ومعملوهم قضايا
كل ما نشيل 2 يجيى بدالهم تانى لحد ما زهقنا !!!
قولتله طب وبعدين تعالى معايا واتصرف معاهم
قالى مينفعش اسيب خدمتى هنا واروح هناك

وهناك ديه على بعد خطوات بسيطة !!!
قولتله طيب اتصل بالأمين اللى بيمشى بموتوسيكل مرور يروحلهم
اتكلم على الاسلكى وبعدين قالى كلهم مشغولين فى شارع سعيد وحسن رضوان والشوارع الرئيسية مع الضباط علشان كلبشة العربيات اللى بتركن فى اليمين وتحصيل الغرامات الفورية !!
لما زهقت من كتر الكلام قولتله طيب شكرا
وروحت ركبت العربية وماشى لاقيت الواد جاى جرى ايوه ياباشا
روحت فاتح الشباك وقولتله بصوت غليظ انا ضابط يابنى
الواد وشه اتخطف وركبه سابت ومنطقش ولا كلمه ووسعلى الطريق ومشيت
وبعد 5 متر انفجرت انا والمدام على نفسنا من الضحك بعدها

يارب نخلص من الاشكال الوسخه ديه وننظف بقى

الفكرة ديه جاتلى من مشاركة أخونا
تامر.محمد
فى الموضوع ده

http://www.nilemotors.net/Nile/411927-a.html

**J A G U A R** · 22-07-2014 04:28 AM

انا لو مكانك هادفع وخلاص
القصه كلها 5 جنيه مش مستاهله

**egyption2012** · 22-07-2014 07:38 AM

تعالى ناخد الموضوع واحدة واحدة
السايس بتاع الجراج مش عايز يعمل مشاكل لنفسه
في الاول بيتكلم بالذوق وبعد شوية حيحاول يبلطج
اسهل حاجة وده طبعا حيكون فيه مخاطرة لكن بنسبة بسيطة
اولا متطولش معاه في الكلام وحاول تسأله عن اسمه بكل بساطة
وبكل سهولة قوله مش معايا فكة دلوقتي
لو حاول يبلطج قوله العربية عندك اعمل فيها اللي انت عايزه ويارب ارجع الاقي فيها خربوش
بس بكل ثقة وسيبه وامشي

طبعا مكان السايس معروف وهو نفسه معروف وحيخاف يكون ليك عيلة قوية ولا شوية صحاب حلوين يجوا يبهدلوه
فاحتمال يتنرفز بالكلام لكن مش حيقدر يعمل حاجة

طبعا فيه نسبة مخاطرة في الحوار ده
وده يتوقف على توفيق ربنا ثم اسلوبك في توجيه كلامك

**احمد المصرى** · 22-07-2014 08:29 AM

لو فى قانون فى البلد كان الواحد عرف يتكلم معاهم ولكن لو انت او احنا اتكلمنا مين ال هيحميك منهم

-

-

الموضوع: موقف مع سايس(ة) , وما كنت أتمناه

LinkBack

أدوات الموضوع

عرض

-

-

-

-

-

-

المواضيع المتشابهه

حد جرب يشتغل سايس

ياريت كلنا ناخد موقف ايجابي مع سايس الشارع

ازاى اروح المنيل مواصلات من موقف العاشر او من موقف مسطرد

سايس الجراج كسر الدوفر

سايس

الكلمات الدلالية لهذا الموضوع

المفضلات

المفضلات

ضوابط المشاركة