الموضوع: موقف مع سايس(ة) , وما كنت أتمناه

انا بحاول اركن فى اماكن بعيده عن البلطجيه دول
لكن لو مكان جديد عليا ومش عارف اشوف ركنه بدفع وامرى لله
على فكره فكره البلد كلها بتبلطج على كله يعني عندك سواق الميكروباص بيبلطج على الركاب
والسايس بتاع الموقف بيبلطج على سواق الميكروباص (الكارته )
وبتوع الحي او الشرطه بتبلطج عليهم يعني استحاله ان الشرطه تكون سايبه البلطجيه الى مسميين نفسهم سايس امام البنوك والمولات وحتى امام اقسام الشرطه والمرور بدون ما يكون ليهم نصيب من الغنيمه

إذا كان رب البيت للدف ضاربا فشيمة أهل بيته الرقص

المشاركة الأصلية كتبت بواسطة egyption2012

تعالى ناخد الموضوع واحدة واحدة
السايس بتاع الجراج مش عايز يعمل مشاكل لنفسه
في الاول بيتكلم بالذوق وبعد شوية حيحاول يبلطج
اسهل حاجة وده طبعا حيكون فيه مخاطرة لكن بنسبة بسيطة
اولا متطولش معاه في الكلام وحاول تسأله عن اسمه بكل بساطة
وبكل سهولة قوله مش معايا فكة دلوقتي
لو حاول يبلطج قوله العربية عندك اعمل فيها اللي انت عايزه ويارب ارجع الاقي فيها خربوش
بس بكل ثقة وسيبه وامشي

طبعا مكان السايس معروف وهو نفسه معروف وحيخاف يكون ليك عيلة قوية ولا شوية صحاب حلوين يجوا يبهدلوه
فاحتمال يتنرفز بالكلام لكن مش حيقدر يعمل حاجة

طبعا فيه نسبة مخاطرة في الحوار ده
وده يتوقف على توفيق ربنا ثم اسلوبك في توجيه كلامك

انا جربت مرة الموضوع ده فى رمسيس

قولتله اقسم بالله لو العربية حصل فيها حاجة هتشوف ايه اللى هيجرالك

رجعت لقيته محجر العربية وده كان اخره فى الاذى

المشاركة الأصلية كتبت بواسطة wahba87

انا جربت مرة الموضوع ده فى رمسيس

قولتله اقسم بالله لو العربية حصل فيها حاجة هتشوف ايه اللى هيجرالك

رجعت لقيته محجر العربية وده كان اخره فى الاذى

معلش هو يعني ايه محجر العربية؟؟و عملت معاه ايه بعدها؟؟

المشاركة الأصلية كتبت بواسطة omar mahmoud

معلش هو يعني ايه محجر العربية؟؟و عملت معاه ايه بعدها؟؟

محجر العربية يعنى حاطط حجر تحت العجل , علشان يضايقنى و انا طالع بالعربية

نزلت شلت الحجر و حطيته على جنب , و هو مكانش موجود

أنا مش بدفع نهائيا إلا لما بكون في مكان سو، يعني السنة كلها بدفع للسايس مرتين مثلا
لكن في العادي مبدفعش ،صعب قوي حد يقربلك حيخاف لاتكون ظابط ولاوكيل نيابة وآخره حيبرطم بكلمتين تقوم تاخده بالصوت حتلاقيه حط جزمه في بقه وسكت وده إللي دايما بيحصل معايا
إللي بعمله لما بركن ،السايس : حتتأخر ياباشا ، أنا :آه حتأخر ، وبعد أما آجي بشغل عربيتي ومبحفتحش الإزاز وبمشي

للأسف الشديد إحنا إللي بنشجع إنتشارهم إننا بندفعلهم ، أنا بجد نفسي أخلص عليهم كلهم زي مابيخلصوا عالكلاب الضالة ، أكتر فئة في المجتمع بكرهم وبشمئز منهم

معظم الوقت بتحرك بعربيه الشركه وموضوع الركنات ده والخمسه جنيه مش هدفعوا من جيبه فمش فارقه بس فمره حاولت اعمل ناصح ومدفعشى وده كان فى بارك المرور اللى على اول طريق السخنه والبارك ده كبير جدا يشيل عدد عربيات محترم وطبعا كان متأمن بشكل رهيب لدرجه ان اللى بيخرج الناس من الركنات معاه موتوسيكل عشان يجيب اخر البارك وفى ناس واقفه على المداخل والمخارج واشكالهم صعبه جدا تخليك تدفع عشره جنيه مش خمسه رحت مخلص مصلحتى فى المرور وركبت العربيه وطرت لقيت ناس بتجرى ورايا وحلق يا جدع امسك العربيه دى مع انى كنت شايف عربيات كتير داخله وخارجه وقلت مش معقول هيبقوا مركزين معايا كدع لحد ما واحد رمى نفسه قدام العربيه وقفنى وشكله كان طيب شويه عنهم لان كان فى واحد جاى ورايا وعنيه بيطق منها الشرار بس راح الراجل قاله ده نسى يحاسبك مش هيمشى يعنى راح جه بصلى فى عنيا ومتغاظ من الجرى اللى جريه ورايا رحت مطلع الخمس بلابل وكنت اصلا مجهزهم بس شكله كان هيبقى حوار كبير لو كنت مشيت من غير ما احاسب
وعلى النقيض
كان عندى شغل فى بورسعيد وهقضيلى كام يوم هناك المهم انا متعود اركن فى اماكن معينه مضمونه وضل لانى بسيب العربيه ممكن يومين كاملين من غير ما احركها لان البلد صغيره جدا واعلى اجره للتاكسى جواها 5 جنيه فبفضل اقضيها مشى او مواصلات المهم اضطريت اروح البنك وطبعا المكان اللى فيه البنك مكان راقى شويه وزحمه شويتين نعتبره التحرير عندنا بس كل حاجه اقل من عندنا زى الزحمه والعربيات والخناق تحس ان البلد هاديه المهم وانا واقف قدام البنك لقيت الونش اللى معاه الكلابش واقف وكانت اول مره اشوفه هناك المهم واقف ورا عربيه صف تانى ومشغل الميكروفون وبينادى على صاحب العربيه برقمها عشان ييجى يشيلها واخدلى بالك انت بيناديله عشان ميدفعوش مخالفه ولا يكلبشه يعنى الونش كل همه ان يسهل حركه المرور مش همه الغرامه داحنا فى القاهره بنتكلبش واحنا لسا منزلناش من العربيه المهم لقيت مكان حلو قوى وفيه مكان فاضى راح واحد جه ركن ونزل ومشى قعدت ادور على سايس هنا ولا هناك ملقتشى الراجل خلص مصلحته ومشى وبالسؤال عرفت ان بورسعيد مفيهاش مهنه السايس دى غير فى الجراجات العامه او الخاصه لكن فى الشارع انسى اذا كان الونش عارف ان صاحب العربيه مش هيدفع مقابل وقفته فى المخالف تخيل بقى لو سايس جه يقولى هات 5 جنيه المهم من ساعتها وانا بتنقل بالعربيه لو حتى 1 كم لانى متاكد انى هلاقى ركنه وببلاش ولو مخالف الونش هيفضل ينادى عليا عشان امشى
وعمار يا جيزه