سؤال بسيط بس عايز اساله

**mohamedsalah84** · 30-07-2014 03:28 PM

اولا كل سنة و انتوا طيبين و عيد سعيد عليكوا
انا معايا النيو صنى و كنت امبارح بوصل بيها الحاج لبنى سويف و غلطة عمرى انى مشيت من الطريق الزراعى... بصراحة كان راكب معايا الحاج و ورا مراتى و على رجليها ابنى و اخواتى الاتنين و كل واحدة على رجليها طفلة و مكنتش باخد مطب الا لما بيكحت فى العربية من تحت لحد ما بقيت احس بنهاية الدنيا و انا داخل على مطب ..
المهم حوالى 7 او 8 مطبات حسيت ان العربية اتعلم عليها من تحت و كنت عايز اتطمن و مش عارف ايه اللى ممكن يكون حصل..
اعمل ايه؟ اروح بنزينة ارفع العربية ولا استنى صيانة ال5000 كمان شهر ولا ايه رايكم؟
و ممكن تكون المطبات عملت ايه فى العربية؟
معلش يا جماعة العربية جديدة و دى اول عربية اشتريها و بالقسط فاى حاجة بتحصل الواحد بيخاف..
معلش طولت عليكم

**D.Ahmed Ismail** · 30-07-2014 04:38 PM

الصني بتحك ؟؟؟
ممكن عشان نعومة العفشة فالعربية بتهبط
عموما ماتقلقش .. ارفعها في بنزينة و هوا بيغسل بص عليها و مش هايكون فيه حاجة ان شاء الله

**Adnfalcon** · 31-07-2014 12:21 AM

خد المطبات بالورب و براحه خالص طالما محمل أكتر من 2 معاك

**almohaor** · 31-07-2014 04:06 AM

بسيطة ان شاء الله لان العربيات بتكون مصفحة من تحت وممكن يكون طرف الشكمان هو اللى كان بيحك
عموما افحصها من تحت لمراجعة تثبيت وصلة الشكمان
وبعدين اى مطب وانت محمل جامد خده بالورب