الموضوع: حادث تثبيت على الزراعى .. كل واحد ياخد بالة كويس ( تحذير هام )

بسم الله الرحمن الرحيم

تحذير هام للجميع ....
اول امبارح حصلي موقف وللاسف ماعرفتش اكتبة هنا عشان النت كان فاصل ولسة الشركة مرجعاة النهاردة ..
ندخل في المهم ..
كنت راجع الساعة 2 بالليل علي الطريق الزراعي لوحدي عند مدخل طنطا ( دفرة ) وماشي في امان الله و الطريق مفيهوش عمود نور واحد شغال و العربيات علي الطريق تتعد علي الصوابع لاقيت عربية لادا فيها 2 جات جمبي و السواق فضل يشاورلي باشارات غريبة كدة مفهمتهاش زي ميكون بيقلي عندك مشكلة في العربية انا نفضت وقلت دي اشتغالة فضل ماشي ورايا وانا كنت ماشي علي سرعة 80 وبعدين لاقيتة بيقلبلي نور برضو نفضت وبدئت اقلق مفيش ربع دقيقة لاقيتة قام كابس بنزين وداخل فيا من عند المرايا الحمد لله لميت نفسي وبعدت مالحقش يخبطلي جمب العربية يادوب حسيت بحكة بسيطة وفضل كابس بنزين عاوز يعديني عشان يقفل عليا قمت نازل علي الرابع وقارس علي العربية عديتة وبقيت ماشي علي 120 ومرة واحدة الاقي عربية تانية طالعة بعد تقريبا 500 متر وبيرمو في الارض حاجة زي الصواريخ كدة بتطلع دخان ستر ربنا انة كان رمي واحد بس وعمل دخان كبير قمت قارس اكتر وعديت وسط الدخان ومش شايف حاجة لمدة ثانيتين او تلاتة وبعدين ببص في المرايا لاقيت العربيتين جايين ورايا قمت مدي الخامس ومشيت علي 150 تقريبا وفضلت اجري لحد ما وصلت عند منطقة المعرض عندنا في طنطا ولاقيت لجنة شرطة واقفين قلت هقول للي في اللجنة عشان يصطادوهم ببص ورايا ملاقيتهمش تقريبا شافو اللجنة دخلو في اقرب تفرع من الطريق الحمد لله ربنا سترها عليا وستر ربنا ان العربيتين التانيين كانو لادا وشاهين ماعرفوش يحصلوني بس انا زعلت اوي من القرف الي بقي موجود دة لاني دخلت طنطا والنور رجع للعواميد ودول برضو عاملين يجرو ورايا زمان كانو بيخافو دلوقتي بقم بجحة وبيسرقو الناس في العلن وبعدين روحت البيت بصيت علي كل العربية اللحمد لله ملاقتش فيها حاجة غير بس حكة خفيفة في الاكصدام الخلفي يمين قلت الحمد لله بسيطة وربنا ستر ..
ياريت محدش يمشي علي اي طريق بعد الساعة 12 بالليل و الكل ياخد بالة وميقفش لحد ابدا ولا يسمع لحد ابدا علي الطريق وياريت متمشوش لوحدكم عشان متبقوش مطمع للحرامية لازم تخلو معاكم حد لان الحرامي جبان لما هيلاقي مجموعة هيخاف وربنا يسترها علينا جميعا